თამაში 1
სამაგიდო თამაშები ყველას გვიყვარს, უფროსებიც და უმცროსებიც მშვენივრად ვერთობით, ასე ერთმანეთთან კომუნიკაციაც უფრო სასიამოვნოა, ზაფხულის თუ ზამთრის საღამოების ერთად გატარებაც უფრო საინტერესო.
ჩვენ ბევრჯერ გვისაუბრია სამაგიდო თამაშებზე, რომელთაც ქართული ენისა და ლიტერატურის სწავლების პროცესში ვთამაშობთ. თამაშები სხვადასხვა ფუნქციით შეგიძლიათ გამოვიყენოთ, როგორც ახალი მასალის ახსნისა და გამეორების პროცესში, ასევე, გამოკითხვის თუ შემაჯამებელი დავალების ფუნქციით.
ეს სხვადასხვა დეტალისგან აწყობილი და მომზადებული თამაშებია, თამაში, რომელიც ამ წუთში, ამ საკითხის დაძლევისა თუ თემის განხილვის ფარგლებში ყველაზე მეტად გვჭირდება.
ლიტერატურული თამაში, რომელსაც დღეს გთავაზობთ, რამდენიმე კვირაზე შეგიძლიათ გაანაწილოთ და სასწავლო პროექტადაც აქციოთ. მე მოგიყვებით თამაშის სტრუქტურის შესახებ, დეტალები თქვენი გემოვნების თუ ინტერესის მიხედვით მოამზადეთ.
- მაშ ასე, რა გვჭირდება:
სხვადასხვა ჟანრისა და პერიოდის 10 ტექსტი ( კურიკულუმით გათვალისწინებული თუ თავისუფალი არჩევანი)
- 10 ბარათი, რომელზეც ამ ტექსტების ავტორი და სათაური აწერია, შეგიძლიათ წიგნის ყდაც ამობეჭდოთ და ის გამოიყენოთ ბარათად,
- წითელი ბარათები – თემა
- მწვანე ბარათები – ჟანრი
- ლურჯი ბარათები- პერიოდი
- ყვითელი ბარათები – ქვეყანა, ავტორის წარმომავლობა
- ვარდისფერი ბარათები – პერსონაჟი
ნაბიჯი 1.
დრო, რომელიც ამ ათი ტექსტის წასაკითხად, განსახილველად, სხვადასხვა მეთოდით დასამუშავებლად გჭირდებათ, თავად განსაზღვრეთ, მთავარია, რომ ყველა ტექსტი კარგად წაიკითხოთ, იმუშავოთ ისეთ საკითხებზე, როგორიცაა ნაწარმოების თემა, ჟანრი, ლიტერატურული თუ ისტორიული კონტექსტი, ავტორი, პერსონაჟები და სხვა. ამოწერეთ ეს ინფორმაცია ბარათებზე.
ნაბიჯი 2
თამაშის დროს მოთამაშე იღებს ჯერ ტექსტის ბარათს, ხოლო შემდეგ ფერადი ბარათებიდან ერთ-ერთს და მისი დავალებაა, იმ ბარათის მიხედვით გადმოგვცეს ინფორმაცია ტექსტის შესახებ, რომელიც ამოვიდა.
ნაბიჯი 3
ეს უკვე ფინალური დავალებაა და ტექსტებს შორის კავშირების დანახვას ემსახურება. ამ ეტაპზე უკვე ორი ტექსტის ბარათი მოგვდის და ჩვენი ვალია, ფერადი ბარათების საშუალებით ვიპოვოთ კავშირი ამ ორ ტექსტს შორის, მაგალითად, რითი ჰგვანან ტექსტების პერსონაჟები ერთმანეთს, იქნებ რომელიმე ერთსა და იმავე ლიტერატურულ პერიოდის, ჟანრს ან ქვეყანას ეკუთვნის და სხვა.
ნაბიჯი 4
ეს ეტაპი უკვე არა ფაქტობრივ ინფორმაციას, არამედ ასოციაციასა და ფანტაზიას ავითარებს, აქ ტექსტებს შორის არა ფაქტობრივ თუ კონკრეტულ კავშირებს ვეძებთ, არამედ ასოციაციურს, რითი შეიძლება ერთი ტექსტი მეორე ტექსტს დავუკავშიროთ?
თამაში 2
შექმენი ტროპი
ეს თამაში ლიტერატურული ტერმინებისა და ტროპის სახეების სწავლების დროს დაგეხმარებათ, ეს პროცესი უფრო მხიარული და შემოქმედებითი გახადოთ.
ამისთვის საჭიროა:
- სხვადასხვა ფერის ბარათები, სადაც ტროპის სახეები და მცირე თეორიული განმარტება დაიწერება, რომელი ტროპი რას მოიაზრებს და როგორია მისი „შექმნის“ ინსტრუქცია.
- დანარჩენი ბარათებისთვის კი არჩევანი ძალიან ფართოა, აქ შეგიძლიათ დაიტანოთ ყველაფერი, საგნები, მცენარეები, ცხოველები, ფერები, მინერალები და ა.შ.
- მოთამაშე იღებს ორ ბარათს, ერთზე- ტროპის სახეობაა, ესაა ის მხატვრული სახე, რომელიც მან უნდა შექმნას, მეორეზე – რაიმე ცნება, ნივთი, მცენარე, ნახატი და ა.შ. მან ამ ნახატის მიხედვით უნდა შექმნას ტროპი. ძალიან სახალისო თამაშია, მთავარია, ფანტაზიაა არ შევზღუდოთ და კარგად გავერთოთ, თან, ვისწავლოთ კიდეც.
