პარასკევი, მარტი 29, 2024
29 მარტი, პარასკევი, 2024

 აქტივობები ქცევის წესების შემუშავებისა და განვლილი მასალის რეფლექსიისთვის

ყოველ სასწავლო წელს მასწავლებლები ახალი შემართებითა და გაორმაგებული ენერგიით ვაგრძელებთ მუშაობას. ხშირად ჩვენი დაწყებული საქმის გაგრძელება გვიწევს, ზოგ შემთხვევაში კი ახალ კლასებში ვიწყებთ სწავლებას.

სასწავლო წლის დასაწყისში მნიშვნელოვანია ქცევის წესების შემუშავება. დაკვირვების შედეგად შესამჩნევი გახდა, რომ მოსწავლეების მიერ ნაკარნახევი წესები მალე ეძლევა დავიწყებას. ამიტომ გადავწყვიტე განსხვავებული მიდგომის გამოყენებითა და მოსწავლეების აქტიური ჩართულობით წარმემართა პროცესი.

დიდი ზომის ქაღალდზე წინასწარ მოვამზადე ოთხი დებულება:

  • დაასრულეთ წინადადება – ვთანხმდებით, რომ…;
  • ჩვენ ველოდებით, რომ ვისწავლით;
  • გვსურს, რომ თავიდან ავიცილოთ;
  • ჩვენი რეკომენდაცია მასწავლებელს.

საკლასო ოთახში მოვაწყვე ოთხი „გაჩერება“, რის შემდეგაც მოსწავლეები დავყავი ოთხ ჯგუფად. თითოეული ჯგუფი ერთ გაჩერებაზე 5 წუთს ატარებდა, რა დროსაც ისინი მსჯელობდნენ დებულებებზე და აფიქსირებდნენ საკუთარ მოსაზრებებს. თუ მათი მოსაზრება უკვე დაფიქსირებული იყო, ისინი სხვა მიმართულებით აგრძელებდნენ ფიქრს.

დაახლოებით ოცი წუთის შემდეგ პროცესი დასრულდა. ჯგუფებმა პრეზენტაციების სახით წარმოადგინეს დაფიქსირებული პასუხები, რის შემდეგაც დავიწყეთ დისკუსია. მთლიან კლასს მივმართე კითხვებით:

    • რა აღმოჩენები გააკეთეს პროცესში?
    • რა მოეწონათ აქტივობაში?
    • რატომ არის მნიშვნელოვანი საკლასო წესების შემუშავება მათი ჩართულობით?
    • რამეს ხომ არ დაამატებდით ან შეცვლიდით დაფიქსირებულ პასუხებში?

მოსწავლეებს თავისუფალი აზროვნების არეალი უფართოვდებათ. ისინი გრძნობენ, რომ შეუძლიათ მოსაზრებების დაფიქსირება შეზღუდვების გარეშე. ბევრ საინტერესო რეკომენდაციას, სურვილსა თუ მოლოდინს აღმოაჩენთ.

ამავდროულად, ეს არის ერთგვარი შეთანხმება მასწავლებელსა და მთელ კლასს შორის. რეკომენდაციებისა და მოლოდინების განყოფილებაზე მეტწილად მასწავლებელია პასუხისმგებელი, შეთანხმების ნაწილზე – მოსწავლეები, ხოლო სურვილები ზოგადია და შეიძლება სცდებოდეს კონკრეტული მასწავლებლის მოვალეობებს.

საკუთარ პრაქტიკაზე დაკვირვების შედეგად მრავალი საგულისხმო ფაქტის გამოვლენაა შესაძლებელი. საგან „მოქალაქეობის“ სწავლება მე-7 კლასიდან იწყება. სწორედ ამ პერიოდში გვიწევს ჩვენთვის უცნობ მოსწავლეებთან შეხვედრა. სწორედ პრაქტიკაზე დაკვირვების შედეგად აღმოვაჩინე, რომ მოსწავლეთა გაცნობა, მზაობის, შესაძლებლობებისა და წინარე ცოდნის დადგენა ძალიან მნიშვნელოვანია. ამიტომ პირველ ორ კვირას (დაახლოებით ოთხ აკადემიურ საათს) მოსწავლეთა უკეთ გაცნობას ვუთმობ.

აქტივობა – „ბარათები მეშვიდეკლასელებს“ „მოქალაქეობის“ გაკვეთილზე გამოვიყენე. სკოლის დაწყებამდე თავი მოვუყარე იმ საკითხებს, ტერმინებსა და მნიშვნელოვან ცნებებს, რომლებიც მე-7 კლასის სტანდარტითაა განსაზღვრული და განხილულია სახელმძღვანელოებში.

ბავშვის უფლებები დემოკრატია დისკრიმინაცია ტოლერანტობა თემი
მოსწავლეთა თვითმმართველობა განსხვავებული აზრი შშმ პირი გენდერი უსაფრთხო სკოლა
პარლამენტი კანონმორჩილი მოქალაქე არგუმენტირებული მსჯელობა სამართალი დაუწერელი კანონები
ბრაკონიერობა ეროვნული ბანკი პროექტი პროტესტი ფული
ბიუჯეტი კულტურული მემკვიდრეობა გენდერული თანასწორობა ვანდალიზმი საიდან მოდის ფული
ფინანსური ბაზარი ეკონომიკა კონსტიტუცია აქტივიზმი ბუნების დაბინძურების წყაროები
ჰაერის დაბინძურება ეკოლოგია ბუნებრივი რესურსები მდგრადი განვითარება ადიქცია
ბულინგი კიბერბულინგი კიბერ ჰიგიენა ადრეული ქორწინება მავნე ჩვევები
კვების რაციონი ჯანსაღი კვება არასრულწლოვანთა დანაშაული მრავალფეროვნება ლიდერობა
ბარტერული გაცვლა კონფლიქტი კონფლიქტის გადაჭრის გზები საგზაო უსაფრთხოება მოხალისეობა

 

შემდეგ ეტაპზე დავყავი კლასი ოთხ ჯგუფად, დავურიგე მათ ბარათები და ვთხოვე გაენაწილებინათ ისინი ოთხი დებულების მიხედვით.

ბარათები სურვილისამებრ შეგიძლიათ დაურიგოთ ინდივიდუალურად, ამუშაოთ წყვილებში ან ჯგუფურად. მე ჯგუფური სამუშაო ვამჯობინე და გაამართლა. ჯგუფებში ხშირად იყო განსხვავებული მოსაზრებები, ზოგიერთმა იცოდა კონკრეტული ტერმინი და ცდილობდა განემარტა სხვებისთვის.

აქტივობა იმდენად საინტერესო გამოვიდა, რომ მე-8 კლასელებსაც შევთავაზე იმის დასადგენად, თუ რა ახსოვდათ გასული სასწავლო წლიდან.

სწავლის დაწყებიდან საკმაო დრო გავიდა და შედეგები თანდათან თვალსაჩინო ხდება – თუ ვინმე არღვევს დადგენილ წესს, ერთმანეთს უთითებენ და ახსენებენ, რომ შეთანხმდნენ ამ წესების დაცვაზე.

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი