პარასკევი, მარტი 29, 2024
29 მარტი, პარასკევი, 2024

მუსიკა, როგორც კონტაქტი

გიოს, ჩემს პატარა შვილს, სოციალური ურთიერთობების, კომუნიკაციის პრობლემა აქვს, თავისთვის თამაში, კითხვა ურჩევნია, მარტო ყოფნა უყვარს.

 სხვადასხვა, ძალიან შედეგიანი თერაპიის გარდა, სახლშიც, შეძლებისდაგვარად ვცდილობ, მოვიფიქრო ათასგვარი საშუალება, აქტივობა, თამაში იმისთვის, რომ უფრო სოციალური და გახსნილი გახდეს, თანატოლებთან ურთიერთობა მოეწონოს.

სიმღერა ორივეს ძალიან გვიყვარს, მას აბსოლუტური სმენა და ძალიან ლამაზი ხმა აქვს, რისი საშუალებითაც, უკვე ორ ხმაში სიმღერასაც ვახერხებთ და ხალხურ თუ ცნობილ საბავშვო სიმღერებს ვსწავლობთ. ბოლო ერთი თვეა სიმღერა, მუსიკალური ურთიერთობა ჩვენს რეგულარულ, საოჯახო თერაპიად ვაქციეთ. ყოველ საღამოს, როდესაც ის ბაღიდან ბრუნდება და მე სამსახურიდან, ვახშმის მერე ვსხდებით და დიდხანს ვმღერით.  ჯერ მელოდიას და სიტყვებს ვსწავლობთ, მერე ვცდილობთ ეს ჩვენი სიმღერა დიალოგად ვაქციოთ,  ბოლოს ხმებში ვანაწილებთ და ისე ვღიღინებთ. გიორგის შემთხვევაში მისი კარგი მუსიკალური სმენა მეხმარება რთული სიმღერები ვისწავლოთ და ვიმღეროთ, თუმცა, ამგვარი კონტაქტისთვის, მერწმუნეთ, სიზუსტე და განსაკუთრებული მუსიკალური განათლება სულაც არაა საჭირო.

ზოგჯერ მარტივ ინსტრუმენტებსაც ვიყენებთ ხოლმე, მაგალითად, საბავშვო დრამს, ქსილოფონს, ელექტრონულ პიანინოს,  ვეჩვევით, როგორ დაველოდოთ ერთმანეთს, როგორ მივყვეთ მელოდიას, როგორ შევახამოთ ხმები და განწყობები.  ცოტა ხანში, ნოტების სწავლასაც ვაპირებთ, ჩემი ბავშვობის ფორტეპიანოსაც შევბედავთ.  ეს ჩვენთვის ერთგვარი კომუნიკაციური თერაპიაცაა და საყვარელი გართობაც. ხოლო, რა დიდი სიამოვნებაა ეს ურთიერთობა, ამას აღარ მოგიყვებით, აუცილებლად თავად უნდა სცადოთ.

ჩვენი აქტიური მუსიკალური „პრაქტიკის” შემდეგ,  რომელმაც საუკეთესო შედეგი გამოიღო, თეორიის ძებნაც დავიწყე და აღმოვაჩინე, რომ ჩემი და გიორგის მუსიკალური თამაში მსოფლიოში ცნობილი და კარგად ნაცადი თერაპია ყოფილა, რომელსაც აქტიურად იყენებენ სხვადასხვა ტიპის სირთულეების აღმოსაფხვრელად, დაწყებული მარტივი კომუნიკაციური პრობლემებით, აუტიზმის ურთულესი ფორმებით დასრულებული.

აი, ასეთი თერაპიის ერთ-ერთი მაგალითი:

 მუსიკალური თერაპია საგრძნობლად ცვლის  სოციალურ, კოგნიტიურ და ემოციურ უნარებს. განწყობა, მეხსიერება, ქცევა,    ყურადღება  უმჯობესდება, ბავშვი ბედნიერი და მხიარულია და როგორც კვლევები და პრაქტიკა აჩვენებს, გაცილებით მობილიზებულიც.

 მიუხედავად იმისა, განსაკუთრებული საჭიროების ბავშვი გყავთ კლასში ან, უბრალოდ, მორცხვი მოსწავლე, თუ მუსიკალურ თამაშებს ჩართავთ თქვენი გართობის თუ სწავლების პროცესში,  ის გაცილებით შედეგიანი იქნება, რადგან ბავშვები ასეთ აქტივობების დროს  გაცილებით მოტივირებულები არიან.

ყოველდღიურად ჩვენს საკლასო ოთახში სრულიად განსხვავებულ ბავშვებთან გვიწევს ურთიერთობა. მათ შორის, ერთი მეტისმეტად აქტიურია, მეორე – ძალიან მორცხვი, პასუხს ან საერთოდ არ გცემთ ან ძალიან ჩუმად, ძლივს გასაგონად ლაპარაკობს, მესამეს საკუთარი სხეულის მართვა და სკამზე დიდხანს ჯდომა უჭირს, მეოთხე – სკამზე ქანაობს, მეხუთეს  ძალიან კონკრეტული ინტერესები აქვს და.შ.  ნებისმიერი სიტუაციის მიუხედავად,  , რა საგანს, საკითხს, მეთოდს თუ გეგმას ეხება თქვენი გაკვეთილი, ნებისმიერი სასწავლო აქტივობის პროცესში მუსიკა შეგვიძლია ძალიან კარგად გამოვიყენოთ.

მუსიკა, როგორც კონტაქტი, სასწავლო აქტივობის ფონი, სტრესის მოხსნის საშუალება, ფიზიკური აქტივობის თანმხლები, ახალი ინფორმაციის გაგების საშუალება, მისი გამოყენება მრავალგვარად შეგიძლიათ.

ბავშვებს გაკვეთილზე ჯდომა და მოსმენა უჭირთ? ჩართეთ რამე რიტმული და იცეკვეთ მათთან ერთად, ერთმანეთს ვერ უგებენ და კონტაქტის პრობლემა აქვთ?  – აბა, ქართული პოლიფონია გამოიყენეთ, ჯერ ერთმანეთის ხმას დაუგდებენ ყურს, მერე კი სხვის აზრებსაც მოისმენენ. მოსწავლეების ყურადღების მობილიზება გიჭირთ? – ამისთვისაც გამოიყენეთ რომელიმე სასიამოვნო მუსიკალური სიგნალი.  იმაზე აღარ ვსაუბრობ, როგორი კარგი საშუალებაა უცხო ენის სწავლებისათვის უცხოენოვანი სიმღერები.

შეგიძლიათ, თქვენი გაკვეთილის პროცესში ინსტრუმენტები ჩართოთ, ან  ტაში, თუნდახ მერხზე ხელით ან კალმით  დაკაკუნება იყოს თქვენი ინსტრუმენტი, ააწყვეთ რომელიმე მხიარული მელოდია, შეისწავლეთ თქვენ გარშემო არსებული ხმები,  გადააქციეთ კლასი დასარტყამი ინსტრუმენტების ორკესტრად, იცინეთ და იმხიარულეთ ერთად.  დამიჯერეთ, ასეთ აქტივობაში ყველაზე მორცხვი და ჩაკეტილი მოსწავლეც ჩაერთვება.

მუსიკა, პირველ რიგში ურთიერთობაა, ჰოდა, გამოიყენეთ იგი.

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი