ბატონი ამაირო

ქალაქ კურიტიბასთან ახლოს, ბრაზილიის ერთ პატარა სოფელში, არაფრით გამორჩეულ ციცქნა სახლში ცხოვრობს კაცი, რომელსაც ფეხბურთში რევოლუციის მოხდენა აქვს განზრახული.

“რევოლუცია” მხოლოდ ხმამაღალი სიტყვა როდია. ჟორჟე ამაირო ფიქრობს, რომ თანამედროვე ფეხბურთის “გაკეთილშობილების” მისია განგებამ სწორედ მას დააკისრა და ისიც ჭაპანწყვეტით, მაგრამ მაინც ეზიდება ამ “მძიმე ტვირთს”.

ეს ამბავი დაახლოებით 10 წლის წინ, “კურიტიბა”-“კოლო-კოლოს” შორის ლიბერტადორესის თასზე ბრაზილიაში გამართული მატჩით დაიწყო. მატჩი დიდი ვერაფერი სანახავი გამოდგა, მაგრამ კონკრეტულად თამაშზე მნიშვნელოვანი ის იყო, რომ პირველი ტაიმის დასრულების შემდეგ, “კურიტიბას” გულშემატკივართა ტრიბუნიდან ოცდაათიოდე კაცი პოლიციელებს გაუსხლტა, საფეხბურთო მოედანზე გავარდა და მათგან ერთ-ერთმა, ანუ ჟორჟე ამაირომ დიდი მეგაფონის დახმარებით ხმამაღლა გამოაცხადა, რომ “დღეს პლანეტაზე ფეხბურთი მაფიის ხელშია, ფეხბურთელები და მწვრთნელები მატჩების ბედს ვეღარ წყვეტენ და მთელი კაცობრიობა უნდა დაირაზმოს ფეხბურთის მმართველი ბოსების წინააღმდეგ, რომლებმაც ფეხბურთი კაზინოდ აქციეს”.

ამის თქმა კი მოასწრო და საპოლიციო სპეცრაზმმა დიდი მუჯლუგუნებითა და ცემა-ტყეპით გამოათრია სტადიონიდან. თუმცა ის მატჩი ჟორჟე ამაიროს მიერ წამოწყებული მოძრაობის დასაწყისი აღმოჩნდა და მთელ ბრაზილიაში უკვე საკმაოდ ბევრმა იცის ამ უცნაური ადამიანის არსებობის შესახებ.

ჟორჟე ამაიროსთან ჟურნალისტები და ტელერეპორტიორები პრაქტიკულად არ დადიან. ამას პირადად ჟორჟე საფეხბურთო მაფიის მიერ მასზე დაწესებული აკრძალვებით ხსნის. ეს კი არა და, ჟორჟე ამაირო იმდენად გაანაწყენეს ჩვენმა ბრაზილიელმა კოლეგებმა, რომ სასამართლოს ძალით მოითხოვა, მისი ფოტოსურათები არ გავრცელებულიყო და არსად დაბეჭდილიყო. სასამართლომ მისი ეს მოთხოვნა ნაწილობრივ დააკმაყოფილა, მაგრამ იმ მოძრაობას, რომელსაც ეს ახირებული, მაგრამ უზომოდ პატიოსანი კაცი უდგას სათავეში, სწორედ ასეთმა მიდგომებმა გაუჩინეს მრავალი პრობლემა.

მოძრაობას კონკრეტული დასახელება არ გააჩნია. საკუთრივ სიტყვა “მოძრაობაც” შესაძლებელია ვერ გამოხატავდეს ყველაფერს. უბრალოდ, არსებობს ადამიანთა საკმაოდ დიდი გუნდი, რომელიც ჟორჟე ამაიროს თაოსნობით პერიოდულად იკრიბება, მსჯელობს და თანამედროვე ფეხბურთი არსებული პრობლემების გამო საფეხბურთო მმართველი ორგანიზაციების მისამართით მეტად მძაფრ პროტესტს გამოთქვამს.

როგორც ირკვევა, სულ ცოტა ხნის წინ, ჟორჟემ და მისმა მეგობრებმა ბრაზილიის რამდენიმე ქალაქში უზარმაზარი ტრანსპარანტები გამოფინეს, სადაც ბრაზილიელი საფეხბურთო ჩინოვნიკების გვარ-სახელების გასწვრივ მათ მიერ ფეხბურთში ნაშოვნი მილიონების რაოდენობაც ეწერა. თუ ეს ხალხი ამ ყელაფერს დეტალურად მოძიებული ინფორმაცის შესაბამისად ამბობდა, საქმე მართლაც საგანგაშოდ ყოფილა, რადგან ბრაზილიის საფეხბურთო ელიტის სულ პატარა ჩინოსანის გვარ-სახელის გასწვრივაც კი ტრანსპარანტზე რამდენიმე მილიონი დოლარი ეწერა.

ამაიროსა და მის ხალხს უმეტესობა გიჟად თვლის და სოლიდური ბეჭდური გამოცემები მასზე თითქმის არასოდეს წერენ. ტელევიზიით თუ რამე გადაიცემა, უმეტესად ისეთ გადაცემაში, რომელსაც “გასართობი გადაცემა” ჰქვია და ამ გადაცემების ჭკუამხიარული მაყურებლისთვის ამაიროს მიერ გამოთქმულ პროტესტსა და ორ ფეხზე მოცეკვავე გაწვრთნილ ძროხას ერთი ფასი და დანიშნულება აქვს. საფეხბურთო გადაცემები კი ამაიროს ბიჭების აქტივობებს თუ აჩვენებენ მუდამ ისეთი კონტექსტის თანხლებით, რომ ზედმეტად კრეატიული უნდა იყო, მათთან გაერთიანება რომ მოგინდეს.

მაგრამ ეს ადამიანები მაინც ჯიუტად ცდილობენ საზოგადოებისათვის თავის შეხსენებას და მათი მოძრაობის მთავარი ძალა, სულის ჩამდგმელი და კოზირი სწორედაც რომ უცნაური, მაგრამ უპატიოსნესი კაცი – ჟორჟე ამაიროა.

როგორც ამბობენ, მავანმა ფულიანმა და საეჭვო ღირსების “ბიძებმა” ჟორჟეს რამდენჯერმე შესთავაზეს ფული გაჩუმებისა და ამ საქმიანობისათვის თავის დანებების სანაცვლოდ, მაგრამ ამაირო ჯიუტად არ ჩერდება, ცხოვრობს პატარა სოფელში, თავის მოცუცქნულ სახლში, ბელადივით წინ მიუძღვება მასსავით უცნაურ, მაგრამ გულანთებულ ბიჭებს და ბოლომდე სჯერა, რომ ახალი საფეხბურთო რევოლუცია სწორედ მისით და მისი მეგობრების გამოისობით დაიწყება.

კომენტარები

comments