კომერცია თუ ხარისხი? – მუსიკის სფეროში ამ კითხვაზე ბევრი სავარაუდო პასუხი არსებობს. იდეალური შემთხვევაა, როცა ხელოვანი საკუთარი ნიჭის კომერციალიზაციას შინაგანი ცვლილების გარეშე ახერხებს. მთავარია, გქონდეს სწორი მიმართულება და აკეთებდე კარგ, ხარისხიან მუსიკას, რომელზე მოთხოვნაც საზოგადოების გარკვეულ ნაწილს ყოველთვის ექნება.
თუმცა უნდა ითქვას, რომ თანამედროვე სამყაროში ნიჭი კარგა ხანია აღარ არის საკმარისი. თუ არ აკეთებ შოუს, არ უნდა გქონდეს იმედი, რომ ტაშს დაგიკრავენ. ქართულ მუსიკალურ სივრცეში ხშირად გაისმის კითხვა, რატომ ვერ ცოცხლობს შოუბიზნესი საქართველოში. მიზეზი მარტივია – ერთი მხრივ, არ არსებობს შოუ, რომელშიც მსმენელები შესაბამის თანხას გადაიხდიან, მეორე მხრივ კი არ არის მოთხოვნა ისეთ მუსიკაზე, რომელზე დაყრდნობითაც შესაძლებელი იქნება რაიმე ორიგინალურის, ჯერ არნახულის მოფიქრება.
სად იდგმება ერთ-ერთი საუკეთესო შოუ, რაც კი ოდესმე მინახავს? – “ევროვიზიაზე”. იმიტომ, რომ ეს კონკურსი არ არის შექმნილი მხოლოდ ვოკალური მონაცემების წარმოსაჩენად; ხმის მიცემის სისტემის “დემოკრატიულობა” (გამარჯვებულს ევროპის მოსახლეობა არჩევს) გარანტია იმისა, რომ არტისტები და მათი პროდიუსერები ძალ-ღონეს არ დაიშურებენ კარგი შოუს დასადგმელად, რომელიც დიდი რაოდენობის მსმენელზე იქნება გათვლილი.
სიმართლე გითხრათ, წმინდა ხელოვნების თვალსაზრისით, მუსიკალური კონკურსების ჩატარება მართებულ მოვლენად არ მიმაჩნია, რადგან გემოვნება ძალიან სპეციფიკური რამაა და კონკრეტული ადამიანების ღირებულებებსა თუ სიმპათიებზეა დამოკიდებული. ბევრი მიიჩნევს, რომ “ევროვიზია”, თავისი არსით, პოლიტიკური კონკურსია, რომელსაც ვერასოდეს ეყოლება ღირსეული გამარჯვებული. გამოგიტყდებით – შარშანდლამდე მეც ასე მეგონა.
Loreen – ეს იმ შვედი გოგონას სახელია, რომელმაც ამ კონკურსზე სრულიად თუ არ შემაცვლევინა აზრი, საფუძვლიანად მაინც შემირყია წარმოდგენა.
ბრწყინვალე გარემო, ქორეოგრაფია, ვოკალი… ამ ყველაფრის სინთეზით კი ძალიან კარგი ნომერი იდგმება. ეს მხოლოდ სიმღერა არ არის, ეს ნამდვილი პერფორმანსია. შვედი კონკურსანტის გამარჯვება, ვფიქრობ, ნამდვილად არ იყო შემთხვევითი, ან თუნდაც პოლიტიკური.
რამდენიმე კვირის წინ შევიტყვე, რომ წლევანდელ “ევროვიზიას”, რომელიც შვედეთში, ქალაქ მალმოში გაიმართება, მეც დავესწრები. მართალია, რეპორტიორის სტატუსით, მაგრამ ჩემთვის ეს ბევრად უფრო მიმზიდველია, ვიდრე უბრალო მაყურებლობა. პირადი გამოცდილებით შემიძლია ვთქვა, რომ ნებისმიერი კონცერტი კულისებიდან გაცილებით საინტერესო სანახავი და გასაშუქებელია. ვეცდები, ერთი პოსტი “ევროვიზიიდან” თუ არა, შვედეთიდან ჩამოსვლის შემდეგ მაინც გამოვაქვეყნო.
ქართველ კონკურსანტებს რაც შეეხება, “ევროვიზიაზე” წელს ნოდიკო ტატიშვილი და სოფო გელოვანი წარგვადგენენ. დარწმუნებული ვარ, წმინდა ვოკალური თვალსაზრისით, ნომერი ძალიან კარგი იქნება. სიმღერაც “საევროვიზიოა”. რაც შეეხება შოუს, ამას თავის დროზე ვნახავთ.
ძალიან მინდა, ჩვენმა კონკურსანტებმა წარმატებას მიაღწიონ, რათა 2014-ში იმ დონის სანახაობა, როგორც “ევროვიზიაა”, სწორედ საქართველოში გაიმართოს. ეს ძალიან დიდი გამოცდილება და გამოწვევა იქნება როგორც ქართველი მსმენელისთვის, ასევე იმ ადამიანებისთვისაც, რომლებიც კონკურსზე იმუშავებენ.
იქნებ ამის მერე მაინც იქცეს საქართველოში შოუ – ბიზნესად.
