ოთხშაბათი, ნოემბერი 30, 2022
30 ნოემბერი, ოთხშაბათი, 2022

გლობალური გარიგება და „ერთი დედამიწა“

ტერმინი „ერთი დედამიწა“ პირველად გაისმა სტოკჰოლმის კონფერენციაზე 1972 წელს, როდესაც ბარბარა უორდმა (ინგლისელი მწერალი, ეკონომისტი) და რენე დუბომ (ამერიკელი მიკრობიოლოგი, გარემოს დამცველი) საგანგებოდ ამ კონფერენციისთვის დაწერეს ნაშრომი „მხოლოდ ერთი დედამიწა“.

გარემოს დაცვის დღე პირველად 1973 წლის 5 ივნისს აღინიშნა და მისი თემა იყო „მხოლოდ ერთი დედამიწა“.

One Earth-ის ქსელის ინტერნეტგვერდზე უამრავ საინტერესო მასალას იპოვით.

 

„ერთი დედამიწა“ (One Earth) ფილანტროპიული ორგანიზაციაა, რომლის მიზანია მოქმედებათა დაჩქარება, რათა ხელი შეეშალოს გლობალური საშუალო ტემპერატურის აწევას. კლიმატის კრიზისის დასაძლევად გადაწყვეტილებები უკვე არსებობს, უახლესი კვლევები გვიჩვენებს, რომ შეგვიძლია, ტემპერატურის მატება 1.5°C-ის ფარგლებში შევინარჩუნოთ. ამისთვის საჭიროა სამი რამ: 2050 წლისთვის მთლიანად განახლებად ენერგიაზე გადასვლა, მსოფლიოს მიწებისა და ოკეანეების ნახევრის დაცვა-აღდგენა და რეგენერაციულ, კლიმატისადმი მდგრად სოფლის მეურნეობაზე გადასვლა. ამ მიზნების მისაღწევად ცივილიზებულმა სამყარომ სწრაფად უნდა გააფართოოს ფილანტროპიული საქმიანობა, რათა ამოივსოს დაფინანსებაში არსებული კრიტიკული ხარვეზები მომავალი ათწლეულის განმავლობაში.

One Earth-ს სჯერა, რომ კლიმატის კრიზისის დაძლევა შესაძლებელია, რომ ეს შეცვლის სამყაროს და მეცნიერებას ბიომრავალფეროვნების დაკარგვისა და კლიმატის ცვლილების ორმაგი კრიზისის დაძლევის საშუალებად აქცევს. ორგანიზაციას ოპტიმიზმის საფუძველს აძლევს ინოვაციური მეცნიერება, კლიმატის ფილანტროპიის პოტენციალი და საზოგადოების მიერ მართულ ქმედებათა ძალა. One Earth-ს აქვს პროგრამები სამი მიმართულებით. ესენია მეცნიერება, ფილანტროპია და კომუნიკაციები, რომლებიც შეთანხმებულად მუშაობენ კლიმატის კრიზისის დასაძლევად. მეცნიერების პროგრამა საფუძველს უყრის მომავლის ხედვას, რომელიც მიღწევადია. ფილანტროპიის პროგრამა მუშაობს რესურსების პრიორიტეტულ რეგიონებსა და პროექტებზე გასანაწილებლად, კომუნიკაციების პროგრამა აყალიბებს ახალ ნარატივს, რომელიც ფოკუსირებულია კლიმატის კრიზისის დაძლევის გადაწყვეტილებებზე, მაღალპრიორიტეტული პროექტების მარკეტინგზე ფართო აუდიტორიისთვის.

კლიმატის კრიზისის პრობლემის გადაჭრის ეფექტური გზები უკვე არსებობს. One Earth-მა დააფინანსა ინოვაციური კვლევითი პროექტები სახელწოდებით „პარიზის კლიმატის შეთანხმების მიზნების მიღწევები“ (Teske et al. 2019) გლობალური საშუალო ტემპერატურის ზრდის 1,5 გრადუსამდე შეზღუდვისთვის.

სიდნეის ტექნოლოგიური უნივერსიტეტის (UTS), გერმანიის საჰაერო კოსმოსური ცენტრის (DLR) ორი ინსტიტუტისა და მელბურნის უნივერსიტეტის კლიმატისა და ენერგიის კოლეჯის 17 წამყვან მეცნიერთან ორწლიანი თანამშრომლობა 500-გვერდიანი წიგნის გამოცემით დაგვირგვინდა.

One Earth მუშაობს მეცნიერებისა და ტექნოლოგიების მხარდაჭერით, რომელიც ორიენტირებულია სამი რთული, ურთიერთდაკავშირებული პრობლემის – კლიმატის ცვლილების, ბიომრავალფეროვნების დაკარგვისა და სურსათის უსაფრთხოების – გადაჭრაზე. ამაში ერთიანდება:

  • ენერგიის გადასვლები – რეგიონული დეკარბონიზაციის გზები ენერგეტიკის სექტორებისთვის;
  • გლობალური უსაფრთხოების ქსელი – რეგიონული და გლობალური მონაცემთა ბაზები ბუნებრივი მიწების დაცვისა და აღდგენისთვის;
  • 10 მილიარდის კვება – გლობალური კვების სისტემების მოწინავე სიმულაცია 1.5°C-იანი დათბობის პირობებში მდგრადი კვების უზრუნველსაყოფად.

