ჩაატარო მოსწავლეებისთვის საინტერესო გაკვეთილი, დიდ ძალისხმევასთანაა დაკავშირებული. საშუალო საფეხურის მოსწავლეების (და არამხოლოდ) გაკვეთილებიდან კმაყოფილი გაშვება დღეს მასწავლებლის უმთავრეს მიზანს წარმოადგენს. ამიტომ, მასწავლებლები ვცდილობთ თავი მოვუყაროთ საუკეთესო რესურსებს, თანამედროვე შესაძლებლობებს და ამით დავაინტერესოთ ჩვენი მოსწავლეები.
მას შემდეგ, რაც ჟურნალის „მასწავლებელი“ ერთ-ერთი ავტორი ვარ რამდენიმე სტატია მოვამზადე, რომელიც სასწავლო პროცესში მობილური ტელეფონების ინტეგრირებას ეხებოდა (იხილეთ სტატიები: კიდევ ერთი საინტერესო ვებგვერდი მასწავლებლებისთვის და არამარტო, მოდი, დავიკარგოთ, ანუ ეკოლაშქრობა ბუნების წიაღში). აღარ განვავრცობ, თუ როგორი დამოკიდებულები არიან ჩვენი მოსწავლეები ტელეფონებზე, როგორი ხალისით ასრულებენ სამუშაოებს, რომლებიც ჭკვიან მოწყობილობებს აკავშირებს სწავლასთან, შემეცნებასთან.
ჩემი მომდევნო სტატია გაგაცნობთ პორტალს Actionbound, რომელიც საუკეთესოა ინტერაქციული გაკვეთილების დასაგეგმად. აპლიკაციაში მომზადებული მისიები შეიძლება შესრულდეს საკლასო ოთახში, სკოლის ტერიტორიაზე, ლაშქრობა/ექსკურსიების დროს, თუ სახლის პირობებში ჯგუფური ან და ინდივიდუალური სამუშაოების სახით. მისიების შესრულებისთვის დაგვჭირდება მობილური ტელეფონი ან სხვა ნებისმიერი მოწყობილობა, რომელიც დაკავშირებულია ინტერნეტთან.
პლატფორმაზე სტანდარტული რეგისტრაციის/ავტორიზაციის გავლის შემდეგ მომხმარებელს შეუძლია დაიწყოს მისიების მომზადება. მოსწავლეებმა მისიების შესასრულებლად უნდა გადმოტვირთონ აპლიკაცია მობილურ ტელეფონებში.
ვწერთ მისიის/ამოცანის დასახელებას შემდეგ, ჩვენვე ვქმნით სასურველ ბმულს (URL განყოფილებაში შეგიძლიათ ჩაწეროთ მისიის სათაური ლათინური ასოებით). ვირჩევთ თამაშის ტიპს. გვაქვს ორი არჩევანი ინდივიდუალური და ჯგუფური. ამ ველების შევსებისთანავე ვაკლიკებთ შექმენი (Create Bound).
რა ტიპის ამოცანების მომზადების საშუალებას იძლევა ვებ-გვერდი?
ინფორმაციის მიწოდება
გამხსნელ აქტივობად შეიძლება შევარჩიოთ ინფორმაციის მიწოდების განყოფილება. აქ შეიძლება მივაწოდოთ ინფორმაცია იმ თემაზე, რაზე გვინდა ვამუშაოთ, შევუქმნათ მოლოდინები თამაშის შესახებ, მივაწოდოთ დეტალური ინსტრუქცია და ა.შ.
ტესტები
ეს პლატფორმა სხვებისგან იმით განსხვავდება, რომ შესაძლებელია დახურულ დაბოლოებიანი შეკითხვების ჩაშენება.
ვაკლიკებთ განყოფილებას Quiz. შემდეგ ვაყალიბებთ კითხვას, ვირჩევთ ტიპს, მაგ: არჩევითი და შეგვყავს სავარაუდო პასუხები. ბოლოს უნდა მოვნიშნოთ სწორი პასუხი. მოსწავლეების წასახალისებლად შეგვიძლია კითხვებს მივანიჭოთ ქულები და ა.შ. ასევე, შესაძლებელია შემდეგი ვარიანტების არჩევა:
- ხელით ჩასაწერი პასუხი
- მიახლოებითი რიცხვი
- თანმიმდევრობით დალაგება
მნიშვნელოვანია, რომ კითხვების რაოდენობა არ არის შეზღუდული.
მისიები
პლატფორმის კიდევ ერთი გამოყენებადი და ღირებული სივრცეა მისიების განყოფილება. აქ ჩვენ ვქმნით დავალებებს/მისიებს, რომლებზეც პასუხი შეიძლება გაიცეს წერილობით, ფოტოს/კოლაჟის სახით, ვიდეო ფორმატით (გაითვალისწინეთ, რომ მაქსიმუმ 30 წამიანი ქრონომეტრაჟის ვიდეოს ატვირთვაა შესაძლებელი) და ხმოვანი შეტყობინების სახით.
მაგალითად, თუ თქვენი მიზანია, რომ მოსწავლეებმა დასმულ შეკითხვას უპასუხონ სამუშაო რვეულებში, შეგიძლიათ აირჩიოთ ფოტო ფორმატი, და სთხოვოთ რომ რვეულში დაწერილ პასუხს გადაუღონ სურათი და ატვირთონ შესაბამის ველში.
შეიძლება თქვენ შექმნათ მისია, სადაც მოსწავლეებს სთხოვთ, რომ გადაიღონ ვიდეო მათ ქუჩაზე არსებულ პრობლემებზე საინფორმაციო ვიდეო. ამისთვის 30 წამი არ იქნება საკმარისი. ამიტომ ინსტრუქციაში მკაფიოდ ჩაწერეთ შემდეგი: გადაიღეთ საინფორმაციო ვიდეო, სადაც ისაუბრებთ თქვენ თემში/ქუჩაზე არსებულ პრობლემებზე. დამონტაჟებული ვიდეო ატვირთეთ www.wetransfer.com-ზე და შესაბამის ველში ჩააკოპირეთ მხოლოდ ბმული.
პლატფორმა საუკეთესოა სხვადასხვა ადგილის მოსანიშნად. თქვენ შეგიძლიათ მიაწოდოთ GPS კოორდინატი და სთხოვოთ მოსწავლეებს იპოვონ ეს ადგილი, გადაუღონ ფოტო და ატვირთონ.
აქვე შესაძლებელია გამოკითხვის ჩატარებაც.
სახლიდან სკოლამდე და უკან…
სწორედ ამ სახელით შევქმენი პლატფორმაზე მისები მე-7 კლასელებისთვის. მას შემდეგ, რაც დავიწყეთ საკუთარი საცხოვრებელი არეალის/თემის შესწავლა, ჩამოვაყალიბე მისიები და გავუზიარე მოსწავლეებს. მათ მოეთხოვებოდათ:
- ურბანული პრობლემების გამოკვეთა;
- საკუთარ ქალაქში/სოფელში არსებული მწვანე სივრცეების იდენტიფიცირება;
- ქუჩის ხელოვნების ნიმუშების დაფიქსირება;
- საკუთარი მარშრუტის აღწერა წერილობითი ფორმით და ა.შ.
აღნიშნული აქტივობის ნახვა შესაძლებელია ბმულზე: https://en.actionbound.com/bound/sakhlidan-skolamde
Actionbound მეხმარება მოსწავლეების მოტივაციისა და ჩართულობის ზრდაში. პლატფორმა განსაკუთრებით სასარგებლოა იმ კლასებში, სადაც აქვთ კონცენტრაციის პრობლემა. მოქალაქეობისა და გეოგრაფიის სახელმძღვანელოდან გადამაქვს აქტივობები, ვქმნი ახალ სავარჯიშოებს, რომელთაც ვასრულებთ საკლასო ოთახში. ამით ვასწავლი წიგნთან ურთიერთობასა და პარალელურად ვუბიძგებ სწავლისკენ.
დამხმარე რესურსი:
ვებ-გვერდის გამოყენების დეტალური ინსტრუქციები იხილეთ Beginner’s course – Actionbound Basics
