როგორ მოვამზადოთ საინტერესო ტესტი

ტესტი განვლილი მასალის გამოკითხვისა და ცოდნის შეფასების ერთ-ერთი ყველაზე გამოცდილი და კარგი საშუალებაა, მისი დახმარებით, შეგიძლიათ, როგორც ერთი თემის, ერთი საკითხის ცოდნა შეაფასოთ, აგრეთვე მთელი წლის მასალის სისტემატიზაციაც სცადოთ. ხოლო  იმ შემთხვევაში, თუ შუალედური თუ საგამოცდო ტესტი საინტერესოდ არის შედგენილი, იგი შეიძლება დამატებით სასწავლო რესურსადაც იქცეს და ერთგვარ ჯაჭვადაც, რომელიც განვლილ მასალას ახალ საკითხებთან  დააკავშირებს.

ნებისმიერი თემატიკის ტესტი, რა მიზნისთვისაც არ უნდა იყოს განკუთვნილი – იქნება ეს შუალედური თუ საბოლოო შეფასება, აუცილებლად უნდა შეიცავდეს სხვადასხვა ტიპის კითხვებს, მოიცავდეს ნაცნობ მასალას, მაქსიმალურად გასაგებად იყოს გადმოცემული, სხვაგვარად თქვენი მიზანი – მიიღოთ უკუკავშირი და შეამოწმოთ ცოდნა – შეუსრულებელი დარჩება.

გაგიმხელთ რამდენიმე მეთოდს, რომლის საშუალებითაც ვცდილობ ჩემ მიერ შედგენილი ტესტები მაქსიმალურად პროდუქტიული და შედეგზე ორიენტირებული იყოს.

1.მოიფიქრეთ სიუჟეტი, ამბავი, რომლის საშუალებითაც გამოჰკითხავთ მოსწავლეებს სხვადასხვა თემასთან დაკავშირებულ საკითხებს. მაგალითად, მათთვის ცნობილმა ან სულაც სასკოლო პროგრამით გათვალისწინებული ნაწარმოების პერსონაჟმა დასვას ესა თუ ის კითხვა, მისი მოქმედებებიდან გამომდინარე წამოიჭრას საკითხი ან რთული სიტუაცია, რომლიდან გამოსასვლელად საჭიროა სწორი პასუხი.

2.განსაკუთრებით დაწყებითი კლასის მოსწავლეებს ძალიან მოეწონებათ ვიზუალურად გაფორმებული კითხვები და ტესტები.  მაგალითად, დახატეთ თავსატეხი, კროსვორდი ან,  შექმენით ანდაზის ვიზუალიზაცია.

3.მოიშველიეთ იუმორი – ნებისმიერ შემთხვევაში, ტესტირება სტრესსა და ემოციასთან არის დაკავშირებული, ამიტომ თუნდაც ერთი სასაცილო და მხიარული კითხვა, ამ პროცესს ბევრად სასიამოვნოს გახდის.

4.ეცადეთ, გააღვიძოთ ცნობისმოყვარეობა, განუვითაროთ მსოფლმხედველობა, დააინტერესოთ მხატვრული ლიტერატურით. მაგალითად, გრამატიკულ საკითხებზე სვამთ კითხვას?  უბრალოდ კი ნუ ჰკითხავთ, რომელია სუბიექტური პირის ნიშანი ამა თუ იმ ზმნაში, არამედ, მოიყვანეთ ამონარიდი რომელიმე ცნობილი ნაწარმოებიდან, ისე,  რომ ავტორიც დაასახელოთ და სათაურიც და იმ მასალაზე დაყრდნობით დასვით კითხვა სუბიექტური პირის ნიშანზე.

5.ცვალეთ კითხვების სირთულე და ფორმატი, მაგალითად, მარტივი დახურული კითხვის შემდეგ რთული ღია კითხვა დაწერეთ, მერე ისევ მარტივი და ა.შ.

6.მოერიდეთ გაცვეთილ, ბანალურ კითხვებს.

7.ერიდეთ  ისეთ ტესტებს, რომლებიც წვრილმანი ფაქტობრივი მასალის დამახსოვრებას მოითხოვს. ის რომ ტექსტის დაზეპირება აუცილებელი არ არის, ალბათ თავადაც უკვე გამოსცადეთ თქვენი პედაგოგიური მოღვაწეობის განმავლობაში.

8.ერიდეთ სულ მცირეოდენ ორაზროვნებასაც კი, მან შეიძლება ისე დააბნიოს მოსწავლე, რომ თქვენი მთავარი მიზანი – შეამოწმოთ ცოდნა, სრულიად მიუღწეველი დაგრჩეთ.

9.ჩართეთ თანამედროვე მასალები – მაგალითად, თანამედროვე ლიტერატურა, თანამედროვე ავტორები, მოვლენები, ახალი აღმოჩენები.

10.ეცადეთ  დაახლოებით მაინც განსაზღვროთ დრო, რომელიც საჭიროა თქვენს ტესტზე სრულყოფილად პასუხის გასაცემად.

11.ეცადეთ კითხვა დასვათ საინტერესოდ, შემოქმედებითად, არ გამოიყენოთ სახელმძღვანელოს ენა და რთული დეფინიციები.

12.აუცილებლად გამოიყენეთ უცნობი ტექსტები, ეცადეთ,  დააინტრიგოთ, დააინტერესოთ თქვენი მოსწავლეები.

13.არ დაგავიწყდეთ.  კითხვა დაიწყოთ ასე – თქვენი აზრით, თქვენ როგორ ფიქრობთ, როგორ გგონიათ? ( რასაკვირველია, საუბარია ღია კითხვებზე).

14.ჩაამატეთ რამდენიმე ძალიან მარტივი კითხვა, რომელზეც პასუხი მოსწავლეებს მოტივაციას აუმაღლებს, საკუთარი თავის რწმენას გაუძლიერებს, შედეგად, რთულ კითხვებზე ფიქრის პროცესიც უფრო ცოცხალი, აქტიური და ოპტიმისტური გახდება.

და ბოლოს, სცადეთ შექმნათ განსაკუთრებული განსხვავებული გარემო, რა იცით, იქნებ დაბალ ხმაზე ჩართულმა კლასიკურმა მუსიკამ  ან ფერად-ფერადმა კარამელმა, როგორ გაუადვილოს თქვენს მოსწავლეებს ტესტირების წარმატებულად გავლა.