ნივთები – რეკვიზიტები ჩვენი გაკვეთილებისთვის

ნივთები, რომლებიც გარს გვახვევია, ჩვენი შთაგონების
წყაროა.

ასეა ნებისმიერი შემოქმედებითი პროცესის შემთხვევაში
და, რასაკვირველია, გაკვეთილების დაგეგმვის დროსაც. ითამაშეთ ნივთებით, გაერთეთ და
ისიამოვნეთ თქვენი გაკვეთილებით. ასე თქვენც მშვიდად და ბედნიერად იგრძნობთ თავს, გაკვეთილიც
შედეგიანი იქნება, უკუკავშირიც – შთამბეჭდავი.

როგორ?

როგორ და აი, ასე, მომყევით!

 

1. კალენდარი

უბრალო ნივთი არ გეგონოთ – ის ხომ ყველაზე მოწესრიგებული
და სისტემური მეგობარია. გარდა იმისა, რომ კალენდარს წარმოშობის საინტერესო ისტორია
აქვს, ის მშვენივრად შეიძლება გამოვიყენოთ ნებისმიერ გაკვეთილზე როგორც ობიექტი, რეკვიზიტი.

მაგალითად, ლიტერატურის გაკვეთილზე. ახლა ნოემბერია,
ქართული ლიტერატურა კი ნოემბერში დაბადებული გენიოსების გარეშე ბევრს დაკარგავდა –
ილია ჭავჭავაძე, მიხეილ ჯავახიშვილი, გალაკტიონ ტაბიძე, ბესიკ ხარანაული… გააერთიანეთ
რამდენიმე მწერალი ერთ გაკვეთილში, რომელსაც თუნდაც უბრალოდ „ლიტერატურულ ნოემბერს”
დაარქმევთ. ისაუბრეთ მათზე, მათი ბიოგრაფიის დეტალებზე, შემოქმედებაზე და გააკეთეთ
დიდი, ილუსტრირებული ნოემბრის კალენდარი – ესეც თქვენი სასკოლო პროექტი.

 

2. სკამი

მმმ… მხოლოდ სიტყვის წარმოთქმის დროსაც გონებაში უამრავი
იდეა იბადება.

ჯერ ერთი, ათასგვარი საინტერესო ვიზუალიზაცია შეგიძლიათ
მოძებნოთ. სულაც ვან გოგის სკამით დავიწყებდი და რომელიმე სვანი მახვშის სავარძლით
დავასრულებდი.

მერე, როგორი დისკუსიის თემაა: რატომ უყვართ ადამიანებს
სკამი, რატომ ვერ ეთმობათ იგი როგორც უპირატესობის სიმბოლო, ცვლის თუ არა სკამი პიროვნებას,
რატომ ვუცვლით დანიშნულებას და მნიშვნელობას ერთი შეხედვით მარტივ საგნებს… მოკლედ,
გაგრძელება თქვენთვის მომინდვია.

 

 

3. კალამი

აბა, კალამზე რაღა გითხრათ? პირველი წარწერებით დაიწყეთ,
მთელ ისტორიას მოჰყევით: ბურთულიანი კალამი, მელნიანი კალამი, ბატის ფრთა… კალმის
მნიშვნელობა მეცნიერებისა და ლიტერატურისთვის… „
ჰე, ჩემო, ესე უსტარი არს ჩემგან მონაღვაწები, ტანი კალმად მაქვს, კალამი ნავღელსა ამონაწები” თუ „ჩემო კალამო, ჩემო კარგო,
რად გვინდა ტაში?!”

გავაგრძელო?
მგონი, ზედმეტია.


4. საშლელი

რა საინტერესო რამეა, არა?

რამდენ ცუდ ფრაზას, დაუმსახურებელ განაჩენს, დაუფიქრებელ
ხელმოწერას წაშლიდა, რომ მიგვეშვა… იმდენი რამის მოფიქრება შეიძლება. მაგალითად,
ბავშვებს წარმოადგენინეთ ალტერნატიული რეალობა, სადაც საშლელის გამოყენება არ შეიძლება,
ანდა, პირიქით, მხოლოდ საშლელს თუ გამოიყენებთ. როგორ შეცვლიდა რამდენიმე სიტყვის წაშლა
რომელიმე ცნობილი ნაწარმოების ფინალს ან პერსონაჟებისა თუ ისტორიული პირების ცხოვრებას?

 

5. ხელთათმანი

თუ ზამთარია და კლასში ხელთათმანები მოგეძევებათ, ჩათვალეთ,
რომ საინტერესო გაკვეთილი გარანტირებული გაქვთ!

უპირველესად, ხელთათმანზე როგორც სიმბოლოზე ისაუბრეთ,
მერე ხელთათმანის სროლით ერთმანეთი ინტელექტუალურ დუელში გამოიწვიეთ, ბოლოს ხელთათმანში
წერილები ჩამალეთ და ნახეთ, ვის რომელი შეხვდება. საინტერესო და გულისამაჩუყებელი საქველმოქმედო
აქტივობის დაგეგმვაც შეიძლება – გავუთბოთ ხელები მათ, ვისაც სცივა!

ლიტერატურული სცენები გაიხსენეთ, მხატვრობა, კინო და,
რა თქმა უნდა, პოეზია, თუნდაც ახმატოვას ეს მშვენიერი ლექსი:

Я на правую руку надела
Перчатку с левой руки…”


6. წიგნი

ეტრატი, პერგამენტი, ხელნაწერი, გადამწერები, ტყავი,
პირველი ნაბეჭდი წიგნი, პირველი საბეჭდი მანქანა, პირველი ქართული წიგნი და მისი ისტორია,
ნაბეჭდიდან ელექტრონულ წიგნებამდე, ცენზურა, დამწვარი და გადარჩენილი წიგნები, მსოფლიოს
ყველაზე დიდი წიგნები, ყველაზე მნიშვნელოვანი ქართული წიგნები, წიგნები, რომელთა გარეშეც
კაცობრიობა არსებობას თუ არა, განვითარებას შეწყვეტს, წიგნის ბეჭდვისა და აკინძვის
თავისებურებები… იქნებ ეს გაკვეთილი სულაც რომელიმე სტამბაში ჩაატაროთ ან ბიბლიოთეკაში,
წიგნის მაღაზიაში თუ ბუკინისტებთან, ქუჩაში.

დაბოლოს, სხვა ლიტერატურულ ნაწარმოებებთან ერთად წაიკითხეთ
რეი ბრედბერის „451 გრადუსი ფარენჰეიტით”. აი, დისკუსია აქ დაიწყება, თუ დაიწყება!

 

მოკლედ, ჩემო ძვირფასო მასწავლებლებო, მიმოიხედეთ! გახსოვდეთ,
სამყარო იმისთვის არსებობს, რომ თქვენ გაკვეთილის ჩატარებაში დაგეხმაროთ!

კომენტარები

comments