ვერავინ იფიქრებდა, რომ სასწავლო წლის ნახევარზე მეტი საგანმანათლებლო სფეროს წარმომადგენლებს ასე უჩვეულოდ, მოულოდნელი სწავლა-სწავლების რეჟიმში შემოგველეოდა. ერთია უკვე ნაცნობ კლასთან, ნაცნობ მოსწავლეებთან და კოლეგებთან ერთად დაგეგმო და განახორციელო საგაკვეთილო პროცესი; ვირტუალურ რეჟიმში, დისტანციურად ჩაერთო ათასნაირ სოციალურ ქსელში და მოსწავლეებთან ერთად გაუმკლავდე 30-40-წუთიანი სწავლების უჩვეულო მეთოდს; სულ სხვაა – მოიფიქრო და ფრთები შეასხა მოხალისეობრივ საქმიანობას, რომელიც ითვალისწინებს დისტანციურ რეჟიმში, ვირტუალურად ახალი კოლეგებისა და მოსწავლეების გაცნობას, ერთმანეთთან დაკავშირებას, ჯგუფების შექმნას, თათბირების გამართვას, გაკვეთილების დაგეგმვას, თემატური თუ ასაკობრივი ინტერესების გათვალისწინებით გაკვეთილების ჩატარებას… ეს მხოლოდ მცირე ჩამონათვალია იმ ათობით აქტივობისა, რომელთა განხორციელებაც მოუწია მარინე ფორჩხიძესა და მის ახლად დაფუძნებულ მსოფლიო მასშტაბის საგანმანათლებლო არმიას.
დიახ, ხმამაღალი ნათქვამი არაა – „მსოფლიო მასშტაბის”, რადგან პროექტში მონაწილე მოხალისე მასწავლებლად იქცა არა მხოლოდ ევროპის, არამედ ბევრი სხვა ქვეყნის მოქალაქეც.
„მოხალისე” ეს არის პროექტი, რომელიც მიზნად ისახავს, უფასოდ დაეხმაროს საქართველოში მცხოვრებ ყველა ბავშვს, მათ შორის განსაკუთრებით სოციალურად დაუცველ მოსწავლეებს, სსსმ და შშმ მოსწავლეებს, არაქართულენოვანი სკოლის მოსწავლეებსა და ემიგრანტ ქართველ ბავშვებს სხვადასხვა საგნის ათვისებაში, სკოლის გაკვეთილების შემდგომ დამატებითი მუშაობის პრინციპით.
პროექტი მიზანია, უფასოდ დაეხმაროს სოციალურად დაუცველ მოსწავლეებს, რათა მოამზადოს ისინი ერთიანი ეროვნული გამოცდებისთვის.
პროექტი ითვალისწინებს საქართველოს მაშტაბით უფასო სასწავლო კურსების ჩამოყალიბებას სასწავლო წლის განმავლობაშიც და არდადეგებზეც. კურსები ტარდება როგორც ონლაინრეჟიმში, ასევე პირისპირ შეხვედრებით. მოსწავლეები ახერხებენ არა მარტო აკადემიური, არამედ სოციალური უნარების გაუმჯობესებასაც.
პროექტში ჩართული არიან საქართველოში მომუშავე მოქმედი მასწავლებელები სხვადასხვა რეგიონიდან და მაძიებელი მასწავლებლები, ასევე მასწავლებლები მსოფლიოს სხვადასხვა ქვეყნის სკოლებიდან, რათა მოხდეს უცხო ენების ათვისების ხელშეწყობა. პროგრამის ფარგლებში ტარდება უფასო ტრენინგები მასწავლებლებისთვის და ხდება გამოცდილების გაზიარება.
იგეგმება ბევრი საინტერესო ქვეპროექტი მოხალისე მასწავლებლებისა და მოსწავლეების ჩართულობით. პროექტი არის მუდმივად გაგრძელებადი.
მისი ორგანიზატორია სსიპ რევაზ მუმლაძის სახელობის ქალაქ ზესტაფონის N7 საჯარო სკოლა, ხოლო დამფუძნებელი და ხელმძღვანელი კი – ამავე სკოლის ინგლისური ენის მასწავლებელი მარინე ფორჩხიძე.
პროექტ „მოხალისესთვის” სასიამოვნო გამოწვევა გამოდგა 2020 წლის ზაფხული.
„საზაფხულო სკოლა 2020” დასრულდა, რომელიც რამდენიმე შემდგარ აქტივობას ითვლის:
- 16 დასრულებული კურსი მოსწავლეებისთვის (ინგლისური, რუსული, გერმანული, ქართული, როგორც მეორე ენა; გეოგრაფია, ისტორია, დაწყებითი კლასების განათლება, მხატვრული კითხვა);
- 2 ჩატარებული ტრენინგი და 1 ვებინარი მასწავლებლებისთვის.
- მასში ჩართული იყო 300 მონაწილე საქართველოს სხვადასხვა კუთხიდან და 1 ემიგრანტი ქართველი მოსწავლე საფრანგეთიდან;
- 25 უცხოელი პედაგოგი და 42 ქართველი მონაწილე მასწავლებელი.
პროექტში მონაწილე ქვეყნებია: საქართველო, რუმინეთი, ლატვია, იორდანია, ინდოეთი, სერბეთი, თურქეთი, მაროკო, რუსეთი, აზერბაიჯანი, უკრაინა, პოლონეთი, სომხეთი. ჯამში 67 მასწავლებელი 13 ქვეყნიდან.
მოხალისე შეიძლება გახდეს საქართველოს ნებისმიერი საგნის მოქმედი მასწავლებელი, ტრენერი, მაძიებელი მასწავლებელი (მასწავლებლობის უფლების
მქონე), უცხოელი პედაგოგი ან განათლების სფეროში მომუშავე ადამიანი.
პროექტის მოქმედების ფარგლებში მოხალისე მასწავლებლები და მოსწავლეები რეგისტრირდებიან სპეციალურ პორტალზე. მასწავლებლები ჯგუფდებიან სპეციალობისა და სწავლების საგნის მიხედვით, ხოლო მოსწავლეები სწავლების ხანგრძლივობის, ასაკის/კლასის, საგნის მიხედვით.
შემდეგ ეტაპზე ხდება სარეგისტრაციო ფორმების გადარჩევა. კონკრეტული საგნის ხელმძღვანელი მასწავლებელი დისტანციურ შეხვედრებს აწყობს მოხალისე მასწავლებლებთან და მოსწავლეებთან. მათთან შეთანხმებით იგეგმება გაკვეთილები, დგება გაკვეთილების ცხრილი. თითოეულ ჯგუფზე პასუხისმგებლობას იღებს 1 ან 2 მასწავლებელი.
მიმდინარე საზაფხულო სკოლაში მონაწილე მასწავლებელთა რიცხვი იმდენად
დიდი იყო, რომ ზოგიერთ საგანში 2 მასწავლებელი ერთდროულად ატარებდა
გაკვეთილს.
სიახლე მოულოდნელი აღმოჩნდა. ზოგიერთი მოსწავლე არდადეგებზე დაგეგმილი სხვა აქტივობების გამო დროზე ადრე გამოეთიშა პროექტს. ისინი გვწერდნენ ან გვირეკავდნენ და გვატყობინებდნენ, რომ მიუხედავად დიდი
სურვილისა, სხვა, უფრო ადრე დაგეგმილი აქტივობის გამო ტოვებდნენ პროექტს, მაგრამ სამომავლოდ აუცილებლად შემოგვიერთდებოდნენ. ეს იმის მანიშნებელია, რომ პროექტი მდგრადია და აუცილებლად უნდა გაგრძელდეს.
პროექტში დარჩენილი მოსწავლეებისთვის საზაფხულო სკოლა სახალისო, ინოვაციური გამოწვევებით სავსე და ნაყოფიერი აღმოჩნდა. ეს გამოჩნდა მათ მიმოწერებში, უკუკავშირში, სოციალურ ქსელებში გამოქვეყვებულ სამადლობელ პოსტებში. საოცარი იყო ერთი მოსწავლის უჩვეულო გამომშვიდობება უცხოელ რუსულის მასწავლებელთან, რომელმაც დამშვიდობების ჟესტად პირდაპირი ჩართვისას ფორტეპიანოზე სიმღერა შეასრულა. აქტიურად ჩართულმა მოსწავლეებმა დასასრულს სიგელები დაიმსახურეს, ხოლო ყველა მოხალისე მასწავლებლისთვის მადლობის ნიშნად დამზადდა დიპლომები პროექტის დამფუძნებლისა და ავტორი სკოლის დირექტორის ხელმოწერებით.
პროექტის დასასრულიც ისეთივე ხმაურიანი აღმოჩნდა, როგორიც დასაწყისი იყო. საზაფხულო სკოლის სულისჩამდგმელის, მარინე ფორჩხიძის ორგანიზებით ჩატარდა ონლაინკონფერენცია, რომელშიც მონაწილეობდნენ როგორც ქართველი და უცხოელი მოხალისე მასწავლებლები, ასევე მოწვეული ქართველი ექსპერტები, მასწავლებელთა პროფესიული განვითარების ცენტრის თანამშრომლები და სხვა საინტერესო სტუმრები:
- ნინო ფეტვიაშვილი – მასწავლებელთა პროფესიული განვითარების ეროვნული ცენტრის უმცირესობათა ენებისა და რუსულის, როგორც უცხოური ენის ექსპერტ-კონსულტანტი;
- ეკა ტყავაშვილი – ილიას სახელმწიფო უნივერსიტეტის ბიზნესის, ტექნოლოგიის და განათლების ფაკულტეტის მოწვეული პროფესორი, მასწავლებელთა პროფესიული განვითარების ცენტრის ტრენერ-კონსულტანტი და გარე დამკვირვებელი, საქართველოს ინგლისური ენის მასწავლებელთა ასოციაციისა და ბრიტანეთის საბჭოს მენტორი;
- მაია ტყემალაძე – საჩხერის მეორე საჯარო სკოლის ინგლისური ენის მასწავლებელი. მასწავლებლის ეროვნული ჯილდოს ათეულის კლუბის წევრი. ინგლისურად მოსაუბრეთა კავშირის მიერ ორგანიზებული კონკურსის „საუკეთესო მასწავლებელი – ზეპირმეტყველების განვითარებაში – Best teacer – Oracy”-ის მეორე ადგილის მფლობელი. ბრიტანეთის საბჭოსა და მასწავლებლის სახლის მოწვეული ტრენერი;
- გიორგი ჭაუჭიძე – მარნეულის მე-2 საჯარო სკოლის ქართული ენისა და ისტორიის მასწავლებელი, სხვადასხვა პროგრამისა და პროექტის ტრენერი, 2019 წლის მასწავლებლის ეროვნული ჯილდოს გამარჯვებული;
- ლადო აფხაზავა – ჩიბათის საჯარო სკოლის სამოქალაქო განათლების მასწავლებელი. 2018 წლის მასწავლებლის ეროვნული ჯილდოს გამარჯვებული და მსოფლიო მასწავლებლის ჯილდოს საუკეთესო ათეულის წევრი.
კონფერენციაში მონაწილე მასწავლებლებმა წარმოადგინეს რამდენიმე წუთიანი პრეზენტაცია საზაფხულო სკოლის მუშაობის, გამოცდილების გაზიარების, საინტერესო და სახალისო დეტალების შესახებ. ხოლო მოწვეულმა სტუმრებმა ისაუბრეს ახალი ინიციატივის მნიშვნელობაზე და სასიამოვნო გაოცება გამოხატეს გაწეული შრომის შეფასებისას. მათი რეკომენდაცია იყო და ასევე პროექტის სამომავლო გეგმებშიც შედის აქტივობა, რომელიც გულისხმობს პროექტში ემიგრანტი მოსწავლეების აქტიურ ჩართვასა და მათ მხარდაჭერას როგორც ენების, ასევე სხვა საგნების სწავლების დახმარების კუთხით.
პროექტი „მოხალისე” შედგა. საზაფხულო სკოლის ინიციატივამ გაამართლა და უდიდესი გამოწვევა დისტანციურ რეჟიმში სპეციალისტების შეგროვების, უცხოელი და ქართველი მასწავლებლების ერთმანეთთან დაკავშირების, გაკვეთილების ერთობლივად დაგეგმვისა და ჩატარების შესახებ დაძლეულია. დასახულია სამომავლო გეგმებიც: შემოდგომიდან კვლავ განახლდება პროექტი და
თუ ქვეყანასა და ქვეყნის გარეთ არსებული ეპიდსიტუაცია საშუალებას მოგვცემს, მზად ვართ უკვე პირადად შევხვდეთ ერთმანეთს და დავაფუძნოთ მოხალისეობრივი ორგანიზაცია, რომლის მიზანიც იქნება სხვადასხვა სოციალური სფეროს წარმომადგენელ მოსწავლეთა უფასო დახმარება და მათთვის ხელსაყრელი სწავლების ფორმებით სასურველი საგნის შესწავლაში მხარდაჭერა. დიდი იმედი გვაქვს, გამოჩნდებიან მხარდამჭერი პირები ან ორგანიზაციები, რომლებიც დაგვეხმარებიან, შევქმნათ მოხალისე ორგანიზაცია მსოფლიო მასშტაბით, შევძლოთ, თავი მოვუყაროთ უამრავ სპეციალისტსა და მოსწავლეს, რომელთა მხარდაჭერისთვისაც შეიქმნა პროექტი „მოხალისე”.
