ოთხშაბათი, ნოემბერი 30, 2022
30 ნოემბერი, ოთხშაბათი, 2022

ფერადი გაკვეთილებიდან კომპლექსურ დავალებამდე

ახალი ეროვნული სასწავლო გეგმის დანერგვის პროცესში და პანდემიის პერიოდში „ფერადი გაკვეთილები“ კომპლექსური დავალების ნაწილად ვაქციე. გარკვეული მოდიფიცირების შემდეგ ამ დავალებების შესრულება მე-9 კლასიდან მე-11 კლასამდეა შესაძლებელი. მისით განსაკუთრებით დაინტერესდნენ საშუალო საფეხურის მოსწავლეები. პანდემიური სიტუაციიდან გამომდინარე კლასებში ბევრი პრობლემა დამხვდა. ამ რესურსებმა თითქოს გამოაფხიზლა ბავშვები და ძალიან კარგი დავალებებიც მივიღე. მათმა მსჯელობამ და დასკვნამ ძალიან გამახარა. განსაკუთრებით განათლებასთან დაკავშირებული მსჯელობა მომეწონა: „ამ საკითხების სწავლება აუცილებელი და საჭიროა, რადგან გამოკითხვამაც აჩვენა, რომ საზოგადოების ცნობიერება არასახარბიელოა“.

 

კომპლექსური დავალებები მდგრადი განვითარების მიზნებსა და ეკონაკვალევს ეხება. რესურსები ფაქტობრივად იგივეა, მხოლოდ დავალებამ იცვალა ფორმა. შინაარსი და მიზანი უცვლელია – ცნობიერების ამაღლება და გარემოზე ზრუნვა.

 

კომპლექსური 1.

საკითხი: მდგრადი განვითარების მიზნები

ცნებები: გეოგრაფიული კვლევა და ანალიზი – (შედეგები: 1,2.3.6.9); მდგრადი განვითარება (შედეგები: 7,9,10,11,12,13).

საკვანძო შეკითხვა: როგორ გავაცნობიერებინო დეკლარაციის საშუალებით საზოგადოების წევრებს მდგრადი განვითარების მიზნების შესრულების მნიშვნელობა ქვეყნის კეთილდღეობისა და განვითარების პროცესში?

კომპლექსური დავალების პირობა

 

2015 წლის 25 სექტემბერს გაეროს გენერალურმა ასამბლეამ მდგრადი განვითარების 2030 წლის დღის წესრიგი (UN, 2015) დაამტკიცა. აღნიშნული ახალი გლობალური ჩარჩო, რომელიც კაცობრიობის მდგრადი განვითარების გზაზე დაყენებას ემსახურება, შემუშავებული იქნა 2012 წელს ბრაზილიაში. ამ მნიშვნელოვანი დოკუმენტის შემუშავებაში მონაწილეობდნენ გაეროს წევრი სახელმწიფოები, და მილიონობით ადამიანი, რომლებიც ეროვნულ კვლევებს აწარმოებდნენ მდგრად განვითარებასთან დაკავშირებულ საკითხებზე, ასევე – ათასობით პროცესში მონაწილე დაინტერესებული მხარე მსოფლიოს ყველა კუთხიდან.

 

წარმოიდგინე, რომ შენ ხარ ღია მმართველობის პარტნიორობის კომიტეტის წევრი და მონაწილეობ გაერთიანებული ერების გენერალურ ასამბლეაში. შენი მიზანია, შეიმუშაო ღია მმართველობის პარტნიორობის ერთობლივი დეკლარაცია „გაეროს 2030 წლის მდგრადი განვითარების მიზნების დღის წესრიგის“ განხორციელების შესახებ.

 

დეკლარაციაში ხაზგასმით წარმოაჩინე:

  • როგორ უკავშირდება ერთმანეთს მდგრადი განვითარების მიზნების მთავარი კომპონენტები;
  • რა მნიშვნელობა აქვს მსოფლიოს ქვეყნების კეთილდღეობისათვის მდგრადი განვითარების მიზნების შესრულებას;
  • როგორ იმოქმედებს საქართველოს მომავალზე მდგრადი განვითარების მიზნების შესრულებაში მონაწილეობა.

