ზურგზე წამოკიდებული პასუხისმგებლობა

ბაზრობებზე თუ სავაჭრო ცენტრებში, სადაც მრავლად ნახავთ მოსწავლეებისთვის საჭირო სასკოლო ინვენტარს, სექტემბერში უმეტესად ზურგჩანთები იყიდება. ხარისხიანი ზურგჩანთისთვის მშობლებს ფული არ ენანებათ, მაგრამ ბევრმა არ იცის, როგორ შეარჩიოს ხარისხიანი ჩანთა. ვეცდებით, ამ საპასუხისმგებლო საქმეში მარტივი რჩევებით დაგეხმაროთ.

ზურგჩანთასთან უშუალოდაა დაკავშირებული თქვენი შვილის ჯანმრთელობა. მაგალითად, ორთოპედები გვირჩევენ, ნებისმიერი ასაკის მოსწავლისთვის შევიძინოთ არა ცალ მხარზე გადასაკიდებელი, არამედ ზურგზე მოსაკიდებელი ჩანთა, რადგან პირველმა შესაძლოა სკოლიოზი ან ხერხემლის სხვა დაავადება გამოიწვიოს. ბავშვებს, რომლებიც არასწორად შერჩეულ სასკოლო ჩანთებსა თუ ზურგჩანთებს ატარებენ, მხედველობის პრობლემებიც აღენიშნებათ.

ნუ შეიძენთ რბილი ქსოვილის ზურგჩანთას. ჩანთას მყარი საზურგე და ფსკერი უნდა ჰქონდეს. ბავშვი ზურგით ვერ უნდა გრძნობდეს წიგნებს. როგორც კი თქვენს შვილს ახალი ჩანთით დაასაჩუქრებთ, ასწავლეთ, რომ შიგთავსი მასში თანაბრად გაანაწილოს, ხოლო წვრილმანები მარჯვენა და მარცხენა ჯიბეებში ჩააწყოს. რაც შეეხება შუა სათავსს, შედარებით მძიმე წიგნები ზურგთან ახლოს უნდა ჩაიდოს, მსუბუქი კი წინა მხარეს.

რაც უფრო მტკიცე მასალისგან იქნება შეკერილი ჩანთის კორპუსი, მით უფრო ძნელად გაცვდება – უმცროსკლასელი მოსწავლეები ხომ ჩანთებს უდიერად ეპყრობიან და ხშირად სათამაშოდაც იყენებენ.

კიდევ ერთი რამ: რა მასალისაც არ უნდა იყოს ჩანთა, სიმსუბუქე მისთვის აუცილებელია. მისი წონა ერთ კილოგრამს არ უნდა აღემატებოდეს, პირველკლასელის ზურგჩანთის წონა კი უფრო ნაკლები – 600 გრამი უნდა იყოს. ზურგჩანთა წიგნებიან-რვეულებიანად არ უნდა იწონიდეს მოსწავლის სხეულის მასის 10%-ზე მეტს.

როგორც აღვნიშნეთ, ორთოპედიული საზურგე ხერხემლის ბუნებრივ ფორმას იმეორებს, ამიტომ სასარგებლოც კია მისი სწორი ფორმირებისთვის. ზურგჩანთის საზურგეს ქვედა მხარეს, წელის მიდამოში, მცირე ზომის სიმრგვალე უნდა ჰქონდეს, რადგან ჩანთის ტარებისას ყველაზე დიდი დატვირთვა სწორედ ამ ადგილზე მოდის. საზურგე მტკიცე უნდა იყოს, მაგრამ არა იმდენად, რომ ბავშვს ზურგი ატკინოს – აუცილებლად შეამოწმეთ ის ხელით. ასეთივე მასალა უნდა იყოს ჩაყოლებული მხარზე გადასაკიდებელ ქამრებში. ქამრების რეგულირება ბავშვს არ უნდა უჭირდეს. ქამრები წელვადი და წვრილი არ უნდა იყოს, მათი ოპტიმალური სიგანე 4-5 სანტიმეტრია.

საზურგის ნაწილში ხშირად ნახავთ ბადისმაგვარ მასალას, რომელსაც სავენტილაციო ფუნქცია აქვს. მისი მეშვეობით ბავშვი ნაკლებად ოფლიანობს.

თუ ზურჩანთას პირველკლასელისთვის ან მეორეკლასელისთვის ყიდულობთ, სასურველია, ის ფერადი იყოს და სინათლის ამრეკლავი ელემენტებიც ჰქონდეს, რათა ქუჩაზე გადასვლისას მძღოლების ყურადღება მიიქციოს. ჩანთების ზოგიერთი მწარმოებელი ნაკერებში ფოსფორისფერ ძაფს აყოლებს, რომელიც სიბნელეში ანათებს და ბავშვი ადვილად შესამჩნევი ხდება. ყველაზე მჭახე ფერები, რომლებსაც მძღოლები ყურადღებას აქცევენ, ყვითელი და ნარინჯისფერია.

მას შემდეგ, რაც ორთოპედიული საზურგის მქონე, ერთ კილოგრამზე ნაკლები წონის ფერად ჩანთას შეარჩევთ, ყურადღება მიაქციეთ სხვა დეტალებსაც, რომლებიც ხარისხიან ჩანთას უხარისხოსგან გამოარჩევს: მასალა წყალგაუმტარია (ნეილონი ან პოლიესტერი), ნახატი რეცხვის დროს არ იშლება და არ იცრიცება, ნაკერები მტკიცეა და კარგად დამუშავებული, პლასტიკური დეტალები გლუვია, ელვაშესაკრავები და სხვა ტიპის საკეტები მოხერხებულია და საიმედო, ადვილად იხსნება და იკეტება; კორპუსის კუთხეები საგულდაგულოდაა გამაგრებული, გარეთა ჯიბეები კარგად იკეტება და დაცულია წვიმისა და თოვლისგან; შიგნით ჩანთას აქვს არა ერთი, არამედ რამდენიმე განყოფილება, რომლებშიც ბავშვი თანაბრად გაანაწილებს წიგნებსა და რვეულებს; ჩანთა სიმძიმის ჩალაგებისას არ დეფორმირდება; ზურგზე გადასაკიდებელი ქამრები განიერია, რათა მასა სწორად განაწილდეს და ბავშვს მხრები არ ატკინოს.

კარგი იქნება, თუ ჩანთის შესარჩევად მის მოვალ მფლობელსაც წაიყვანთ. უსიამოვნო სიურპრიზისგან დაზღვეული რომ იყოთ, ბავშვმა ჩანთა უნდა მოიზომოს. ყურადღება უნდა მიაქციეთ, რომ ზურგჩანთის სიგანე არ აღემატებოდეს ბავშვის მხრების სიგანეს; ზურგჩანთის ზედა კიდე ბავშვის მხრების სიმაღლეზე იყოს, ქვედა კი წელის სიმაღლეზე; ზურგჩანთა კარგად ეკვროდეს ბავშვის ზურგს, სამხრეები კი საკმარისად გრძელდებოდეს, რადგან ბავშვს ზურგჩანთის ტარება ზამთარში, სქელ ქურთუკზეც მოუწევს.

განათლების ექსპერტები ზურგჩანთის ონლაინ მაღაზიიდან გამოწერას არ გვირჩევენ, რადგან მას ბავშვი ვერ მოიზომავს. მაღაზიაში კი ჩანთის ხარისხისა და გამძლეობის შემოწმება თავისუფლად შეიძლება.

იდეალური სასკოლო ჩანთა არა მხოლოდ მშობლებს, ბავშვსაც უნდა მოსწონდეს. ბევრ მოსწავლეს სულაც არ იზიდავს პრინცესებით ან მანქანებით მოხატული ჩანთები – მათ მიაჩნიათ, რომ რაკი სკოლაში დადიან, უკვე დიდები არიან და მეტისმეტად ბავშვური ნახატები აკომპლექსებთ, ამიტომ ჰკითხეთ ბავშვს, რომელი ზურგჩანთა ურჩევნია – ნუ დაივიწყებთ, რომ მას თითქმის ყოველდღე მოუწევს ამ ჩანთის ზურგით ტარება.

კომენტარები

comments