ეს ჩემი პირველი პოსტია 2013-ში. გასული წელი ჩემთვის მეტ-ნაკლები წარმატებით მიილია. დადებითი წელი იყო, რამდენიმე მართლაც კარგი მოგონება დამიტოვა, მათ შორის – მუსიკალურიც. რაც მთავარია, ამ ინტერნეტგაზეთში წერა და იდეების თქვენთვის გაზიარება დავიწყე. საკმაოდ ბევრი პოსტი დამიგროვდა და ეს უფრო მეტად მახარებს.
ვფიქრობ, 2013 მუსიკალურად უფრო დატვირთული უნდა იყოს. ახლო მომავალში მეგობრებთან ერთად ერთი საინტერესო პროექტის პრეზენტაციას ვგეგმავ, სადაც მუსიკოსის როლში თავად მოგევლინებით 🙂 ასევე ველოდები რამდენიმე კარგ ფესტივალს და, რაც მთავარია, აგვისტოში Pink Floyd-ის ბასისტის, როჯერ უოტერსის კონცერტზე მივდივარ სტამბულში, ლეგენდარულ “კედელს” უნდა მოვუსმინო ცოცხლად. ბილეთები უკვე ნაყიდი მაქვს, ისღა დამრჩენია, ყველაფერი დავგეგმო და დაველოდო, როდის გავა 8 თვე.
თუმცა აგვისტომდე შორია და მოდი, დღეს სხვა თემაზე ვისაუბრებ.
პოსტის სათაურზე დიდხანს ვფიქრობდი. არ მინდოდა, ზედმეტად დამრიგებლური გამოსულიყო, რომ მკითხველი არ გაეღიზიანებინა. ბოლოს მაინც გადავწყვიტე, გამერისკა და ამ პუბლიკაციისთვის “რას ვუსმინოთ?” დამერქმია. მინდა, თავიდანვე აღვნიშნო: გემოვნებაზე დავას არ ვაპირებ, რადგან ჩემთვის თავისუფალ არჩევანზე უპირატესი უფლება არ არსებობს. უბრალოდ მიმაჩნია, რომ მუსიკის ზოგიერთ ჟანრს ჩვენთვის როგორც ინდივიდებისთვის ოდნავ მეტი სარგებლობის მოტანა შეუძლია.
მუსიკა პიროვნების ჩამოყალიბებაზე დიდ გავლენას რომ ახდენს, ამაში პირადმა გამოცდილებამაც დამარწმუნა. ასაკის მატებასთან ერთად ამჩნევ, როგორ გეხვეწება გემოვნება და პოულობ ახალ ჟანრებს, რომლებიც გაინტერესებს. მერე ეს ინტერესი უფრო და უფრო ძლიერდება და ღრმად გითრევს, სანამ ემოციურად ბოლომდე არ ამოგწურავს და ახლის ძიებას არ დაიწყებ.
მოდი, თავს უფლებას მივცემ და ჩემს შეხედულებას გაგაცნობთ იმის თაობაზე, მუსიკის რა ჟანრები იქნებოდა სასარგებლო მოსწავლეებისთვის:
მიმაჩნია, რომ არ იქნება ურიგო, თუ მოსწავლეები ადრეულ ასაკში სხვადასხვა ხალხის ეთნომუსიკას გაეცნობიან, წარმოდგენა რომ შეექმნათ როგორც ქართული, ასევე საზღვარგარეთული კულტურის აუთენტურ ნამუშევრებზე. დიდ პატივს ვცემ ქართულ ეთნომუსიკას, მაგრამ მიმაჩნია, რომ მოსწავლეები არ უნდა იზრდებოდნენ იმ განცდით, რომ მათი კულტურა ვინმესაზე უპირატესია. ქართული მუსიკა ნამდვილად ღირსეულ ადგილს იკავებს მსოფლიო კულტურაში, მაგრამ სხვა ხალხებსაც არანაკლებ საინტერესო და ღირებული ნამუშევრები აქვთ, რომელთა გაცნობაც ნამდვილად ღირს. მაგალითად ზემოთ მოყვანილი ჩანაწერიც კმარა. კულტურული მრავალფეროვნების აღქმა მოზარდებს უცხო ერების მიმართ პატივისცემას ჩაუნერგავს და ნიდაგს მოამზადებს მათი თანამედროვე საზოგადოების ღირსეულ წევრებად ჩამოყალიბებისთვის.
ემოციათა დაბალანსება ყველასთვის ერთნაირად საჭიროა, ამიტომ ურიგო არ იქნებოდა, თუ მასწავლებლებიც აქტიურად მოუსმენდნენ მუსიკას, რომელიც საჭირო ემოციების მიღებაში გვეხმარება. მზა რეცეპტს ვერ შემოგთავაზებთ, თუმცა ერთი რამ დანამდვილებით ვიცი – გაკვეთილი მშვიდმა, გაწონასწორებულმა და კეთილგანწყობილმა, კარგ გუნებაზე მყოფმა ადამიანმა უნდა ჩაატაროს. ყურადღების კონცენტრირებისთვის და საკუთარ თავში დასარწმუნებლად კარგია როგორც კლასიკური მუსიკა, ასევე ბლუზი და სოული. შეიძლება, შიგადაშიგ ჯაზიც შეურიოთ – მერწმუნეთ, მოგეწონებათ.
