მაშ ასე, გავიდა მრავალფეროვანი, ცხელი, თავისუფალი, მხიარული ზაფხული, აგვისტოც იწურება და სასკოლო ფაციფუციც დაიწყება… ძნელად თუ იპოვით ოჯახს, რომელიც რაიმე ფორმით არ ჩერთვება ამ ორომტრიალში, იქნება ეს მოსწავლეთა მშობლების ნერვიულობა, ბავშვების საოცარი მოლოდინი, მასწავლებლების მზადება… სასკოლო საყიდლების სია, საჭირო საკანცელარიო ნივთები, წიგნები, საზაფხულო დავალების მობილიზება, სიახლეები და სირთულეები…მასწავლებლებისათვის კი ყველაზე მთავარი გამოწვევა სასწავლო წლის პირველი კვირაა, არ აქვს მნიშვნელობა, ახალ, უცნობ კლასთან გვიწევს ურთიერთობა თუ საყვარელ მოსწავლეებს ხელახლა ვხვდებით, ნებისმიერ შემთხვევაში პირველი კვირა ის დროა, როდესაც მართლაც ბეწვის ხიდზე უნდა გავიაროთ – რეჟიმიდან ამოვარდნილი ბავშვები ნელ-ნელა უნდა შევაჩვიოთ სასკოლო მუშაობას ისე, რომ არც მეტისმეტი მოგვივიდეს და არც ზედმეტი თავისუფლების გამო ერთი კვირა დავუკარგოთ ჩვენს ძალიან რთულ და დატვირთულ აკადემიურ წელიწადს.
ამიტომაც, მგონია, რომ ყველაფერი კარგად და დაწვრილებით უნდა გავთვალოთ, აქტივობები, დახვედრა, გაცნობა ( თუ ახალ კლასთან გვაქვს საქმე), მათი მხიარული ამბების მოსმენა და ურთიერთგაზიარება, სასკოლო წლის თუ საგნის სილაბუსის დაგეგმვა ( რასაც, მე პირადად არასდროს გავაკეთებდი მოსწავლეების გარეშე), საზაფხულო დავალებების შედეგების შემოწმება და ა.შ და ა.შ.
პირველ რიგში, კლასის ატმოსფეროზე ვიზრუნოთ. ვიზუალური მასალა გინდათ დაამატოთ? იქნებ კედლებზე ძველი თვალსაჩინოებები მოგბეზრდათ და ახალი გინდათ? იქნებ რაიმე განსხვავებული იდეა გაქვთ? სკოლის დაწყებამდე რამდენიმე დღე საუკეთესო დროა მსგავსი საკითხების მოსაგვარებლად. აქვე. გაარკვიეთ უსაფრთხოების საკითხები, განსაკუთრებით, დაწყებითი კლასების შემთხვევაში, იქნება ეს გატეხილი სკამი, უადგილოდ გამოჩრილი ლურსმანი და სხვა.
თუ ახალ კლასში შედიხართ, აუცილებლად დაგეგმეთ გაცნობის კვირეული. დაიმახსოვრეთ, რომ კლასი ეს მიკროსისტემა, მიკროსაზოგადოებაა, რომელმაც წლის ბოლომდე ერთად უნდა იმუშაოს, შედეგებზე გავიდეს, ამიტომაც გაცნობა, ერთმანეთის სურვილების, ინტერესების გაგება თქვენი მოსწავლეებისა და თქვენთვის ძალიან მნიშვნელოვანი იქნება. ხშირად მეგობრება პირველი შეხვედრიდან, პირველი გაცნობიდან იწყება.რასაკვირველია, თხზულების წერა თქვენთვის და ჩვენთვის კარგად ნაცნობი სათაურით „ როგორ გავატარე ზაფხულის არდაგეგები“ შეგიძლიათ გამოტოვოთ, მაგრამ, თავისთავად ცხადია, რომ გაინტერესებთ სად და როგორ დაისვენეს, რა შთაბეჭდილებებით დაბრუნდნენ, რა წიგნები წაიკითხეს თქვენმა მოსწავლეებმა?
მარტივი ვიზუალიზაცია დაგეხმარებათ, მაგალითად, დაფაზე საქართველოს რუკას გააკრავთ, სადაც ჭიკარტებით ან ფერადი, წებოვანი ფურცლებით მოვნიშნავთ ადგილებს, სადაც ვიმოგზაურეთ ამ ზაფხულში, ამბებსაც მოვყვებით, იქნებ კარგი შემეცნებითი და საინფორმაციო გაკვეთილიც გამოგვივიდეს, ეკოლოგიურ პრობლემებსაც შევეხებით, ადგილობრივი თუ გარე ტურიზმის საკითხებს და მერე, იქნებ ყველამ ერთად მოვნიშნოთ ადგილი, სადაც მთელი კლასი წავალთ ერთად, მაგალითად, საშემოდგომო ექსკურსიაზე.
პირველ კვირაში აუცილებლად წარუდგინეთ მოსწავლეებს თქვენი მუშაობის სამომავლო გეგმა, რას და როგორ აპირებთ, რაში დაგჭირდებათ მათი დახმარება, რა იდეები აქვთ, რას ისურვებდნენ, როგორ ფიქრობენ, რას გირჩევენ და ა.შ. წასაკითხი წიგნების სია, საჭირო საკანცელარიო თუ სასწავლო ნივთები – სჯობს საორგანიზაციო საკითხები პირველ, შედარებით თავისუფალ კვირაში მოაგვაროთ, რომ შემდეგ, სასწავლო გეგმის რთულ ოკეანეში ცურვისას წვრილმანებმა ხელი არ შეგიშალონ.
მაშ ასე, კიდევ ერთხელ ჩამოვთვალოთ ის საკითხები, რაზეც ვამახვილებთ ყურადღებას პირველ კვირაში:
- საკლასო ინფრასტრუქტურა, წიგნები, საკანცელარიო ნივთები, ყველაფერი რაც დაგვჭირდება;
- გაცნობის რიტუალი ( ახალი კლასის შემთხვევაში), ცვლილებები კლასში ( ახალი მოსწავლე თუ გვყავს), რა შეიცვალა, როგორ გავიზარდეთ, როგორია ჩვენი მოტივაცია სწავლისთვის.
- როგორ გავატარეთ ზაფხული, სად ვიყავით, რა ვნახეთ…
- საზაფხულო დავალება – რა წავიკითხეთ, რა მოვისმინეთ…
- პირველი კვირის გეგმა – რას გავაკეთებთ პირველ კვირაში, რა საკითხებს გავივლით, რაზე ვიმუშავებთ.
- მუშაობის სპეციფიკაზე შეთანხმება, იდეების გაზიარება, ახალი გეგმები, შემოთავაზებები;
- რას ვისწავლით წელს და ზოგადად, რას მოგვცემს ახალი სასწავლო წელი;
კიდევ ბევრის დამატება შეიძლება, მაგრამ ეს უკვე თქვენზეა, წარმატებულ სასწავლო წელს გისურვებთ!