 

რესურსები: ანიმაციური ფილმები – გაეროს მდგრადი განვითარების მიზნები; მდგრადი განვითარება განათლებით; ტექსტი – გაეროს 2030 წლის მდგრადი განვითარების მიზნების განხორციელების შესახებ; ღია მმართველობის პარტნიორობის გზამკვლევის სპეციალური გამოშვება – მოიცავს ღია მმართველობის პარტნიორი ქვეყნების ვალდებულებებს მდგრადი განვითარების მიზნების შესრულებაში.

შესაძლებელია ამ ორი კომპლექსური დავალების გაერთიანებაც, თუმცა დეკლარაციის შემუშავება ძალიან საინტერესო პროცესია. ამიტომ ვფიქრობ, რომ დამოუკიდებელ დავალებებად შესრულება უფრო ეფექტური იქნება.

 

კომპლექსური 2

 

საკითხი: ჩემი ეკონაკვალევი

ცნებები: გეოგრაფიული კვლევა და ანალიზი – (შედეგები: 1,2.3.6.9); მდგრადი განვითარება (შედეგები: 7,9,10,11,12,13).

საკვანძო შეკითხვა: როგორ გავაცნობიერებინო საზოგადოების წევრებს ეკონაკვალევის ცოდნის მნიშვნელობა ქვეყნის მდგრადი განვითარების პროცესში შემეცნებით – გასართობი სატელევიზიო გადაცემის საშუალებით?

კომპლექსური დავალების პირობა:

 

მდგრადი განვითარების სხვა მიზნების (SDG) მიღწევის საშუალებას განათლება წარმოადგენს. იგი მდგრადი განვითარების არა მხოლოდ განუყოფელ ნაწილს, არამედ მისი უზრუნველყოფის მყარ საფუძველსაც წარმოადგენს. განათლება, რომელიც ამ მიზნების მიღწევის საფუძველს ქმნის, დამოუკიდებლად არის წარმოდგენილი მდგრადი განვითარების მე-4 მიზანში.

 

სწორედ ამიტომ განათლება არის მდგრადი განვითარების მიზნების (SDG) ერთ-ერთი არსებითი და უმნიშვნელოვანესი სტრატეგია.

 

წარმოიდგინე, რომ შემეცნებითი გადაცემის რეჟისორი ხარ. ეკონაკვალევის შემცირების პროგრამის ძირითადი მიზნების გაცნობისა და მოსახლეობის ეკოლოგიური ცნობიერების ამაღლების მიზნით მოამზადე შემეცნებით-გასართობი სატელევიზიო გადაცემა თემაზე: „ჩემი ეკონაკვალევი“.

 

გადაცემაში ხაზგასმით წარმოაჩინე:

  • რა როლი აქვს პიროვნების როლს მდგრადი განვითარების მიზნების შესრულებაში;
  • რა როლს ასრულებს ადამიანის ეკონაკვალევის ცოდნა ქვეყნის მდგრადი განვითარების პროცესში;
  • როგორ შეიძლება ეკონაკვალევის შემცირება.

 

რესურსები: სტატიები – მაია ბლიაძე: მწვანე ეკონომიკა; ჩემი ეკონაკვალევი

მსოფლიოს ქვეყნები ეკოლოგიური ეფექტურობის ინდექსის მიხედვით; ჩემი ეკონაკვალევი.

მწვანე ქალაქები, როგორც ურბანიზაციის უარყოფით შედეგებზე პასუხი;

 

ეკონაკვალევის ზომის გამოთვლა.

 

რაც შეეხება გადაცემებს, მოსწავლეებმა სხვადასხვა მიმართულება აირჩიეს – ზოგმა მოდაზე გააკეთა აქცენტი, ზოგმა მწვანე ეკონომიკაზე, ზოგმა საერთოდ სხვა მიმართულება აირჩია. დავალებების გაერთიანებით გამოვიდა გადაცემათა ციკლი. ეს იყო გასულ სასწავლო წელს პანდემიის პერიოდში.

 

ამ სასწავლო წელსაც ძალიან საინტერესო დავალებები მივიღე. მოსწავლეებთან ერთად შემოქმედებითი პროდუქტი შევცვალეთ და გადაცემა სტატიით ჩავანაცვლეთ. ამჯერადაც გამოიკვეთა განსხვავებული აქცენტები, ყველა თავისებურად საინტერესო და დასაფიქრებელი. შემეცნებითი ჟურნალის შექმნის იდეაც კი დაიბადა.

ჟურნალის რა მოგახსენოთ და ეკოცნობიერების ამაღლებაზე ნამდვილად ვიმუშავეთ.

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი