სკოლა ცოცხალი ორგანიზმია, რომელიც მუდმივ განვითარებას და წინსვლას მოითხოვს. მასწავლებლის არსი კი სრულფასოვანი ადამიანის აღზრდაა, რომელიც მორალურ პასუხისმგებლობას გრძნობს საზოგადოების წინაშე.
ყოველი საგაკვეთილო პროცესი ინფორმაციის გადაცემის გარდა ბავშვის შინაგანი სამყაროს გამდიდრებასაც უნდა ემსახურებოდეს, მაგრამ რაც არ უნდა კარგად დაგეგმილი და ორგანიზებული იყოს სასწავლო პროცესი, შეუძლებელი იქნება მიზნის მიღწევა, თუ კლასში დისციპლინარული პრობლემებია. არასასურევლი ქცევის მქონე მოსწავლეს შეუძლია მთლიანად ჩამოშალოს ის ხარაჩო, რომელზედაც მასწავლებელმა გაკვეთილი ააგო. ყველა კლასში მოიძებნება მინიმუმ ერთი მოსწავლე, რომელიც ხშირად ხელს უშლის გაკვეთილის მსვლელობას სხვადასხვა სახით და მასწავლებელიც მას ხშირად აძლევს სიტყვიერ გაფრთხილებას. კლასის წინაშე მიუთითებს არასასურველ ქცევაზე და ახდენს სადამსჯელო ღონისძიების გატარებას. ზემოაღნიშნული ქმედება ხშირად იწვევს მოსწავლეში არასასურველი ქცევის დასწავლას და განმტკიცებას.
დაწყებით კლასში მასწავლებელს დასჯის ნაცვლად უამრავი სახალისო მეთოდის გამოყენება შეუძლია, რომელიც მოსწავლეს დაასწავლის დადებით ქცევას და განუმტკიცებს მას. ერთ-ერთი წამახალისებელი აქტივობა, რომლის მოსწავლეებთან გამოყენებაც დადებით შედეგს მოგვცემს არის: „ჩემი სიკეთის მარცვლები“, რომლისთვისაც ერთი პატარა ქილა, ცოტაოდენი ფერადი მარცვლები და კედელზე გაკრული ბარათების ფურცელია საჭირო, რომლებშიც ბავშვები ფერად მარცვლებს დააგროვებენ.
სასურველი შედეგის მისაღწევად საჭიროა რამდენიმე საფეხურის გავლა:
- კლასში ბავშვები თავად ადგენენ ქცევის წესებს,რომელსაც შეთავაზებენ მასწავლებელს. მასწავლებელი აღნიშნულ წესებს ჩამოწერს დაფაზე და ბავშვებთან ერთად მოახდენს ამ წესების გაფილტვრას . საბოლოოდ ტოვებენ 5-6 მნიშვნელოვან წესს,რომელსაც მასწავლებელი გამოაკრავს კლასში, თვალსაჩინო ადგილას.
- მეორე ეტაპზე კლასში გაიმართება დისკუსია, რომლის მიზანიც მათ მიერ შერჩეული წესების მნიშვნელობაზე საუბარია. წესები უნდა იყოს პოზიტიური სახის და მოსწავლეს დადებითად უნდა განაწყობდეს. ვართ მეგობრულები! ვიცავთ ერთმანეთს ბულინგისგან! პატივს ვცემთ სხვის აზრს და სხვა…
- მასწავლებელი მოსწავლეებს გააცნობს, რატომ მოიტანა კლასში ქილა ფერადი მარცვლებით და აუხსნის რას ნიშნავს:“ჩემი სიკეთის მარცვალი“
მასწავლებელი თვალსაჩინო ადგილას დებს ქილით ფერად მარცვლებს და ბავშვებს უხსნის, რომ ერთი ფერადი მარცვალი აღნიშნავს სიკეთის მარცვალს, რომელსაც მიიღებენ ისინი მათ მიერ დაწესებული წესების შესრულების შემთხვევაში.
- სასურველი ქცევის გამოვლენისას მასწავლებელი მოსწავლეს აძლევს ერთ მარცვალს. მოსწავლე კი მას ათავსებს კედელზე განთავსებულ ბარათში, რომელზეც მისი სახელია მითითებული. ქილა გამჭირვალე უნდა იყოს, რათა მოსწავლეები დააკვირდნენ მარცვლების შემცირებას. მათთვის ეს ძალიან სახალისო პროცესია. ქილიდან ბოლო ფერადი მარცვლის გაცემის შემდეგ მოსწავლეებთან ერთად მასწავლებელი ითვლის თითოეულის მიერ დაგროვებული მარცვლების რაოდენობას და გამოავლენს გამარჯვებულს.
- ყველაზე მეტი ფერადი მარცვლის მფლობელს მასწავლებელი უსრულებს ერთ სურვილს, მაგრამ სურვილი უნდა იყოს ისეთი, რომ სიკეთის კეთებას ემსახურებოდეს მთელი კლასისთვის. მაგალითად, ყველა ბავშვი გავიდეს ეზოში სათამაშოდ, ერთად უყურონ სასურველ ფილმს და სხვა.
მეთოდი ეფექტურია და მოსწავლის არასასურველი ქცევის კორექციის გარდა სიკეთის სწავლაშიც ეხმარება. მოსწავლეები, რომლებიც ნაკლები რაოდენობის მარცვალს იღებენ მათაც იციან, რომ თავიანთი წვლილი შეიტანეს ამ საქმეში, მათი დახმარებით მალე გამოილია ქილაში ფერადი მარცვლები და გამარჯვებულმა მოსწავლემ შეძლო ყველა თანაკლასელის გახარება. მეთოდი არ იწვევს არაჯანსაღ კონკურენციას, პირიქით მათ უხარიათ, როდესაც ვიღაც იღებს მარცვალს, რადგან იციან, საბოლოოდ მათი სიკეთის მარცვალები ერთ დიდ სიკეთედ გადაიქცევა და ყველა ბავშვს გაახარებს.
