ოლიმპიური სიმშვიდის დროა! – ერთი გაკვეთილის ამბავი

კლასში ხმაურია, ქაოსი. ბავშვები დაიღალნენ, აღარ უნდათ რუტინული გაკვეთილი. ვთხოვთ, მოწესრიგდნენ. უხალისოდ ემზადებიან. შენ კი სწორედ ამ დროს ხმამაღლა ეუბნები:

– ერთი წუთით დახუჭეთ თვალები და წარმოიდგინეთ: ზღვის პირას, ქვიშიან სანაპიროზე, მარტოდმარტო ზიხართ და ჩამავალ მზეს გასცქერით. საოცრად მშვიდად ხართ, არაფერი გაღელვებთ, არც ნაპირისკენ მომავალი უზარმაზარი ტალღა, არც მოულოდნელი ჩამობნელება. შეიძლება ითქვას, რომ ოლიმპურ სიმშვიდეს ინარჩუნებთ.

ბავშვები გემორჩილებიან. უყვართ ასეთი ამბები. თვალებსაც ხუჭავენ, მოგყვებიან, წარმოსახვით მზეს ეფიცხებიან, მაგრამ უცებ ელვის სისწრაფით გაყრიან კითხვებს: რა არის ოლიმპიური სიმშვიდე?

შენ მშვიდად აგრძელებ:

– გამოთქმა „ოლიმპიური სიმშვიდე“ უკავშირდება ოლიმპოს მთას,  ძველი საბერძნეთის ღმერთების სამყოფელს, სადაც მუდამ ღვთაებრივი სიმშვიდეა. ბერძენი მწერლის ჰომეროსის პოემის – „ოდისეის“ თანახმად, „ოლიმპოს სიმშვიდეს ქარები არ არღვევენ, იქ არ წვიმს და არ თოვს, ჰაერი კი საოცრად წმინდა და უღრუბლოა“.

ოლიმპოზე მარადიული გაზაფხულია, ღმერთები ნადიმობენ, წვეულებებს მართავენ, თან ადამიანების ბედსა და იღბალს განაგებენ.

ძველ ბერძნებს ღმერთების სავანედ მაღალი, ტყიანი, მრავალმწვერვალიანი მთა მიაჩნდათ. იქ ღმერთები გასაოცარ, ადამიანის გონებისთვის წარმოუდგენელ, მშვენიერ სასახლეებში ცხოვრობდნენ. ზევსს ოქროს სასახლე ჰქონდა, სხვებს – ვერცხლისა და სპილენძისა. ისინი მჭედლობისა და ცეცხლის ღვთაება ჰეფესტომ შექმნა.

ოლიმპიელთა პანთეონში 16 მთავარი ღმერთია: ზევსი – ცის, ელვისა და ქუხილის ღმერთი, ჰერა – ქორწინებისა და მშობიარობის ქალღმერთი, პოსეიდონი – ზღვის ღმერთი, დემეტრა – ნაყოფიერებისა და მიწათმოქმედების ქალღმერთი, აპოლონი – მზისა და სინათლის ღმერთი, არტემიდა – მთვარისა და ნადირობის ქალღმერთი, არესი – ომის მრისხანე ღმერთი, აფროდიტე – სილამაზისა და სიყვარულის ქალღმერთი, ჰერმესი – ღმერთების მაცნე, ათენა – სამართლიანობის ღვთაება, ჰეფესტო – ცეცხლისა და მჭედლობის ღვთაება, ჰადესი – მიწისქვეშა სამყაროს ღმერთი, და სხვები.

რა გასაკვირია, რომ ამ ზებუნებრივი ძალებით დაჯილდოებულ არსებათა სამყოფელში ენით გამოუთქმელი, ოლიმპიური სიმშვიდე სუფევდა.

ჩვენ, მოკვდავებს, კი ისღა დაგვრჩენია, ადამიანურ სიმშვიდეს ოლიმპიური ვუწოდოთ და ცოტა ხნით მაინც თავი ოლიმპიელების სტუმრად წარმოვიდგინოთ.

თუ ილუსტრაციებსაც ვაჩვენებთ, შთაბეჭდილებები კიდევ უფრო მძაფრი იქნება.

გვაინტერესებს, როგორ გაიაზრეს ტექსტი და სახელდახელოდ ვავსებინებთ მარტივ კითხვარს:

* ოლიმპიელი ღმერთების სახელებს მიუწერე, რას მფარველობენ და განაგებენ:

ზევსი –

ჰერა –

პოსეიდონი –

დემეტრა –

აპოლონი –

არტემიდა –

არესი –

ჰერმესი –

ათენა –

ჰეფესტო –

ჰადესი –

ამას უფრო საინტერესო დავალება მოჰყვება:

* გააგრძელე ჰომეროსის სიტყვები და აღწერე, როგორი წარმოგიდგენია ოლიმპიელი ღმერთების სამფლობელო, მოიფიქრე თხზულების სათაური, შეგიძლია, დაასურათო კიდეც.

და კიდევ უფრო საინტერესო:

* წარმოიდგინე, რომ ოლიმპოს მთაზე ღმერთებს ესტუმრე, ნადიმზეც მიგიწვიეს. დახატე შენი სტუმრობის ამსახველი ოთხი ილუსტრაცია.

ცოტა ეპითეტებით და მეტაფორებითაც ვითამაშოთ:

* ტექსტში ხატოვნად არის აღწერილი ოლიმპოს მთა: მრავალმწვერვალიანი, სასახლე – წარმოუდგენლად მშვენიერი. შეეცადე, ასევე ხატოვნად აღწერო სხვა ცნებებიც, მაგალითად: მზე – ცის ოქროს გვირგვინი, სინათლის სკივრი, მბრწყინავი ბურთი და ა.შ. თითოეულს, სულ ცოტა, სამი ეპითეტი მოარგე.

მთა –

სასახლე –

მზე –

ზღვა –

ტალღა –

ქარი –

წვიმა –

ნადიმი –

გაზაფხული –

ცა –

სავანე –

გაკვეთილი კი დიდი პრეზენტაციით დავაგვირგვინოთ, ისეთით, როგორიც ოლიმპოელებს შეეფერებათ, მივიღოთ მოსავალი, დავტკბეთ მოსწავლეთა შემოქმედებით და მხოლოდ ამის შემდეგ მივცეთ თავს უფლება, დაგვეუფლოს მისტიკური და დიდებული ოლიმპიური სიმშვიდე.