ზაფხულის სკოლის ამბები

სკოლებში სასწავლო პროცესი 15 ივნისს სრულდება. როგორც წესი, მოსწავლეებს ერთი სული აქვთ, როდის ჩააბარებენ წიგნებს და სამი თვით დაისვენებენ მასწავლებლებისგან, ყოველდღიური რუტინისგან, უამრავი საშინაო დავალებისგან…

სამი წელია, ჩვენი მოსწავლეები ივლისის თვეში სკოლაში დადიან,  ზაფხულის გაუსაძლის სიცხეში (მარნეულში განსაკუთრებით ცხელა). ამას აკეთებენ არა რაიმე ვალდებულების ან ზემოდან წამოსული დირექტივის გამო, არამედ საკუთარი სურვილით. ისინი აცნობიერებენ, რომ საზაფხულო სკოლა მათი პიროვნული ზრდისთვის ძალიან მნიშვნელოვანია. ამასთან, იძენენ ისეთ აუცილებელ უნარ-ჩვევებს, როგორებიცაა: კომუნიკაციის, გუნდური მუშაობის, კრიტიკული აზროვნების, მედიაწიგნიერების და ა.შ. აღსანიშნავია, რომ საზაფხულო სკოლები ინტეგრაციის პროცესის ხელშეწყობასაც გულისხმობს.

მინდა გაგიზიაროთ ჩემი გამოცდილება, თუ როგორ დავგეგმოთ სკოლის ბაზაზე საზაფხულო სკოლა, ისე, რომ იყოს საინტერესო და ნაყოფიერი. ერთი შეხედვით, აღნიშნულის განხორციელება საჭიროებს დიდბიუჯეტიან გრანტს, ან სხვა სახის ფინანსურ რესურსს. ვფიქრობ, საზაფხულო სკოლის დაგეგმვა და განხორციელება, პირველ რიგში, მოითხოვს მოტივაციასა და ენთუზიაზმს. გარდა ამისა, საჭიროა რესურსები, სკოლის ადმინისტრაციის მხარდაჭერა და სანდო კოლეგა – პარტნიორი. ფინანსური ნაწილი არის მეორეხარისხოვანი და ის მთლიანად დამოკიდებულია პროექტის განმახორციელებელი პირის მონდომებასა და მოხერხებულობაზე.

მოსწავლეებთან ერთად მოიფიქრეთ თემატიკა – მოსწავლეების გადაწყვეტილების მიღების პროცესში ჩართვა ზრდის მათ წილ პასუხისმგებლობას. ჯერ კიდევ ივნისის დასაწყისში ვკითხე, თუ რაზე ისურვებდნენ გამოცდილების გამდიდრებას საზაფხულო სკოლის ფარგლებში. თუ თქვენ ხშირად ესაუბრებით გარემოსდაცვით საკითხებზე, მედიაწიგნიერებაზე, კრიტიკულ აზროვნებაზე, სპორტზე, ხელოვნებაზე და ა.შ. ისინი მაშინვე ასახელებენ იმ თემატიკას, რაზეც სასწავლო პროცესის განმავლობაში ამახვილებდით ყურადღებას.

შეარჩიეთ ხელსაყრელი დრო – სასწავლო წლის დასრულების შემდეგ, როგორც წესი, მოსწავლეებიის ერთი ნაწილი მიდის დასასვენებლად, დარჩენილ ნაწილს, რომელიც ვერ ახერხებს გასვლას, ვთავაზობთ, რომ საინტერესოდ და ნაყოფიერად გაატარონ თავისუფალი დრო.

შეადგინეთ სამოქმედო გეგმა/პროგრამა – მნიშვნელოვანია, ზედმიწევნით სწორად ჩამოვაყალიბოთ, თუ რის გაკეთებას ვაპირებთ. დასახეთ მიზნები და აქტივობები, რომლებიც გვეხმარება მიზნების მიღწევაში. გაკვეთილებს სასწავლო წლის განმავლობაში ისედაც ესწრებიან.  ეცადეთ, საზაფხულო სკოლა არ დაემსგავსოს საგაკვეთილო პროცესს. გამოიყენეთ ტრენინგ – სემინარის ფორმა, ეცადეთ, მოსწავლეებმა თავი არ იგრძნონ პასიურ მსმენელებად, თავიდან ბოლომდე ჩართეთ პროცესში.

გამოიყენეთ პირადი კონაქტები – საზაფხულო სკოლის თემატიკისა და დროის შერჩევის შემდეგ, დრო დგება, ვიფიქროთ სტუმრებზე. ივლისში სკოლაში მოსულ მოსწავლეს არ უნდა დარჩეს განცდა, რომ ტყუილად ხარჯავს დროსა და ენერგიას. ამიტომ ძალიან მნიშვნელოვანია, რომ მათ დავახვედროთ სტუმრები. ერთკვირიანი საზაფხულო სკოლის პირობებში, სასურველია გყავდეთ ორი ან სამი მოწვეული სტუმარი. მიმოიხედეთ ირგვლივ, შეიძლება სამეგობრო წრეში, კოლეგებში, სანათესაოში აღმოაჩინოთ ადამიანი, რომელიც თემატიკიდან გამომდინარე საინტერესო დისკუსიას მოაწყობს მოსწავლეებთან.

აქტიურად გამოიყენეთ სოციალური ქსელები – სოციალური ქსელების ეპოქაში საინტერესო ადამიანების მიგნება და მათთან კავშირის დამყარება სულაც არ არის რთული. მოსწავლეებთან ერთად, შერჩეულ თემატიკაზე საინტერესოდ მოსაუბრე ცნობილი ადამიანები, არასამთავრობო ორგანიზაციების წარმომადგენლები, სამოქალაქო აქტივისტები, ყოველგვარი ანაზღაურების გარეშე, მზად არიან ჩამოვიდნენ რეგიონებში და ესაუბრონ ბავშვებს. თუ პრობლემას წამოადგენს გეოგრაფიული დაშორება, სავსებით შესაძლებელია ვიდეოკავშირის დამყარებაც.

მოვიძიოთ პარტნიორები – თქვენ, ალბათ, ფიქრობთ, რომ პარტნიორების მოძებნა ყველაზე რთული პროცესია. თუმცა ჩემ გამოცდილებაზე დაყრდნობით გარწმუნებთ, რომ თუ მოვინდომებთ, აუცილებლად მოვიძიებთ თუნდაც ორ მხარდამჭერ ორგანიზაციას ან კეთილ ადამიანს. მიმართეთ თქვენს სოფელში, ქალაქში, მუნიციპალიტეტში მოქმედ საწარმოებს, ორგანიზაციებს, ბიზნესმენებს. იდეის სწორად მიწოდების შემთხვევაში აუცილებლად მიაღწევთ დადებით შედეგს.

თუ ყველა ეტაპი წარმატებით გაიარეთ, თქვენ მზად ხართ საზაფხულო სკოლის მოსაწყობად. მომდევნო სტატიაში გაგიზიარებთ „საოცარი სკოლის“ ამბებს და კონკრეტულ მაგალითებზე დაყრდნობით მოგიყვებით როგორ ვაქციეთ ივლისის ცხელი დღეები საოცარ სკოლად.

საოცარი სკოლა 2019

 

კომენტარები

comments