ელექტრონული საგანმანათლებლო რესურსების გამოყენებას უდიდესი როლი ენიჭება სწავლების პროცესში, რადგან მისი საშუალებით შესაძლებელია ტრადიციული მეთოდების თანამედროვე მოთხოვნებთან შესაბამისობაში მოყვანა, იზრდება მოსწავლეთა მოტივაცია, გაკვეთილიც სახალისო და საინტერესო ხდება.
წარმოგიდგენთ დამხმარე ელექტრონულ რესურსს, საანბანო პერიოდის შემაჯამებელ სავარჯიშოებს, რომელიც შექმნილია პირველი კლასის ქართული ენისა და ლიტერატურის სახელმძღვანელოსთვის – ,,მშობლიური ენის კვალზე’’ (ავტორები: ნინო გორდელაძე, გვანცა ჩხენკელი, თანაავტორი – ლელა მანგოშვილი).
ვიდრე დამხმარე რესურსს გაგაცნობთ, გთავაზობთ სახელმძღვანელოსა და მოსწავლის რვეულის მოკლე მიმოხილვას, რათა თვალსაჩინოდ იყოს წარმოჩენილი წინარე ცოდნა-გამოცდილება, რომლის საფუძველზეც შესაძლებელია შემაჯამებელი სავარჯიშოების შესრულება.
სახელმძღვანელო და მოსწავლის რვეული ანბანის შესწავლისას ეფუძნება იაკობ გოგებაშვილისეულ მეთოდს; ამავდროულად, გათვალისწინებულია ზოგადი განათლების ეროვნული მიზნები და მესამე თაობის ეროვნული სასწავლო გეგმის მოთხოვნები გრძელვადიან სამიზნე ცნებებსა და სტანდარტის შედეგებზე დაყრდნობით.
სრულად შენარჩუნებულია იაკობ გოგებაშვილისეული ასოთა თანამიმდევრობა.
წერა ასოების გაცნობის პარალელურად იწყება. მოსწავლის რვეულსა და წიგნში წარმოდგენილია გამოსაწერი ასოები, სიტყვები, წინადადებები, ასევე – მრავალფეროვანი სავარჯიშოები: მოძებნე და გახაზე ასო; ჩაწერე გამოტოვებული ასო; დაასახელე, რა ხატია და ჩაწერე პირველი ასო; შეადგინე სიტყვები მოცემული ასოებით/მარცვლებით; იპოვე სწორად დაწერილი სიტყვა; შეადგინე სიტყვები და ჩაწერე; დამარცვლე სიტყვა; ჩაწერე რამდენი მარცვალია სიტყვაში; შეავსე ხმოვნებით; გახაზე ერთმარცვლიანი/ორმარცვლიანი/ სამმარცვლიანი სიტყვები; მოიფიქრე საჭირო ასო, რომ გამოვიდეს სიტყვა; არეული ასოები ისე დაალაგე, რომ სიტყვა გამოვიდეს და ა.შ.
სამი ასოს (ა, ი, თ) შესწავლის შემდეგ სასურველია, გამოვიყენოთ დახმარე ელექტრონული რესურსი (იდეის ავტორი – ნინო გორდელაძე), რომელიც შეაჯამებს ცოდნას, გაზრდის მოსწავლეთა მოტივაციას და სასწავლო პროცესს სახალისოს გახდის.
შენიშვნა: საპრეზენტაციო რეჟიმში გადასაყვანად დააჭირეთ ღილაკს SlideShow, რადგან, მაუსის ღილაკზე შეხებით ჩნდება სურათები და წარწერები.
პრეზენტაციაში წარმოდგენილია სავარჯიშოები:
- გავიხსენოთ სიტყვები, რომლებიც ,,ა’’ ასოზე იწყება (ასევე ,,ი’’ და ,,თ’’ ასოზე);
- დავასახელოთ სიტყვები, დავაკვირდეთ, რომელ ასოზე იწყება თითოეული სიტყვა? რომელია ზედმეტი? რატომ? (ზედმეტია სიტყვა დათვი, რომელიც ასო ,,დ’’-ზე იწყება);
- ვივარჯიშოთ კითხვაში;
- დავმარცვლოთ სიტყვები:
- დავაკვირდეთ მარცვლებს და შევადგინოთ სიტყვები;
- წავიკითხოთ წინადადებები;
- დავალაგოთ არეული ასოები, რომ სიტყვა მივიღოთ;
- ვიპოვოთ გამოტოვებული ასო;
შემაჯამებელი სავარჯიშოების ბოლო სლაიდები დათმობილი აქვს გამოცანას, რებუსს და კროსვორდს.
მასწავლებელს შეუძლია, წარმოდგენილი რესურსის მსგავსად, ანბანის შესწავლის პროცესში შექმნას მსგავსი სავარჯიშოები.
ჩამოსატვირთი ვერსია:
ასოები- ა,ი, თ – შემაჯამებელი სავარჯიშოები
