მსოფლიოს უახლესი რეიტინგი განათლების დონის შესახებ ცხადყოფს, რომ სიის სათავეში ამერიკის შეერთებული შტატები არ არის. ის მეშვიდე ადგილზეა. რომელია #1 ქვეყანა? – ფინეთი.
კვლევა ჯონ მილერმა, ცენტრალური კონეკტიკუტის უნივერსიტეტის პრეზიდენტმა ჩაატარა და მსოფლიოს 60 ქვეყნის წიგნიერების ტრენდები და თავისებურებები გააანალიზა.
კვლევამ გამოააშკარავა, რომ ჩრდილოეთით მდებარე ქვეყნები საუკეთესოები არიან, ხოლო დასავლეთი ნახევარსფერო განათლების დონით მათთან შედარებით მოიკოჭლებს.
მსოფლიოს ოცი ყველაზე განათლებული ქვეყნის სია ასე გამოიყურება:
ფინეთი, ნორვეგია, ისლანდია, დანია, შვედეთი, შვეიცარია, ამერიკის შეერთებული შტატები, გერმანია, ლატვია, ნიდერლანდი, კანადა, საფრანგეთი, ლუქსემბურგი. ესტონეთი, ახალი ზელანდია, ავსტრალია, დიდი ბრიტანეთი, ბელგია, ისრაელი და პოლონეთი.
– ჩვენ მიერ შესწავლილი ფაქტორები კომპლექსურია და ერის ზოგად პორტრეტს წარმოადგენს. კონკრეტული მიგნებები, რომლებიც მსოფლიოს კვლევის ფარგლებში გავაცანით, ერთპიროვნულად მნიშვნელოვანი და სამაგალითოა დანარჩენი მსოფლიოსთვის, მათთვის, ვისაც განათლების დონე არადამაკმაყოფილებელი აქვს. ინდივიდების განათლების დონე ქვეყნის ეკონომიკური განვითარების მთავარი წინაპირობაა და ძალიან მნიშვნელოვანია მომავლის გლობალური კეთილდღეობისთვის, – ამბობს ჯონ მილერი.
მისი განცხადებით, კვლევის ძირითადი წყარო იყო PIRLS – (Progress in International Reading Literacy Study) – კითხვის დონის საერთაშორისო კვლევა და – PISA (Program for International Student Assessment) – მოსწავლეების საერთაშორისო გამოცდების პროგრამა. მკვლევარი აქტიურად იყენებდა სხვა წყაროებსაც – ბიბლიოთეკებს, გაზეთებს, საგანმანათლებლო დაწესებულებებს, ინტერნეტის განვითარების დონის გავლენის მონაცემებს თითოეული ქვეყნის მაგალითზე.
ჯონ მილერის ახალ კვლევაში განათლების დონის მაჩვენებლით საქართველო სიაში თურქეთს მოსდევს და 51-ე ადგილს იკავებს.
