მშობელი წარმატებული ბავშვის საწინდარი

დღევანდელ საზოგადოებაში ოჯახები ისე განსხვავდებიან ერთმანეთისაგან, როგორც ამ ოჯახების წევრები. მშობლები და ოჯახის სხვა წევრები  არიან ბავშვების პირველი მასწავლებლები, ისინი აძლევენ მაგალითს  პატარებს. მშობელთა მცირე ნაწილი უკითხავს შვილებს საინტერესო მოთხრობებს ,უყვება ზღაპრებს. მათი უმრავლესობა კი,  სკოლასა და მასწავლებელს აკისრებს  ბავშვისათვის წარმატების მომტანი გარემოს შექმნას, ზრდა- განვითარების ყველა სფეროში. ავიწყდებათ, რომ ,,მშობლები და მასწავლებელი ერთად მომუშავე პარტნიორებია”, რომლებიც ერთადვე იღვწიან ბავშვის მრავალმხრივი უნარების განვითარებისა და პიროვნებად ჩამოყალიბებისათვის.

როდესაც ჩემს პრაქტიკაში სწავლება-სწავლის ახალი მეთოდებისა და მიდგომების დანერგვა დავიწყე(2005 წლიდან), პირველი ნაბიჯი იყო მოსწავლეთა ნამუშევრების პორტფოლიოების შემოღება. კვირის ყოველ პარასკევს მშობლებს ვუგზავნიდი თავიანთი შვილების ნამუშევრებს, თან წერილსაც ვატანდი, რომლითაც ჩემთვის  პასუხი  უნდა მოეწერათ.

პასუხი მხოლოდ ორი მშობლისაგან მივიღე. ბავშვები შეწუხებულები მეუბნებოდნენ: დედიკომ ,ვერ წაიკითხა, არ ეცალა…’,  ,,წაიკითხა მაგრამ, ხვალ გაგატან პორტფოლიოს და პასუხსაცო..’’.  მე კი მოუთმენლად ველოდი მათ პასუხებს, რადგანაც მათი აზრების გათვალისწინება მინდოდა შემდეგი სამუშაოების შესრულებისას.

რისგან უნდა განთავისუფლდნენ მშობლები:
·უარყოფითი მოლოდინისაგან;
·გადაჭარბებული მოლოდინისაგან;
·სურვილისაგან შეაჯიბრონ ბავშვები ერთმანეთს;
·შეადარონ ბავშვები ერთმანეთს;
·ბავშვების პრობლემისადმი არასერიოზული და უდიერი დამოკიდებულებისაგან;

ამის შემდეგ გამიჩნდა იდეა ტრადიციული კრებების ნაცვლად ჩამეტარებინა სემინარები მშობელთა პედაგოგიზაციისათვის. იდეა და ტერმინიც, შეიძლება გასული საუკუნის იყო, მაგრამ მჯეროდა იმუშავებდა…საკლასო ოთახში მოვაწყვე მშობელთა კუთხე, სადაც განვათავსე სხვადასხვა საინტერესო მასალები მშობლისა და შვილის ურთიერთობის , მასწავლებლისა და მშობლის თანამშრომლობის შესახებ, საბავშვო ლიტერატურა, რომელიც საინტერესო იქნებოდა  პატარებისათვის.

თემებს ვარჩევ, სასწავლო პროცესში შექმნილი პრობლემებიდან გამომდინარე . სემინარებზე ვიყენებ დისკუსიასა და ჯგუფურ მუშაობას.

·შემუშავებული გაქვთ თუ არა ოჯახში ბავშვის ქცევის წესები?
·როგორ ეხმარებით შვილებს პრობლემის დაძლევაში?.
·ყველაზე მეტად რის კეთება გიყვართ  შვილთან ერთად?
·რა პრობლემას აწყდებით მასთან მუშაობისას?
·რომელი მოთხრობის ან ზღაპრის  წაკითხვას გთხოვს უფრო ხშირად?
·საუბრობთ  თუ არა წაკითხულის შესახებ. რა მოეწონა, რატომ? რა არ მოეწონა, რატომ?
·რა სახის მონაწილეობას ისურვებდით საკლასო ცხოვრებაში? და სხვა.

     ჯგუფებში აჯერებენ აზრებს და აკეთებენ დასკვნებს. მათთვის ვამზადებ  სამახსოვროებს.

ისინი არიან მრავალი საინტერესო ღონისძიებებისა და იდეების ავტორები, გაკვეთილზე ჩემი ასისტენტები, მონაწილეობენ კლასის გეგმის შედგენაში, საკლასო პროექტებში.

     პირველად რთული დარჩა ჩართულობის მიღწევა, შემდეგ თანდათან აეწყო. მათ დაინახეს, რომ სკოლა ის ადგილია , სადაც ისინი ერთად იმუშავებენ. მასწავლებელსა და მშობლებს შორის დამყარებული პოზიტიური ურთიერთობა დადებითად მოქმედებს ბავშვებზე, მაღლდება სწავლება-სწავლის ხარისხი.

მაია სირაძე

ჩოხატაურის  ნოდარ  დუმბაძის   სახელობის ჩაისუბნის საჯარო სკოლის დაწყებითი კლასის პედაგოგი.

       

კომენტარები

comments