როგორი შეიძლება იყოს სასწავლო წლის ბოლო კვირა და ბოლო გაკვეთილები?
რა თქმა უნდა, სახალისო!
ზაფხულის მოლოდინში მოსწავლეებს საკმაოდ ამაღლებული განწყობა აქვთ და ჩვეულ საგაკვეთილო პროცესში მათი ჩართვა ძნელია. გავლილი მასალის გადამეორება ან ტესტირება მაშინ, როცა გარეთ მშვენიერი ამინდია და ზაფხულის არდადეგებს ორი კვირა გვაშორებს, არც ისე მიმზიდველია მათთვის.
გთავაზობთ რამდენიმე აქტივობას, რომლებიც ფინალური გაკვეთილების სახალისოდ დაგეგმვასა და გავლილი მასალის მხიარულად გამოკითხვაში დაგეხმარებათ.
„განძის მაძიებლები“ – ძალიან ეფექტურია, როდესაც გვინდა გავლილი თემისა თუ სრული მასალის შეჯამება ან ჯგუფური მუშაობის წახალისება და გუნდის შეკვრა. წინასწარ მომზადებულ კონვერტებში მოთავსებულია სხვადასხვა დავალება და სკოლის ტერიტორიაზეა განლაგებული. იმისთვის, რომ განძამდე მივიდნენ, მოსწავლეებმა ყველა დავალება უნდა შეასრულონ.
მოსწავლეებს ვყოფთ რამდენიმე ჯგუფად (თითოეულში 5 ან 6 მოსწავლეა). თითოეულ ჯგუფს გადავცემთ თითო კონვერტს, რომელშიც წერია მათი შემდეგი დავალების ლოკაცია ან მინიშნება (მაგალითად: „დავალება არის ფიზიკისა და მუსიკის კაბინეტებს შორის“, ან „იქ, სადაც ძალიან ბევრი წიგნია“, ან „იქ, სადაც ყველაზე მეტი ექსპერიმენტი ტარდება“ და ა.შ.). აღნიშნულ ლოკაციაზე მათ ხვდებათ შემდეგი დავალების ფურცელი (მაგალითად: „ამოხსენით ეს მათემატიკური ამოცანები. სწორად შესრულებული დავალების შემთხვევაში მიიღებთ შემდეგ დავალება–მინიშნებას“, ან „მიდით რუსულის მასწავლებელთან და ჩამოუთვალეთ კვირის დღეები და თვეები. თუ დავალებას კარგად გაართმევთ თავს, მისგან მიიღებთ შემდეგ დავალებას“). დავალება შეიძლება იყოს ინდივიდუალურიც (მაგალითად: „ნინომ უპასუხოს ბიოლოგიის მასწავლებლის შეკითხვებს“, „საბამ ქართულის მასწავლებელს წაუკითხოს მისი საყვარელი ლექსი“ და ა.შ.).
როცა მოსწავლეები ყველა დავალებას შეასრულებენ, ისინი მიადგებიან იმ ადგილს, სადაც დამალულია მათი განძი. ასევე შესაძლებელია, განძს იცავდეს ბიბლიოთეკარი / მანდატური / სკოლის დირექტორი (იმის მიხედვით, როგორ დაგეგმავთ და რამდენ ადამიანს ჩართავთ ამ აქტივობაში). შესრულებული დავალებების სანაცვლოდ მოსწავლეები მიიღებენ ბარათს, რომლის საფუძველზეც განძი მათ გადაეცემათ და თამაში დასრულდება.
განძი შეიძლება იყოს გემრიელი ხილით ან ტკბილეულით სავსე ყუთი, ნაყინი, სიმბოლური საჩუქრები… მთავარია, ის იყოს ყველა მოსწავლისთვის.
აღნიშნული აქტივობა შეიძლება უფრო მასშტაბურადაც ჩატარდეს მშობლების მონაწილეობით.
„yes day – თანხმობის დღე“ – ეს არის დღე, როდესაც მასწავლებლები მთელი დღის (მთელი გაკვეთილის) განმავლობაში ყველაფერზე ვეთანხმებით მოსწავლეებს და არ ვეუბნებით სიტყვებს „არ შეიძლება“.
ამ აქტივობასაც სჭირდება წინასწარ მომზადება. წინა დღეს მოამზადეთ „თანხმობის დღის“ ქილა, დაურიგეთ მოსწავლეებს ფურცლები, რომლებზეც ჩამოწერენ, რის გაკეთებას ისურვებდნენ სკოლაში.
წინასწარ მომზადებულ ფურცლებზე უნდა ეწეროს წინადადების დასაწყისი: „შეიძლება, _ _ _ _?“
მაგალითად, მოსწავლემ შეიძლება დაგვიწეროს: „შეიძლება, ნაყინი ვჭამოთ?“ – ჩვენ ვპასუხობთ: დიახ!
რასაკვირველია, უნდა გავითვალისწინოთ მსგავსი შეკითხვები და ვიქონიოთ კლასში ყველა საჭირო რესურსი (თუნდაც ნაყინი). რაკი ქილა წინა დღეს ივსება, შეგიძლიათ, სახლში თვალი გადაავლოთ მოსწავლეთა სურვილებს და ამოიღოთ ქილიდან ისინი, რომელთა შესრულებასაც ვერ შეძლებთ ან თქვენი ვერსიით ჩაანაცვლოთ. ამ შემთხვევაში ყველანაირად მომზადებული იქნებით, თანხმობის დღე მხიარულად ჩაივლის და ეს ემოციები დიდხანს გაგყვებათ.
არსებობს სხვა მხიარული აქტივობებიც, რომლებსაც ხანგრძლივი მომზადება არ სჭირდება, მოკლე დროში იგეგმება:
„დაასახელე 5“ – აქტივობა შეიძლება იყოს ჯგუფური ან ინდივიდუალური. დაასახელე / ჩამოწერე: 5 ცხოველი, 5 ფრინველი, 5 ზმნა ინგლისურ ენაზე… სხვა გაკვეთილის შემთხვევაში პირობას შევცვლით: 5 ისტორიული ფაქტი, 5 არსებითი სახელი, 5 ზმნა, ილია ჭავჭავაძის 5 ნაწარმოები და ა.შ.
უცხო ენის გაკვეთილისთვის ამ დავალების შეცვლა შეიძლება შემდეგნაირად: ვსხდებით წრეზე და თითოეული მოსწავლე რიგის მიხედვით ამბობს სიტყვას, რომელიც D ასო–ბგერით იწყება. ასევე შეგვიძლია, დავასახელოთ: ცხოველები, სასკოლო საგნები, ნივთები, რომლებიც გვჭირდება პლაჟზე, ყველაფერი, რაც ცივია, ყველაფერი, რაც მძიმეა და ა.შ., სანამ ლექსიკური ერთეულების მარაგი არ ამოიწურება.
კიდევ ერთი ვარიანტია, მომდევნომ დაასახელოს სიტყვა, რომელიც წინა სიტყვის ბოლო ასოზე იწყება. მაგალითად, თუ წინა მოსწავლემ თქვა „წიგნი“, მომდევნო ამბობს სიტყვას, რომელიც ი–ზე იწყება. ასე მხიარულად ვაჯამებთ გავლილ მასალას და ვასრულებთ გაკვეთილს.
ბურთით გამოკითხვა – ეს გამოკითხვის საკმაოდ ცნობილი მეთოდია და კარგია, როდესაც წლის ბოლოს ყველა გავლილი საკითხის გამოკითხვა გვინდა. დავუსვამთ შეკითხვას მოსწავლეს – გადავაწოდებთ ბურთს, მოსწავლე გვპასუხობს კითხვაზე და ბურთს უკან გვიბრუნებს. მერე სხვა მოსწავლეს გადავაწოდებთ ახალი შეკითხვით და ა.შ. თამაშის ელემენტები ამცირებს სტრესს და გამოკითხვის პროცესს სახალისოდ და სასიამოვნოდ აქცევს.
წერილი სკოლის თანამშრომლებს – მოსწავლეები მისწერენ მადლობის წერილს და თან დაემშვიდობებიან სკოლის თანამშრომლებს: ბიბლიოთეკარს, დამლაგებელს, მანდატურს, მასწავლებელს, რომლებიც მთელი წელი ზრუნავდნენ მათზე და უზრუნველყოფდნენ მათი განათლების პროცესს. მოსწავლეები, გარდა იმისა, რომ კიდევ ერთხელ გაივარჯიშებენ წერის უნარებს, სხვა ადამიანების შრომასაც დააფასებენ, დაინახავენ, რამდენად მნიშვნელოვანია თითოეულის როლი.
