როგორ შევქმნათ ,,არატრადიციული’’ პრეზენტაცია პროგრამა Padlet.com-ის დახმარებით

რატომ მოსწონთ მოსწავლეებს ინტერაქტიული თამაშები?

პასუხი მარტივია: ამგვარი თამაშების გამოყენებით სწავლების პროცესი სახალისოა, მაღლდება მოსწავლეთა მოტივაცია და რაც ყველაზე მნიშვნელოვანია, თამაშით ნასწავლი თითქმის არასდროს ავიწყდებათ, რადგან ინტერაქტიული თამაშების უმრავლესობა დაფუძნებულია კონსტრუქტივისტულ პრინციპზე, კეთებით სწავლებაზე, ცოდნის სამი კატეგორიის ერთიანობაზე. დეკლარატიულ და პროცედურულ ცოდნას მოსწავლეები საჭირო დროს და საჭირო ადგილზე  პირობისეული ცოდნის სახით პრაქტიკაში იყენებენ (ცოდნის ტრანსფერი).

ელექტრონულ ინტერაქტიულ სავარჯიშოებს შორის გამორჩეულია პროგრამა Padlet.com, რომელიც  ამავდროულად დაფის როლს ასრულებს.

პროგრამა უფასოა. დარეგისტრირება ძალიან მარტივად ხდება. საკმარისია, საძიებო ველში ჩავწეროთ Padlet.com და ფანჯარაში ავირჩიოთ რეგისტრაციის სასურველი ფორმა:

პროგრამაში შესვლის შემდეგ ვაწკაპებთ ღილაკზე 

ამის შემდეგ გამოჩნდება სხვადასხვა ფორმატი. პრეზენტაციის შესაქმნელად ვირჩევთ ამ შაბლონს.

ვაწკაპებთ ღილაკზე Select და ინტერაქტიული დაფა-კედელი უკვე შექმნილია.

პრეზენტაციის დასათაურებისთვის  მარჯვენა ზედა კუთხეში ვაწკაპებთ სამ წერტილს. ჩამოიშლება ჩამონათვალი, ვირჩევთ Modify-ს, შემდეგ – title-ს და ვწერთ სათაურს. ამავე ფანჯარაში, ჩამონათვალში, მოვძებნით Wallpaper-ს, სადაც ფერებისა და ფონების მრავალფეროვანი არჩევანია.

სასურველი ფერისა და ფონის შერჩევის შემდეგ save ღილაკის დახმარებით მონაცემებს შევინახავთ.

პრეზენტაციის შესაქმნელად ელექტრონული დაფა-კედელი მზადაა.

საძიებო ველიდან (ბრაუზერიდან) ვიღებთ თამაშის ბმულს და ვუგზავნით მოსწავლეებს. ეს მათ საშუალებას აძლევს, რეგისტრაციის გარეშე, დაუბრკოლებლად  აღმოჩნდნენ საპრეზენტაციო კედელზე.

როდესაც ყველა მოსწავლე დაინახავს თავისი მოწყობილობის ეკრანზე დაფა-კედელს, ვაწვდით ,,არატრადიციული’’ პრეზენტაციის შექმნის ინსტრუქციას. კედლის მარჯვენა კუთხეში, ვარდისფერ ღილაკზე დაწკაპებით, ყველა მოსწავლე მიიღებს ინდივიდუალურ ბარათს, ანუ ,,ადგილს’’ კედელზე, სადაც რეალურად უნდა შექმნას პრეზენტაცია. (დაწეროს სათაური, დაბეჭდოს ტექსტი ან საძიებო სივრციდან ჩასვას მზა ტექსტი, ფოტო, ვიდეო, აუდიო მასალა).

ისრის დახმარებით შესაძლებელია, როგორც პროგრამის ბაზაში არსებული, ასევე სამუშაო მაგიდაზე წინასწარ მომზადებული ფოტოების ჩასმა.

ეს სიმბოლო ჰიპერბმულის ჩასმის საშუალებას გვაძლევს.

ღილაკის დახმარებით შეგვიძლია ინტერნეტსივრციდან ავტვირთოთ სასურველი ტექსტი, ფოტო-, ვიდეო- და აუდიომასალა.

თუ დავაწკაპებთ ამ ღილაკს, ჩამოიშლება საძიებო ველი, სადაც კომპლექსურად შეგვიძლია ზემოთ ჩამოთვლილი ყველა მასალის პოვნა.

მინდა, გაგიზიაროთ, წინასწარ დაგეგმვის გარეშე, როგორ შექმნეს ჩემმა მეთხეკლასელებმა, ერთი გაკვეთილის განმავლობაში,  პრეზენტაცია: ,,საქართველოს კუთხეები და ტრადიციები’’.

თავდაპირველად მათ გავაცანი ,,არატრადიციული’’ პრეზენტაციის შექმნის ინსტრუქცია (პროგრამა Padlet.com მათთვის უკვე ნაცნობი იყო) და ერთად შევიმუშავეთ წარდგენის კრიტერიუმები.

მოსწავლეები სურვილისამებრ განაწილდნენ წყვილებში, ,,შემთხვევითობის’’ პრინციპით აირჩიეს კუთხე, კედლის ფონად – საქართველოს რუკა  და დაიწყო ძიებისა და ფუსფუსის არაჩვეულებრივი წუთები. მათ უპრობლემოდ შეძლეს ტექსტის, აუდიო-, ვიდეო- და ფოტო მასალის მოძიება და კედელზე განთავსება.

მოსწავლეებმა შესრულებული დავალების პირველად ვარიანტს რედაქტირება გაუკეთეს, შექმნეს გაუმჯობესებული ვარიანტი და მომდევნო გაკვეთილზე ორიგინალურად წარმოაჩინეს შესაბამისი კუთხის ისტორია-ტრადიციები.

ერთი გაკვეთილის განმავლობაში შექმნილი ,,არატრადიციული’’ პრეზენტაციის საბოლოო სახე ასეთი გახლავთ:

ამ ტიპის პრეზენტაციის შექმნა შესაძლებელია, როგორც ჩვეულებრივ, საგაკვეთილო, ასევე – ონლაინსწავლების პროცესში.

კომპიუტერული ტექნოლოგიების ოთახში მოსწავლეები ინდივიდუალურად ან წყვილებში ასრულებენ დავალებას, ხოლო ონლაინსწავლების დროს – ეკრანის გაზიარებით, ინდივიდუალურად. შესაძლებელია ჯგუფურადაც, თუმცა ამ დროს სამი სხვადასხვა დაფის შექმნაა საჭირო.

ორივე შემთხვევაში მნიშვნელოვანი და აუცილებელია კიბერუსაფრთხოების ნორმების დაცვა. ამიტომ, უმჯობესია, როდესაც მოსწავლეებს მსგავსი ტიპის დავალებას ვაძლევთ, შევთავაზოთ ჩვენ მიერ წინასწარ შერჩეული სანდო და უსაფრთხო ბმულები, სადაც მოიძიებენ საჭირო ინფორმაციას.