ჩვენს ბავშვებს ძალიან სჭირდებათ რომ წიგნები წავუკითხოთ. აი, ასე მარტივად, ავდგეთ და უბრალოდ წავუკითხოთ. მოსმენა ძალიან მნიშვნელოვანი და საჭირო უნარ-ჩვევაა, რომელიც დროთა განმავლობაში უნდა გამომუშავდეს, უნდა მივეჩვიოთ. აჩქარებული თანამედროვე ტემპი, სოციალური ქსელების თავბრუდამხვევი ‘სქროლვა“, არამხოლოდ ბავშვებს, ჩვენს ნებისყოფას და მოთმინებასაც ამსხვრევს, ძალიან მალე ვიბეზრებთ და კიდევ და კიდვე უფრო მოკლეს, უფრო აჩქარებულ და თავბრუდამხვევ შინაარს ვითხოვთ. ამ სისწრაფეში, ორმოტრიალში და ინფორმაციის ჩანჩქერებში გარბის დრო და დროს მიყვება ჩვენი სიმშვიდეც, გვიჭირს ნელი ტემპით მიმდინარე საუბრებისა და ამბების მოსმენა. უფროსები თავს ვატანთ ძალას და ვუსმინეთ (ჯერ კიდევ), თუმცა ბავშვებისთვის ეს ძალიან რთული პროცესი გახდა. ამიტომ, უჭირთ კლასიკური ლიტერატურის კითხვა, მათი გონება მომართულია რომ რაც შეიძლება მალე გაიგონ როგორ სრულდება ისტორია, უჭირთ წარმოსახვა, უჭირთ სიტყვებითა და ფრაზებით ტკბობა, უამრავი ქართული სიტყვის მნიშვნელობა არ იციან, საბოოლოდ ასეთი ლიტერატურის კითხვა მათთვის მტანჯველ პროცესად იქცევა, არადა კითხვა დამწყები მკითხველისთვის აუცილებლად სიამოვნება უნდა იყოს, ამასთან ერთად კი კარგი, მაღალმხატვრული ტექსტებს პატარა მკითხველი თავიდანვე უნდა მიეჩვიოს, მოკლედ დიდი დილემების წინაშე ვდგავართ დღეს ქართულის მასწავლებლები.
ჰოდა, გადავწყვიტე რომ ქართულის გაკვეთილების რამდენიმე საათი უბრალოდ ბავშვებისთვის ტექსტი, წიგნი წამეკითხა და ბავშვებს უბრალოდ მოესმინათ, თუმცა ამ პროცესმა საბოლოოდ პროექტის სახე მიიღო და ძალიან საინტერესო აქტივობებით დაგვირგვინდა.
წიგნის შერჩევისას ვითვალისწინებთ რომ არ უნდა იყოს მარტივი, “წყალივით” თხრობა, აჯობებს რომ მხატვრული ენითა და საინტერესო ლექსიკური ერთეულებით მდიდარი ტექსტი შევარჩიოთ.
ამ ბოლო დროს, გამომცემლობა “დიოგენე” ძალიან შთამბეჭდავი და საინტერესო წიგნებით ანებივრებს პატარა მკითხველებს, რომლებიც დახვეწილი და შესანიშნავი ილუტსრაციებითაა გაფორმებული და რაც მთავარია მდიდარი, კარგი ქართულით გამოირჩევა. სწორედ “დიოგენეს” ბიბლიოთეკიდან შევარჩიე, სულ ახლახანს გამოცემული კეიტ დაგლას უიგენის “რებეკა ფერმა “მზიანი ნაკადულიდან”.
წიგნის კითხვა უზარმაზარი სიამოვნებაა მათთვის, ვისაც მოენატრა დახვეწილი და საინტერესო სიტყვებით მდიდარი წინადადებები, იუმორი და საოცარი თავგადასავლები.
ამბავი ათი წლის გოგონაზეა, რომელიც თანატოლებიდან გამორჩეულია – ნიჭირებითა და ხასიათით, კეთილი და უტეხი რებეკა უცებ იგებს ადამიანების გულებს, თუმცა ძალიან გაუჭირდა მკაცრი დეიდის გულის მოგება, რადგან რებეკას ჩარჩოებში ჩასმა, იმ დროინდელი სტერეოტიპებით აღზრდა წარმოუდგენელია, რადგან ის სხვა გოგონებს არ გავს, მისი ემპათიის უნარი და ფიქრების სიღრმე თანამედროვე მკითხველის გაოცებასაც კი იწვევს, არამხოლოდ რებეკას დროინდელი საზოგადოების.
წიგნში მთელი სიცხადით წარმოდგება, მასწავლებლისთვის და მშობლებისთვის დღესაც აქტუალური და შეიძლება ითქვას, მტკივნეული საკითხიც, შესაძლებელია ვასწავლოთ ბავშვებს, როცა მათ მიმართ უზარმაზარ სიყვარულს ვერ ვგრძნობთ? ან შესაძლებელია გავზარდოთ ბავშვი, თუ ის, ძალიან, უპირობოდ არ გვიყვარს? რა შეუძლია სიყვარულს? ყველაზე მთავარი, რამ: გავუგოთ ადამიანებს, გავუგოთ ბავშვებს და მათი ქცევების მიზეზებს ჩავწვდეთ, ჩავიდეთ მათ გულებში, ხოლო როდესაც ეს მოხერხდება, ყველა პრობლემა და სირთულე გაფერმკრთალდება, ყველაფერი თავის ადგილზე დადგება.
მე მგონია რომ, ეს წიგნი მასწავლებლებმა აუცილებლად უნდა წაიკითხონ, არამხოლოდ წაიკითხონ, ძალიან ხშირად მიუბრუნდნენ კიდეც, განსაკუთრებით იმ ეპიზოდებს, სადაც რებეკასი და მისი მასწავლებლის ურთიერთობებია აღწერილი. ხოლო მასწავლებლებმა, მოსწავლეებს უნდა წაუკითხონ. აი მაგალითად, ყოველი გაკვეთილის შემდეგ რამდენიმე წუთი დაუთმონ.
ბავშვებს ვთხოვოთ რომ შექმნან “რებეკას ლექსიკონები” – სადაც წიგნიდან ლამაზ სიტყვებსა და გამოთქმებს ჩაინიშნავან, რომლებსაც შემდეგ სამუშაოდ გამოვიყენებთ, ამ ფრაზებზე და სიტყვებზე შექმნიან საკუთარ ტექსტებს, აქცევენ ილუსტრაციებად, მოიგონებენ ამბებს, გამოიყენებენ სათაურებად და ა.შ. ეს ყველაფერი კი მათ ლექსიკურ მარაგზე საოცრად იმოქმედებს..
წიგნში წავაწყდებით ცხოვრებისულ დილემებს, განსაკუთრებით ისეთ დილემებს, რომლების წინაშე მოზარდები ხშირად დგებიან. ამ საკითხებზე შესაძლოა მასწავლებელმა საინტერესო დისკუსიებიც დაგეგმოს.
წიგნის მკითხველები, აუცილებლად მიხვდებიან რა არის და სად არის ჭეშმარიტი ბედნიერება? დღევანდელ, სასტიკად მატერიალიზირებულ სამყაროში, ეს ნამდვილი აღმოჩენა იქნება: ბედნიერება სულ არ გულისხმობს დიდ მატერიალურ დოვლათსა და ფინანსებს, ის იქ არის სადაც უბრალოდ, გულწრფელად უყვართ ერთმანეთი, სადაც ერთმანეთზე ზრუნავენ. ეს შესაძლებელია ბრტყელ სიტყვებად ჩანდეს, თუმცა როდესაც რებეკას გაიცნობთ, მისი სულის სიღმეებში ჩაიჭყიტავთ და დააკვირდებით, გაყვებით ამ უცნაური გოგონას ფიქრების გორგალს, მიხვდებით რომ სულაც არა, ბედნიერება მართლაც რომ მოსიყვარულე და მზრუნველ გარემოშია. ასეთი გარემო შესაძლებელია კლასიც აღმოჩნდეს და ოჯახიც.
აი, მასწავლებელი უკითხვას ამ დიდებულ ტექსტს თავის მოსწავლეებს და თან ფრთხილ კომნეტარებსაც ურთავს, ძველ ამბავს აცოცხლებს და გადმოაქვს ახლა და აქ.
წიგნი სავსეა პოეტური ფრაზებით, ლექსებით – რომლებსაც რებეკა თხზავს, ის სულით და ხორცით პოეტია, მის მიერ დანახული სამყარო და მოვლენები – ლექსის სტრიქონებად იქცევა. რადგან ამ ასაკში ბავშვებს ძალიან უყვართ მიბაძვა, იქნებ და ამ საოცარი პერსონაჟის წამხედურობით, ლექსების წერაც დაიწყონ და დაფარული ნიჭებიც აღმოაჩინონ. და კიდევ ერთი იდეა, წიგნის კითხვისას, ბავშვები შექმნიან კიდევ ერთ რვეულს: “რებეკას პოეზია” – სადაც გასაქანს მისცემენ საკუთარ ფანტაზიასაც, თავადც გახდებიან პოეტები და მხატვრები. დახატულს ხომ აუცილებლად ილუსტრაციებით გააფორმებენ, ხატვა ყველა ბავშვს უყვარს (თითქმის ყველა ბავშვს).
წიგნის დასრულებისას შესაძლოა შემაჯამებელი ღონისძიებაც დაიგეგმოს, რომელიმე ეპიზოდი გააცოცხლონ და გაითამაშონ – ჩვენმა ბავშვებმა, ან წიგნის პროცესში შექმნილი რვეულები გაუზიარონ ერთმანეთს, ან მშობლებს, სტუმრებს. წაიკითონ საკუთარი ლექსები, მოთხრობები. მოკლედ, უამრავი იდეა გაცოცხლდება და შეისხმას ფრთებს, თუ კი რებეკას ახლოდან გაიცნობთ და გააცნობთ თქვენს მოსწავლეებს. საბოლოოდ, კი მართლაც გირჩევთ, რომ ამ განსხვავებულ, კეთილ და ნიჭირ გოგონას თქვენს კლასებში და თქვენი მოსწავლეების გულებში ბინა მიუჩინოთ.