წერილი მომავალ კლასს – ეს წერითი დავალება ერთგვარი თვითრეფლექსიაც არის. მოსწავლეები უტოვებენ წერილს იმ ბავშვებს, რომლებიც მომავალ წელს იქნებიან ამ კლასში. უამბობენ, რა გამოწევები ელოდებათ, პირობითად, მეხუთე კლასში, რა იქნება კარგი, რას ისწავლიან, რა იქნება ადვილი სასწავლი, რა – ძნელი და ა.შ.
თვითრეფლექსიისთვის ასევე შეგვიძლია ჩავატაროთ აქტივობა „პიცა“ – დიდ ქაღალდზე დავხატოთ უზარმაზარი პიცა და კლასის შუაში დავდოთ. მოსწავლეები სათითაოდ გამოდიან და ავსებენ პიცას. ვიანიდან პიცის შუა ნაწილი ყველაზე გემრიელია, ცენტრთან ახლოს ვწერთ წლის საუკეთესო მოგონებებს, ხოლო ნაპირთან ახლოს – იმას, რაც ცუდად გვახსენდება.
ლიმონათის დღე – საკმაოდ გავრცელებული აქტივობაა სკოლაში ნაყინის მომზადება, თუმცა მე ლიმონათის მომზადება უფრო გამიადვილდა, მოსწავლეები კი არანაკლებ გამხიარულდნენ.
დაგვჭირდება ფორთოხალი, მარწყვი ან საზამთრო, პიტნა და მინერალური წყალი. ინტერნეტში ბევრი მარტივი რეცეპტია, ამოარჩიეთ რომელიმე და მოამზადეთ ლიმონათი თქვენს მოსწავლეებთან ერთად. სკოლაში ერთობლივად მომზადებული სასმელი განსაკუთრებით გემრიელია და ეს დღე საუკეთესო ემოციებით იქნება სავსე.
„გადააწოდე თეფში“ – ერთჯერად თეფშს მოსწავლე შუაში აწერს თავის სახელს და გადააწვდის კლასელებს. თითოეული კლასელი წერს რამე დადებითს მასზე. არდადეგების დასასრულს კლასელების პოზიტიური შეფასებები იქნება მოტივაცია მომავალი სასწავლო წლის სიხარულით დასაწყებად.
ამ აქტივობის ვარიანტია მიაწებე ზურგზე – ბავშვები წებოვან ფურცლებზე წერენ დადებით კომენტარებს და ზურგზე აწებებენ ადრესატს.
„შევსვათ სადღეგრძელო“ – მშვენიერი გზაა საჯარო გამოსვლების წასახალისებლად და არაფორმალურ გარემოში საზოგადოებასთან ურთიერთობის უნარის განვითარებისთვის, ხოლო უცხო ენის გაკვეთილებზე – სამიზნე ენაზე საუბრისა და კომუნიკაციის უნარის განვითარებისთვის.
წაიღეთ სკოლაში ერთჯერადი ჭიქები, რომელიმე გამაგრილებელი სასმელი და დაპატიჟეთ თქვენი კლასი საზაფხულო წვეულებაზე. თითოეული მოსწავლე წარმოთქვამს სადღეგრძელოს – სურვილისამებრ, სკოლისას, მეგობრისას, მასწავლებლისას, კლასელისას, ოჯახის წევრისას, ზაფხულისას და სხვა.
გავატანოთ სურვილები ფრანს – შეგვიძლია, ჩამოვწეროთ საზაფხულო სურვილები, მივაბათ ფრანს ან ჰელიუმის ბუშტებს და ცაში გავუშვათ.
გისურვებთ ბედნიერ ზაფხულს!
გამოყენებული ლიტერატურა:
- 101 unexpected Last-Day- of- School activities your studens will love . (08.06.2024)
https://www.weareteachers.com/fun-last-day-of-school-activities/
- 21 Epic Last Day of School activities to Kick off summer break . (08.06.2024)
https://www.teachstarter.com/us/blog/end-of-school-year-activities-to-kick-off-summer-break/
