ონლაინტექნოლოგიების განვითარებამ ტრადიციული სასწავლო გეგმის ბედი და მომავალი ვეებერთელა კითხვის ნიშნის ქვეშ დააყენა. საქმე ისაა, რომ ონლაინტექნოლოგიების მეშვეობით სასწავლო გეგმაში გარკვეული ფუნდამენტური ცვლილებების შეტანა გახდა საჭირო, რათა მასწავლებლებსა და მოსწავლეებს თანამედროვე ტექნოლოგიებისთვის აეწყოთ ფეხი. შესაბამისად, მსოფლიო განათლების სისტემაში გარდაუვალი გახდა სასწავლო გეგმების ცვლილება.
მაშ, რა ახალი ელემენტები შეიძინა სასწავლო გეგმამ მსოფლიოს სხვადასხვა ქვეყანაში? როგორ შეკვეცეს და რა დაამატეს მას?
პირველი საკითხი ახალი საგანი (International Baccalaureate (IB) Program) – საერთაშორისო საბაკალავრო პროგრამებია. მაგალითად, თუ 2009 წლისა და 2015 წლის შედეგებს ერთმანეთს შევადარებთ, ვნახავთ, რომ მსოფლიოში საერთაშორისო განათლების მისაღებად მოსამზადებელი სპეციალური გაკვეთილები სკოლებში 46%-ით გაიზარდა. მაჩვენებელი ასეთია – მსგავსი გაკვეთილები სხვადასხვა ქვეყნის უკვე 3 968 საკლასო ოთახში ტარდება და 4 972 განსხვავებული შეთავაზება მოქმედებს.
რას გულისხმობს საერთაშორისო საბაკალავრო პროგრამების გაკვეთილები? საქმე ისაა, რომ სწორედ 3 968 სკოლაში დამამთავრებელი კლასების მოსწავლეებს (10-11 კლასი) კვირაში ერთხელ ან ორჯერ უტარდებათ პრეზენტაციები იმ უნივერსიტეტების შესახებ, სადაც ისინი, სავარაუდოდ, სწავლას გააგრძელებენ. პრეზენტაციები კონკრეტული უნივერსიტეტების ისტორიასა და მათ განვითარებას, მიმდინარე ფაკულტეტების სასწავლო მიმართულებებსა და საგნებს შეეხება. მათ აწოდებენ ინფორმაციას ლექტორებისა და სასწავლო ლიტერატურის შესახებაც. ახლოს აცნობენ, თუ როგორ შეიძლება კონკრეტულ უნივერსიტეტში სასწავლო გრანტის მოპოვება; ასევე, რა კლასგარეშე აქტივობები აქვთ მათ და რისთვის არის რეკომენდებული განათლება და დიპლომი, რომელსაც მოსწავლეები მომავალში მიიღებენ. მსგავსი გაკვეთილები სკოლაში ძალიან ეხმარება მოსწავლეებს, ახლოს გაიცნონ მომავალი საბაკალავრო ცხოვრება და ზუსტად განსაზღვრონ, თუ სად სურთ სწავლის გაგრძელება.
მეორე ცვლილება, რაზეც მსოფლიოს არაერთი სკოლა ერთხმად შეთანხმდა მედიაწიგნიერებაა. მედიაწიგნიერება ის მთავარი საკითხი აღმოჩნდა, რომელიც თანამედროვე გლობალიზებულ სკოლას აუცილებლად სჭირდება.
ეს საგანი მასწავლებლების მთავარი იარაღი გახდა, რათა ისინი დარწმუნებული იყვნენ, რომ მათი მოსწავლეები აბსოლუტურად ზუსტად გაართმევენ თავს ინტერნეტში მასალების სწორად გარჩევას და შეძლებენ ონლაინსამყაროს ქაოსისთვის თავის გართმევას. მედიაწიგნიერება მოსწავლეებს შეასწავლის ყველაფერს, რაც ინტერნეტს ინფორმაციის მიღების საუკეთესო წყაროდ აქცევს. ამ საკითხს სხვადასხვა ასაკის სტუდენტებს სხვადასხვანაირად შეასწავლიან. მაგალითად, დაწყებითი კლასების მოსწავლეები სწავლობენ, როგორ დაიცვან თავი ინტერნეტის გამოყენების დროს არასასურველი ინფორმაციისგან, როგორ მოიძიონ ინფორმაცია სწორად. ამ დროს უფროსკლასელები სწავლობენ, როგორ გააუმჯობესონ ვიკიპედიაზე გამოქვეყნებული სტატია.
