„რაც უფრო მეტია მეცნიერება კრიმინალისტიკაში, მით უფრო მეტად აღესრულება სამართლიანობა“, – ეს სიტყვები ფრანგ კრიმინოლოგს ედმონ ლოკარს (Edmond Locard) ეკუთვნის.
კრიმინალისტიკის განვითარებას ხელი შეუწყო ბიოლოგიისა და ქიმიის კვლევის ახალი მეთოდების შექმნამ და ძველის გაუმჯობესებამ.
ჩვენი მოსწავლეების პირველი კითხვა, როცა ისინი ახალი საგნის სწავლას იწყებენ, არის „რაში გამომადგება?“. ეს წერილი კრიმინალისტიკითა და არქეოლოგიით დაინტერესებულ მოსწავლეებს ბიოლოგიის შესწავლის მნიშვნელობაში დაარწმუნებს, მასწავლებელს კი მათთვის მოტივაციის ამაღლებაში დაეხმარება. დავალების შესრულებისას მოსწავლე არის მკვლევარი, მონაცემების შემგროვებელი.
რესურსის გამოყენება შესაძლებელია მერვე და მეთერთმეტე კლასებში, მაგრამ რადგან საშუალო საფეხურზე მოსწავლეები ემოციურად უფრო გაწონასწორებულები არიან, მე მისი გამოყენება მეთერთმეტეკლასელებთან ვარჩიე. სსსმ მოსწავლე ჩართული იყო ჩონჩხის ნაწილების ერთმანეთთან დაკავშირებაში. დავალების ადაპტირება არ დამჭირვებია, პერსონაჟების სახელებიც უცვლელად დავტოვე.
ქეისზე მუშაობა იწყება მასწავლებლის მცირე მიმოხილვით კრიმინალისტიკის შესახებ. მოსწავლეები გამოთქვამენ მოსაზრებას იმის თაობაზე, რაში შეიძლება იყენებდეს კრიმინალისტი ბიოლოგიას. კრიმინალისტების გარდა, ასე მუშაობენ პალეონტოლოგები, არქეოლოგები.
მასწავლებელი ჯგუფებად ყოფს კლასს. თუ დრო საკმარისია, ყველა ჯგუფი (ოთხი ჯგუფი) მუშაობს მთლიან დავალებაზე. ერთ-ერთი მნიშვნელოვანი ასპექტია, მოსწავლეებს შევახსენოთ, რომ ისტორია არ აღწერს რეალობას, პერსონაჟებიც მოგონილია, თუმცა კრიმინალისტები რეალურ სიტუაციაშიც ასე მუშაობენ.
როცა ამ დავალებაზე ვმუშაობდით, ერთ-ერთმა უნივერსიტეტმა გვიმასპინძლა კრიმინალისტიკის ლაბორატორიაში და ეს კიდევ ერთი მნიშვნელოვანი მოტივატორი აღმოჩნდა მოსწავლეებისთვის.
ვრცლად
