“E PUR SI MUOVE!” – ჰენრიკ სენკევიჩი

ლიტერატურის დარგში ნობელის პრემიის ღია კონკურსებზე ერები თავიანთი პოეტებითა და მწერლებით არიან წარმოდგენილნი. აქედან გამომდინარე, აკადემია პატივს მიაგებს არა მარტო ავტორს, არამედ იმ ერსაც, რომლის შვილიცაა იგი; პრემია მოწმობს, რომ ეს ერი საერთო საქმეში მონაწილეობს, რომ მისი ძალისხმევა ნაყოფიერია და არსებობის ღირსია მთელი კაცობრიობის საკეთილდღეოდ.

ეს პატივი უსაზღვროდ დიდია პოლონეთის შვილისათვის. არაერთხელ თქმულა, რომ პოლონეთი მკვდარი, ამოწურული და დამონებულია, მაგრამ აი მტკიცებულება იმისა, რომ პოლონეთი ცოცხლობს და იმარჯვებს… ძნელია არ გაიხსენო გალილეის სიტყვები: “E pur si muove!” (“ის მაინც ბრუნავს!”), როდესაც მთელი მსოფლიოს თვალწინ პოლონეთის გენიასა და შემოქმედებით სიდიადეს პატივს მიაგებენ.

პატივს მე კი არ მომაგებენ, – პოლონეთის მიწა ნაყოფიერია და მისთვის ჩემზე უკეთესი მწერლებია ცნობილი, – არამედ პოლონურ სიდიადეს, პოლონურ გენიას. ამისათვის ნება მიბოძეთ, როგორც პოლონელმა, შვედეთის აკადემიის წევრების მიმართ გულითადი მადლიერება გამოვხატო. დავამთავრებ ჰორაციუსის სიტყვებით: “Principibus placuisse non ultima laus est” (“იოლი არაა მოეწონო ძლიერთა ამა ქვეყნისა”).

კომენტარები

comments