მეცნიერებას შეუძლია განსაზღვროს, როგორ შეიძლება განაწილდეს კაპიტალი – რა მოხდეს, სად მოხდეს და როდის. ის გვაძლევს სიცხადეს და თავდაჯერებას, ჩავდოთ ინვესტიცია გადაწყვეტილებებში, რომლებიც ეფექტურია და მეცნიერების მოქმედებად ქცევაში გვეხმარება.

მთელ მსოფლიოში მილიონობით ადამიანი მუშაობს საზოგადოებებსა და ორგანიზაციებში კლიმატის კრიზისის მოსაგვარებლად. ისინი სუფთა, განახლებადი ენერგიით უზრუნველყოფენ თავიანთ თემებს, იცავენ და აღადგენენ ბუნებრივ ეკოსისტემებს და ფერმები რეგენერაციულ სასოფლო-სამეურნეო პრაქტიკაზე გადაჰყავთ. ისინი ყველაფერს აკეთებენ შეზღუდული რესურსებით, ზოგჯერ ერთი შეხედვით შეუძლებელსაც ახერხებენ. ამ ლიდერებს დღეს მხარდაჭერა სჭირდებათ.

კლიმატის კრიზისის გადასაჭრელად და სასურველი მომავლის ასაშენებლად ჩვენ რადიკალურად უნდა გავაფართოოთ კლიმატის ფილანტროპია, რათა ეს ძალისხმევა მიზნობრივად დაიხარჯოს ადგილებზე. One Earth-ის მისიაა მნიშვნელოვანი ფილანტროპიული კაპიტალის მობილიზება – შეძლებული ოჯახებისგან, კომპანიებისა და ჩვეულებრივი მოქალაქეებისგან – საჭირო რესურსების სასწრაფოდ მისაწოდებლად ლიდერებისთვის, ორგანიზაციებისა და თემებისთვის, რომლებიც დღეს კლიმატის კრიზისის საწინააღმდეგოდ მოქმედებენ. ამ მიზნით დედამიწის მოწოდების ფონდმა და One Earth-მა ძალისხმევა გააერთიანეს. საერთო მისიამ და ღირებულებებმა გამოიწვია უწყვეტი თანამშრომლობა კლიმატის კრიზისის სწრაფად მოსაგვარებლად.

2020 წელს One Earth-მა წამოიწყო პროექტი Marketplace-ი, რომელიც წარმოადგენს იმ შემოწმებული პროექტების პირველ ონლაინ მონაცემთა ბაზას, რომლებიც ამჟამად ეძებენ დაფინანსების წყაროს. პროექტები ორგანიზებულია ბიოგეოგრაფიული ჩარჩოს ფარგლებში, რომელიც სამი ძირითადი გზით – ენერგიის გადასვლა, ბუნების დაცვა, რეგენერაციული სოფლის მეურნეობა – აკავშირებს კაპიტალს ცვლილებებთან.

კომუნიკაციები: კლიმატის ნარატივის დაბრუნება

კლიმატური ნიჰილიზმი, სამწუხაროდ, გადამდები გახდა, განსაკუთრებით ახალგაზრდებში. კვლევების თანახმად, თუმცაღა ადამიანების უმეტესობას ესმის, რომ კლიმატი იცვლება, ბევრს მიაჩნია, რომ ყველაზე უარესი სცენარია მოსალოდნელი, ზოგი კი მიიჩნევს, რომ უკვე გვიანია. რამდენიმე წლის წინ „კლიმატის უარმყოფელნი“ უშლიდნენ ხელს პროგრესს, მაგრამ დღეს კლიმატის ცვლილების პრობლემის მოგვარებას ყველაზე დიდ საფრთხეს უიმედობის განცდა უქმნის. ჩვენ უნდა ვიცოდეთ, რომ 1.5°C-ის შენარჩუნება შესაძლებელია, თუ ერთად, ფოკუსირებულად და მიზანმიმართულად  ვიმოქმედებთ.

One Earth მუშაობს ცნობიერების ასამაღლებლად გლობალური საშუალო ტემპერატურის აწევის 1.5°C-მდე შეზღუდვის აუცილებლობის და იმის შესახებ, რა უნდა გაკეთდეს ამ მიზნის მისაღწევად, რისთვისაც ის სამ ძირითად აუდიტორიაზე ფოკუსირდება. One Earth წარადგენს საზოგადოების მიერ მართულ პროექტებს, რათა მiიზიდოს ინვესტიციები მოწინავე გადაწყვეტილებებისთვის მთელ მსოფლიოში. One Earth ატარებს ბრიფინგებს დაინტერესებული მხარეებისა და გადაწყვეტილების მიმღები პირების ინფორმირებისთვის, რომლებიც მხარს უჭერენ ძირითადი პოლიტიკის ცვლილებებს.

One Earth იყენებს სოციალურ მედიას ოპტიმისტური ცვლილებების, სამართლიანი და ძლიერი მომავლის შესაქმნელად.

 

გამოყენებული ინტერნეტგვერდები:

https://www.globalsafetynet.app/ https://www.oneearth.org/navigator/

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი