პირველ კლასში ანბანის შესწავლა ხანგრძლივად მიმდინარეობს,რასაც მოსდევს შედარებით მცირე ხანგრძლივობის ანბანის შემდგომი პერიოდი (2-3) თვე. ეს მიდგომა მთავარ ორიენტირად სწორედ ანბანური პრინციპის სრულად ათვისებას ისახავს მიზნად და დროც , ძირითადად, მარცვლებისა და სიტყვების უშეცდომო დეკოდირებაზე იხარჯება. მიდგომის სუსტი მხარე ისაა, რომ ბავშვები ნაკლებად ვარჯიშობენ ტექსტების გაგება-გააზრებაზე, სიტყვებისა და წინადადებების მნიშვნელობის წვდომაზე, კონტექსტური მინიშნებების გამოყენებაზე.
წინასაანბანო პერიოდში – მნიშვნელოვანია სასწავლო აქტივობებს დაემატოს ფონოლოგიური სავარჯიშოები,სიტყვების ლოგოგრაფიულად ცნობის სავარჯიშოები, ერთობლივი კითხვა და ა.შ.
საანბანო პერიოდში – სისტემური ხასიათი უნდა მიეცეს ასო-ბგერების შესწავლასა და მრავალფეროვანი ტექსტების გამოყენებას, რათა მოსწ. არ დაკარგონ კითხვის მოტივაცია. შევთავაზოთ მათთვის ავთენტური ,საინტერესო კონტექსტიდან ზღაპრებიდან ,ილუსტრაციებიდან აღებული სიტყვები და ფრაზები, შეგვიძლია უკვე მრავალგზის ნაცადი სავარჯიშოების მოდიფიცირებული ვარიანტების შეთავაზება.
ანბანის შემდგომ პერიოდში – ვარაუდების გამოთქმა,წაკითხულის წარმოსახვაში გაცოცხლება,შეკითხვების დასმა,პარალელების გავლება პირად ცხოვრებასთან.
- რესურსი: მარკერი, მუყაო,ჯამი, კოვზი,ქაღალდის ან პლასტმასის თეფში,სათამაშო ფული.
- რას გააკეთებენ? მოსწავლეები ,,გამოაცხობენ’’ სიტყვებს ასოების პატარა ბარათებით.
- რას შეძლებენ? განიმტკიცებენ ანბანის ცოდნას,განივითარებენ დეკოდირების უნარს, გაიაქტიურებენ სიტყვების ვერბალური და ვიზუალური ხატის ერთმანეთთან დაკავშირების უნარს
დაგეგმვის ეტაპები
- მასწავლებელი წინასწარ ჩამოწერს მუყაოზე ან ფურცელზე ანბანის ასოებს,დაჭრის მათ პატარა კვადრატებად. მნიშვნელოვანია, რომ ანბანის ხუთივე ხმოვანი მინიმუმ ორ-ორ ბარათზე იყოს დაწერილი.
- მასწავლებელი ეუბნება მოსწავლეებს ,რომ ისინი ითამაშებენ მზარეულობანას ანუ ექნებათ საცხობი და ,,გამოაცხობენ’’ ,,გემრიელ’’სიტყვებს. ფქვილისა და შაქრის ნაცვლად გამოიყენებენ ასო-ბგერების ბარათებს.
- მასწავლებელი სთხოვს მოსწავლეებს ,რომ ერთად შეადგინონ მენიუ და ჩამოწერონ,რომელი სიტყვების ,,გამოცხობა’’ შეუძლიათ.(მასწავლებელი თავად წერს ამ სიტყვებს დაფაზე). ეს სიტყვები შეიძლება იყოს შესწავლილი თემიდან ან მათ მიერ დასახელებული.
მსვლელობა
მასწავლებელი ანაწილებს როლებს: ნაწილი იქნება ,,მცხობელი’’ , ნაწილი -,,მყიდველი’’.მცხობელები ჯამში ჩაყრიან ასო-ბგერების ბარათებს და კოვზით არევენ. მყიდველები ნახავენ მენიუს და მისცემენ შეკვეთას.მას შემდეგ რაც მცხობელი გაიგონებს შეკვეთილ სიტყვას,აურევს ინგრედიენტებს, შემდეგ ჩაიხედავს ჯამში იმ ასოების მოსაძიებლად,რომლებიც შეკვეთილ სიტყვაშია. დააწყობს თეფშზე და ეუბნება მყიდველს,რომ მისი შეკვეთა მზადაა. თუკი სიტყვა სწორადაა დაწერილი მყიდველი გადაიხდის საფასურს და მადლობას ეტყვის მზარეულს. თუკი სიტყვა არასწორადაა დაწერილი მყიდველი ეტყვის მზარეულს ,რომ ეს არ არის მისი შეკვეთა და შესაძლებელია დაეხმაროს შეცდომის მოძებნაში.
- მოგვიანებით მოსწავლეები გაცვლიან როლებს.
შედეგების ანალიზი
რას მიაღწია მოსწავლემ?
- აღნიშნული აქტივობა დაეხმარა მოსწავლეებს სიტყვების სწორად და სწრაფად დეკოდირებაში,რომელიც გაწაფული კითხვის სწავლება-სწავლის საკვანძო მიზანია. ისინი უშეცდომოდ, სწრაფად, დანაწევრების გარეშე კითხულობენ.ადრეულ ეტაპზე დაძლიეს კითხვის ტექნიკური ბარიერები. მათ დროულად ისწავლეს ასო-ბგერები და ანბანური პრინციპის გამოყენება.დაეუფლენ სიტყვის გონებაში გახმოვანებას/გაბგერებას და მისთვის მნიშვნელობის მინიჭებას. გარდა ამისა, ეს აქტივობა მოსწავლეებს დაეხმარა ზეპირმეტყველების უნარის გავარჯიშებაში და მიმართვის დროს თავაზიანი ფორმების გამოყენებაში.
რეკომენდაცია
- მნიშვნელოვანია, რომ მასწავლებელმა ხშირად ცვალოს თამაშები და სავარჯიშოები, რადგან პირველკლასელი მოსწავლეებისთვის დამღლელია ყოველდღიურად და ყოველკვირეულად ერთსა და იმავე აქტივობაზე მუშაობა.სასურველია აქტივობის დაწყებამდე მისი მოდელირება. კონკრეტული აქტივობის წარმართვას მინიმალური მომზადება და რესურსი ესაჭიროება, რითაც შესაძლებელია ადრე ნასწავლი სიტყვების, ასო-ბგერების გამეორება/ გახსენება, ახალი სიტყვების მარტივად შესწავლა, ლექსიკური მარაგის გამდიდრება და გადამოწმება. ამ აქტივობის განხორციელება შეიძლება საკლასო ოთახის გარეთ, ასევე ექსკურსიებსა და სხვა ღონისძიებებზე.
