ოთხშაბათი, თებერვალი 8, 2023
8 თებერვალი, ოთხშაბათი, 2023

პანდემიური გაკვეთილების გამოცდილება

თუ მკითხავთ, როგორი უნდა იყოს თანამედროვე მასწავლებელი, ჩემი პასუხია: თანამედროვე მეთოდებზე და ტექნოლოგიებზე მორგებული, მოსიყვარულე, მისთვის სირთულე უბრალოდ გამოწვევა უნდა იყოს და არა პრობლემა.

სწავლა-სწავლების პროცესში მასწავლებელი უამრავ სირთულეს აწყდება, რომლებიც შეიძლება დაკავშირებული იყოს მოსწავლის რთულ ქცევასთან, ათვისების პრობლემებთან და ა.შ. რთული სიტუაციიდან მარტივი გზების პოვნა პედაგოგის მნიშვნელოვანი უნარი უნდა იყოს. საკლასო ოთახში შექმნილი სიტუაციებიდან განსხვავებულ, სულ სხვა რთულ სიტუაციაზე მსურს საუბარი.

ეს სირთულე არის პანდემია, რომელმაც მთლიანად შეცვალა თითოეული ჩვენგანის ცხოვრების რიტმი და საკლასო ოთახმა კომპიუტერის მონიტორთან გადაინაცვლა. სიყვარულით, სითბოთი და გულწრფელი ჩახუტებით სავსე დღეები ვირტუალურმა ურთიერთობამ ჩაანაცვლა. დაიწყო პანდემიური გაკვეთილები, რომლებიც დიდი სიახლე იყო ყველასთვის. ონლაინსწავლების მიმართ განსხვავებული დამოკიდებულება ჰქონდათ მშობლებს, მასწავლებლებსა და მოსწავლეებს. უმეტეს შემთხვევაში მათი აზრი ერთმანეთს ემთხვეოდა და ამბობდნენ, რომ მსგავსი სწავლების პროცესი ვერ იქნებოდა შედეგიანი, თუმცა მასწავლებლების შრომამ და მონდომებამ მალე შეცვალა პესიმისტთა შეფასებები.

ონლაინგაკვეთილისთვის პირველი მზადება დიდი ხნით ადრე დავიწყე. ვფიქრობდი, რომელი მეთოდი ამერჩია პირველ კლასთან, რათა დროც დამეზოგა და შედეგიც მიმეღო. აუცილებელი იყო თვალსაჩინოების დამზადება, რომელიც დამეხმარებოდა მათთვის მასალის უკეთ გაგებაში. თავდაპირველად გამოვიყენე: Microsoft Office PowerPoint, Microsoft Word, www.toondoo.com, www.pixton.com, www.kargiskola.ge, http://learningapps.org და სხვა…

პირველი გაკვეთილისთვის ზუსტად ისე მოვემზადე, როგორც საკლასო ოთახში მოვემზადებოდი. სამუშაო მაგიდაზე მქონდა: გაკვეთილის გეგმის ძირითადი აქტივობების მონახაზი, კალამი, აღრიცხვის ფურცელი. წინასწარ, კომპიუტერის სამუშაო ეკრანზე გავამზადე თვალსჩინოებები და დავაჭირე ზარის ღილაკს. თითქოს საკლასო ოთახში პირველი ზარი დაირეკა! Teams-ის ჯგუფი მალე გაივსო ჩემი პატარების ბედნიერი სახეებით.

პირველ დღეს გავეცანით ქცევის წესებს. თუმცა, ეს არ იყო საკლასო წესები. ეს ონლაინქცევის წესები გახლდათ, რომლებიც პატარებმა უსწრაფესად აითვისეს.

  • საუბრის დროს ჩავრთოთ მიკროფონი;
  • გაკვეთილის ახსნის დროს მიკროფონი გვაქვს უხმო რეჟიმში;
  • კითხვაზე პასუხობს მოსწავლე და არა მშობელი (ასეც ხდება ხოლმე);
  • შესრულებული დავალება იგზავნება დათქმული დროის ამოწურვამდე;
  • ჯგუფში შემოვდივართ მასწავლებლის ზარის შემდეგ.

გაკვეთილის მსვლელობაში ყველა მოსწავლე თანაბრად იყო ჩართული, მათი შესაძლებლობების გათვალისწინებით. გაკვეთილის ბოლოს ვაკეთებდით შეჯამებას: რა ვისწავლეთ დღეს? რა იყო რთული? პასუხების მიხედვით ვაკეთებდი ჩანაწერებს, რაზე უნდა მემუშავა ამა თუ იმ მოსწავლესთან. ხდებოდა ინდივიდუალური გასაუბრება/მიმოწერა მშობელთან, სადაც ვთანხმდებოდით, როგორ უნდა გვემუშავა პრობლემის დასაძლევად.

მაოცებდა მშობელთა ჩართულობა და პატარების მონდომება. გვქონდა ჯგუფური სამუშაოები, ვატარებდით ცდებს, იღებდნენ ვიდეოებს და მიგზავნიდნენ სოციალურ ქსელში. დავალებებს ინდივიდუალურად ვუმოწმებდი და წერილობით ვაძლევდი შესაბამის განმავითარებელ შეფასებას, სადაც ყურადღებას ვამახვილებდი დადებით მხარესა და შეცდომაზე შესაბამის ინსტრუქციას ვაძლევდი. დავალების შემოწმების მსგავსი სისტემა საკმაოდ შრომატევადი იყო და ხშირად გრძელდებოდა შუაღამემდე, თუმცა ეს იყო ძალიან ნაყოფიერი შრომა, რადგან მოსწავლეები ხედავდნენ, რომ მათი ნამუშევრები ყოველთვის მოწმდებოდა, ამიტომ აქტიურად ასრულებდნენ დავალებას და ონლაინგაკვეთილებსაც მაქსიმალურად ესწრებოდნენ.

პანდემიური გაკვეთილები იყო მუდმივი სიახლის ძიების, სირთულეებთან გამკლავებისა და უდიდესი გამოცდილების მომცემი ყველა პედაგოგისთვის, რომლებიც არ უშინდებოდნენ სიახლეებს. ყოველი დღე იყო სიყვარულით სავსე. მშობლებმა უკეთ დაინახეს ის შრომა, რომელსაც მასწავლებლები დებდნენ საგანმანათლებლო პროცესში. მოსწავლეებმა შეძლეს სასწავლო პროგრამის დაძლევა და ამ პერიოდში უამრავი ახალი უნარ-ჩვევაც აითვისეს.

რთული იყო პანდემიური გაკვეთილები? – დიახ, თუმცა სირთულეების დაძლევა ადამიანს აძლიერებს!

გაუჭირდათ მოსწავლეებს მსგავს სიტუაციაში სწავლა? – დიახ, რთული იყო, მაგრამ არა შეუძლებელი!

რა იყო ყველაზე რთული?- სიშორე! ჯანსაღი ურთიერთობა, რომელსაც მოსწავლე საკლასო ოთახში ერთ სივრცეში გრძნობს! თუმცა, ეს ხომ დროებითია? ჩვენ მალე დავუბრუნდებით საკლასო  ოთახებს და თუ კიდევ დაგვჭირდება პანდემიური გაკვეთილები, მზად ვართ ამისთვის და არ გვეშინია!

 

 

 

 

 

 

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი