ნაწილი მეოთხე
თუ წინა წერილებში გმირის, მისი გარემოცვისა და ანტაგონისტების შექმნაზე ვივარჯიშეთ, ახლა წერაში გასაწაფად პატარა სავარჯიშოები დაგვჭირდება, რომელიც მასწავლებლის დახმარებით შეგვიძლია რამდენიმე შეხვედრაზე გადავანაწილოთ.
თავი მეორე
ამ თავში ბევრი პრაქტიკული, ოდნავ მოსაწყენი სავარჯიშო შეგხვდებათ, მაგრამ თქვენი დაოსტატებისთვის აუცილებელია ეს Level-იც გაიაროთ, რათა ნამდვილი მწერლებისთვის მისაცემ დავალებას ადვილად გაუმკლავდეთ.
სავარჯიშო პირველი
აღწერეთ თქვენი გმირის საყვარელი ამინდი, რაც შეიძლება დეტალურად.
სავარჯიშო მეორე
გადმოეცით, რას გრძნობს თქვენი გმირი, როდესაც საყვარელ მუსიკას უსმენს, უყურებს ფილმს, რომელიც ათასჯერ უნახავს, მაგრამ არ ბეზრდება, მიირთმევს ყველაზე მაგარ კერძს და ასე შემდეგ.
სავარჯიშო მესამე
მოიფიქრეთ 5 განსხვავებული სიტუაცია, სადაც თქვენი გმირი იქნება აღწერილი. აუცილებელი პირობაა, რომ ხუთივე ამბავში ხუთი მთავარი გრძნობა მონაწილეობდეს: ყნოსვა, გემო, შეხება, სმენა, ვიზუალი.
სავარჯიშო მეოთხე
პერსონაჟი კრიზისის დროს. როგორ იქცევა ის? მოიფიქრეთ პატარა ამბავი, სადაც რომელიმე ბუნებრივი კატაკლიზმა იქნება აღწერილი: გრიგალი, ცუნამი, მიწისძვრა, ვულკანის ამოფრქვევა თუ სხვა. ახლა, როგორც ნამდვილ მწერლებს შეუძლიათ, ლოგიკურად, სწორედ აქ, ამ ვითარებაში თქვენი პერსონაჟი შემოიყვანეთ და ვნახოთ, როგორ მოიქცევა ის ძაალიან რთულ ვითარებაში.
სავარჯიშო მეხუთე
მოიფიქრეთ და დეტალურად აღწერეთ დღე, რომელიც თქვენმა გმირმა საუკეთესოდ გაატარა.
მაგალითი:
ერთ დღეს ბუსი ალისას დაბადების დღისთვის საყიდლებზე წავიდა. წასვლამდე კარგად გამოეწყო, რადგან ალისას თქმით, დაბადების დღეზე ადამიანს სადღესასწაულოდ უნდა ეცვას, ჩაიცვა ლამაზი პიჯაკი, ჰალსტუხი, ასევე ძვირადღირებული სუნამო და საათიც გაიკეთა. ჯინსის შარვალი ვერ ნახა და ნაჭრისა ჩაიცვა. 30 კილომეტრის გავლა მოუწია და შარვალმა ცოტა დაღალა, მაგრამ რას იზამდა?
სამაგიეროდ, ალისას ლამაზი კაბა და მზის სათვალე უყიდა (მიუხედავად იმისა, რომ სულ ჩხუბობდნენ, ბუსის თავისი ცელქი და მსოფლიოში ყველაზე მეტად უყვარდა). საბოლოო ჯამში 203 დოლარი დახარჯა მარტო ალისას საჩუქრებში, მთლიანობაში კი იმ დღეს, 607 დოლარი შემოეხარჯა. რა ექნა, რამდენი გასართობიც ნახა, ყველგან გაუწია გულმა.
ალისას ძალიან გაუხარდა საჩუქრები და თქვა, რომ ეს მის ცხოვრებაში საუკეთესო საჩუქრების მიღების დღე იყო, რამაც ბუსის გული აუჩუყა და კინაღამ თავიდან წავიდა საყიდლებზე.
დაბადების დღეზე ბილიც მოიწვიეს და ბუსიც ალისასთან დაახლოებაში დაეხმარა საუკეთესო მეგობარს.
ალისასთან ერთად, სტუმრებმა საჩუქრები ბუსისაც მოუტანეს. ბიჭი ისე გაახარა ამ ამბავმა, გადაწყვიტა მეორე დღეს სკოლაში ასე სადღესასწაულოდ გამოწყობილი წასულიყო და ცოტა ემაიმუნა კიდეც ჰალსტუხიანს, მაგრამ აღმოჩნდა, რომ რაც მას სასაცილო ეგონა, კლასელებისთვის და მასწავლებლებისთვის „Wow” ამბავი იყო და ბუსის პოპულარობა ერთ დღეში უცბად გაიზარდა.
„რა კარგი ყოფილა ჩემი დის დაბადების დღე!“ გაიფიქრა ბუსიმ, „ნეტავ ყოველ დღე იყოს! იდეალურად ვიცხოვრებდი!“
სავარჯიშო მეექვსე
მოიფიქრეთ და აღწერეთ დღე, რომელიც ყველაზე უსიამოვნო და მძიმე იყო თქვენი გმირის შემთხვევაში
მაგალითი:
ერთ დღეს ბუსი და მამამისი ჰენრის ბაბუის დაბადების დღეზე წავიდნენ. როგორც გახსოვთ, ამ კაცის ორივეს მაგრად ეშინოდა, რადგან სულ წესრიგს და კარგად მოქცევას ითხოვდა შვილიშვილისა და შვილთაშვილისგან. ახლა კი მისი იუბილე იყო (90 წლისა გახდა) და ჰენრიმაც მკაცრად გააფრთხილა შვილი, იცოდე, თოჯინასავით იჯექი სანამ იქ ვიქნებით, თორემ ორივეს გამოგვაპანღურებენო.
დიდი ბაბუა იუბილეს სახლში აღნიშნავდა. სტუმრად თანამშრომლები , მეგობრები, შვილები და მათი ოჯახები ჰყავდა და ძალიან ბედნიერი იყო ამ დღით.
„იცოდე, ჰენრი, არ დააგვიანო! ოთხზე ვსხდებით!“ – გააფრთხილა ბაბუამ ბუსის მამიკო, ამიტომაც, შეშინებულმა კაცმა სახლიდან ორი საათით ადრე გასვლა გადაწყვიტა, მაგრამ ბედი არ გინდა? ისეთ საცობში მოყვნენ, სამი საათი კუსავით მიღოღავდნენ.
სახლში ტარაკნებივით შეიპარნენ მამა და შვილი. ბაბუამ ორივე შენიშნა, მაგრამ საყვედურის ნაცვლად ხმამაღლა წარუდგინა მეგობრებს, ჩემი საამაყო და ცელქი შვილიშვილი და მისი ჭკვიანი ბიჭუნა მესტუმრნენ როგორც იქნაო.
ბუსი სუფრასთან გასუსული იჯდა. ათასნაირი საჭმელი ელაგა და ყველას ჭამა უნდოდა, მაგრამ სად ჰქონდა შენიშვნების თავი, ამიტომ მხოლოდ ის მიირთვა, რაც ნათესავმა ქალმა თეფშზე დაუდო.
სტუმრები 9 საათისთვის წავიდნენ. ჰენრიმ ბაბუას უთხრა, რომ ისინიც აპირებდნენ წასვლას, რომ შინ დროულად მისულიყვნენ. დაემშვიდობნენ ყველას და უკანა გზაზე ისევ უზარმაზარ საცობში აღმოჩნდნენ. ამჯერად, 2 საათის მანძილზე 12 კილომეტრი ძლივს გაიარეს. ამაზე სწრაფად ადამიანი ფეხით დადის მგონი, ამიტომ ბუსიმ ძალიან მოიწყინა. 3 საათი ერთი გზა, სამიც მეორე და მანქანაში არაფერი ხდება საინტერესო!
ხომ არ გავაჩეროთ სადმე და ბაბუასთან მივბრუნდეთ იქ დავრჩეთ? შესთავაზა მამამ ბუსის, მაგრამ ბიჭი წინააღმდეგი იყო. ვერ იტანდა იმ სახლს და კედლის საათიდან გამომხტარ კოდალას.
ბუსის სახლამდე კიდევ 82 კილომეტრი იყო. ბიჭი გუნებაში ითვლიდა, თუ ორ საათში 12 კილომეტრი გავიარეთ, ესე იგი…
მაგრამ მალე საცობი გაიხსნა. მართალია, უკვე ღამის პირველი საათი იყო, მაგრამ ცოტაც და სახლში მივიდოდნენ. ჰენრიმ გაზის პედალს ფეხი დააჭირა და… მანქანაც გაფუჭდა. გზაში ბუსი მამის ტელეფონით თამაშობდა, თავისი სახლში დატოვა, ახლა კი დახმარების გამოძახებაც არ შეეძლოთ. 37 კილომეტრი იარეს ფეხით. ყველაფერთან ერთად თქეში წვიმაც წამოვიდა და სულ დასველდნენ. აქამდე თუ ამდენი მანქანა დადიოდა, თითქოს ბედად ახლა ერთმა გამვლელმაც კი აღარ გამოიარა. სახლში გამთენიისას მივიდნენ და ერთმანეთს გაბუტულებივით დაემშვიდობნენ, სანამ დაიძინებდნენ.
ბუსისთვის ეს ყველაზე საშინელი დღე იყო ცხოვრებაში.
სავარჯიშო მეშვიდე
შეცვალეთ რამე ან ვინმე. მაგალითად, გვანახეთ, როგორ ეცვლება ხასიათი თქვენ გმირს, როგორ იცვლება ბუნება სეზონის მიხედვით, როგორ იცვლება ერთი მოვლენა მეორით და ასე შემდეგ. მთავარია, კარგად დაგვანახვეთ უშუალოდ ცვლილების მომენტი.
სავარჯიშო მერვე
წერილი წარსულს და მომავალს. ამ სავარჯიშოში, თქვენმა გმირმა (გააჩნია რა ასაკისაა), მისწეროს წერილი საკუთარ „მე“-ს წარსულში ან მომავალში. ამ წერილში უნდა ჩანდეს სხვაობა, როგორი იყო ის ადრე და როგორია ახლა.
მაგალითი:
გამარჯობა თემო თავი 20 წლის შემდეგ!
ეს მე ვარ, ბუსი, შენი თავი, ოღონდ 12 წლისა. ვიცი, ახლა მდიდარი და ცნობილი ხარ, ანუ ვარ. ალბათ ახლა გემრიელობებს მიირთმევს, უფრო ზუსტად, მივირთმევ და Playstation-ს თამაშობ, ბოდიში, ვთამაშობ.
ცოლ-შვილი მყავს? ვარსკვლავური ომები ისევ მიყვარს? ბურგერი? ჩემი საყვარელი წიგნი ახლა რომელია? ალისა და ბილი დაქორწინდნენ? ანიმეების ყურება ისევ მომწონს?
კითხვები გამითავდა და დაგემშვიდობები.
პ.ს. ამ წერილს ისეთ ადგილას შევინახავ, რომ 20 წლის მერე უსაფრთხოდ გავხსნა.
7/03/2021
ბუსისგან ჩემ თავს!
სავარჯიშო მეცხრე
გადააკეთეთ თქვენი გმირი რამდენიმე საათით. შეცვალეთ თქვენი გმირი ანტიგმირად. როგორი იქნებოდა ის, ცუდი ტიპაჟი რომ ყოფილიყო. როგორი იქნება ბოროტი „სუპერმენი“ ან ნარუტო თუ ბოროტების მხარეს დადგება, ბევრის გაფუჭებას მოახერხებს? როგორ? მოიფიქრეთ მისი საწინააღმდეგო მოქმედებებიც.
მაგალითი:
ამ თავში ბუსის პარალელურ სამყაროს რეალობას წარმოგიდგენთ:
როდესაც ბუსიმ სკოლის ზარი გააფუჭა და ბილს გადააბრალა, ბილმი ბუსისთან ჩხუბი გადაწყვიტა. ამის შემდეგ, ბუსიმ ისე სცემა ბილი, თავ-ყბა გაუერთიანა და ცხვირიც გაუტეხა. ორი დღის შემდეგ კი სულაც კატა მოკლა და მაქსს პაემანი ჩაუშალა. თავის ბიძაშვილს ფლეისთეიშენი დაუმტვრია და ბებოს ყვავილები ამოჩიჩქნა, მერე ბიო ტუალეტში ნიღბით შეუვარდა უცნობ კაცს და ტუალეტის ქაღალდი გამოსტაცა ჩაცუცქულ, გაოგნებულ კაცს, მერე ქაღალდი დაკუწა, ქუჩაში დაყარა და ბუნება დაანაგვიანა.
