კვირა, აგვისტო 14, 2022
14 აგვისტო, კვირა, 2022

გარემოსდაცვითი ცნობიერების ამაღლება დაწყებითი კლასების მოსწავლეებში

გარემოს დაცვა გულისხმობს ყველა იმ ღონისძიებას, რომლებიც მიზნად ისახავს ადამიანისა და ბუნების გაჯანსაღებას და გარემოში არსებული დაზიანებების აღმოფხვრას. აქ წინა პლანზე იწევს ადამიანის მიერ გარემოსთვის მიყენებული ზიანის განეიტრალებისა და მასზე სასიკეთო ზემოქმედების პრობლემა.

გარემოსდაცვითი ცნობიერების ამაღლებაზე ზრუნვა ადრეული ასაკიდან არის საჭირო. ამ მიმართულებით მუშაობის გაძლიერება მნიშვნელოვნად გაზრდის გარემოსდაცვითი ცნობიერების ამაღლებას მოსწავლეებში.

გთავაზობთ, რამდენიმე აქტივობას, რომლებიც საინტერესო შეიძლება აღმოჩნდეს მოსწავლეთათვის.

  • დაწერე მოთხრობა

პერსონაჟი: ადამიანი

თვისება: წინდაუხედავი

პრობლემა: გარემოს უდიერად მოეპყრო, ამიტომ დედამიწა ატირდა.

დაფიქრდი! როგორ შეიძლება მოგვარდეს ეს პრობლემა. რა უნდა გავაკეთოთ, რომ დედამიწამ აღარ იტიროს.

მოსწავლეები მოცემული მინიშნებების გათვალისწინებით ქმნიან თხზულებას.

  • გასვლითი გაკვეთილის ჩატარება ბუნებაში

კარგია, თუ არის შესაძლებლობა, სტუმრად ეწვიო ბოტანიკურ ბაღს, ტყე-პარკს, სკვერს და ა.შ. სადაც მოსწავლეებს შეუძლიათ დააკვირდნენ მცენარეებს.

მოსწავლეები დაათვალიერებენ სხვადასხვა ჯიშის ხეს და დაინახავენ მათ შორის განსხვავებას. დააკვირდებიან ფოთოლცვენას, როგორც ბუნებრივ მოვლენას; ასევე – ბუჩქებს, მარადმწვანე და ფართოფოთლოვან ხეებს. ერთმანეთს წერილობით გაუზიარებენ მიღებულ შთაბეჭდილებებს, შექმნიან კომპოზიციებსა და ნახატებს.

მსგავსი აქტივობის მიზანია:

  • მოსწავლეთა თვალსაწიერის გაფართოება;
  • ბუნებრივ მოვლენებზე დაკვირვება;
  • მცენარეებზე დაკვირვება;
  • გარემოსდაცვითი ცნობიერების ამაღლება.

 

  • ფრინველთათვის თავშესაფრის გაკეთება

ეს აქტივობა შეიძლება ჩატარდეს შემოდგომაზე. მოსწავლეები წინასწარ ამზადებენ ხის პატარა სახლებს. შემდეგ მშობლებისა და მასწავლებლის დახმარებით მათ ხეებზე ჰკიდებენ. ამით გადარჩენაში ეხმარებიან იმ ჩიტებს, რომლებმაც ჩვენთან უნდა გამოიზამთრონ. აქტივობა მოსწავლეებში აყალიბებს ჰუმანურობის გრძნობასა და ასწავლის მათ ფრინველებზე ზრუნვას.

  • გასაუბრება/შეხვედრა გარემოსდამცველებთან, მეტყევეებთან ან იმ ადამიანებთან, რომლებსაც პროფესია გარემოზე ზრუნვას ავალდებულებს.

ასეთი შეხვედრები კარგია, რადგან ეს ადამიანი მოსწავლეებისთვის ცოცხალი მაგალითის მიმცემი იქნება და მეტ ინტერესს გააღვივებს მოსწავლეებში. საუბრის თემატიკა შეიძლება შეირჩეს მიზნობრივად, ასაკობრივი ჯგუფის გათვალისწინებით იმ მრავალფეროვანი თემებიდან, როგორებიცაა: რატომ უნდა დავიცვათ ბუნება; რატომ უნდა დავრგოთ ხე; რა მნიშვნელობა აქვს ჩვენთვის ტყეს; რა არ უნდა დავაბინძუროთ გარემო; როგორ უნდა მოვიქცეთ გარემოში სეირნობისას და ა.შ.

საინტერესო და მნიშვნელოვანი რესურსი ამ მიმართულებით არის სახელმძღვანელო – ,,გარემოსდაცვითი და აგრარული განათლება სკოლაში”. მასწავლებელს საშუალება აქვს, შეარჩიოს საინტერესო აქტივობები, დაგეგმოს და განახორციელოს მეცადინეობები როგორც ფორმალური, ასევე არაფორმალური განათლების ფორმით.

 

გამოყენებული ლიტერატურა:

სახელმძღვანელოები „გარემოსდაცვითი და აგრარული განათლება სკოლაში;.

 

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი