ეს ჟურნალ „მასწავლებლის“ 2020 წლის ბოლო ნომერია. რთული, სახიფათო და მაინც საინტერესო წლის.
შემეძლო, მესაუბრა იმაზე, რომ ამ სასწავლო წელს ყველა მასწავლებელი გმირია და მომეთხრო ამ გმირობის რამდენიმე თვალსაჩინო ისტორია.
მესაუბრა COVID-19-ით გარდაცვლილ მასწავლებლებზე.
ასეც დავიწყე ამ წერილის წერა. ვწერდი იმაზე, რომ…
ვწერდი და ვშლიდი.
ბოლოს გადავწყვიტე, დამეტოვებინა რამდენიმე წინადადება, რომელთა მიღმა, სიტყვების დერეფნებში, ისედაც ბევრი ამბავი წაიკითხება.
მასწავლებლის ეროვნული ჯილდოს მფლობელი ლადო აფხაზავა ყვავილებს ახარებს და ყიდის, რომ მოსწავლეებს ინტერნეტის საფასური გადაუხადოს.
წლის საუკეთესო სკოლის დირექტორი ლიკა გომართელი მიღებულ ჯილდოს მოსწავლეებისთვის ინტერნეტის ჩასართავად ხარჯავს.
საუკეთესო მასწავლებელმა მაია ტყემალაძემ ჯილდოდ მიღებული თანხით მოსწავლეებს პლანშეტები უყიდა.
ჩვენს ქვეყანას კიდევ ბევრი ასეთი მასწავლებელი ჰყავს. მათ შესახებ წერენ სოციალურ ქსელებში, მასწავლებელთა დახურულ ჯგუფებში…
თითოეული ასეთი საქციელი, ცხადია, აღგვაფრთოვანებს.
მე სხვა რამ მინდა ვთქვა:
ეროვნული ჯილდოს მფლობელი პედაგოგი ყვავილებს არ უნდა ყიდიდეს მოსწავლეებისთვის ინტერნეტის ჩასართავად.
არც საუკეთესო სკოლის დირექტორი და საუკეთესო მასწავლებელი უნდა ხარჯავდნენ ასე მიღებულ ჯილდოს.
რას ვისურვებდი საახალწლოდ? განათლება ყველა მოსწავლისთვის თანაბრად ხელმისაწვდომი იყოს, ყველა მასწავლებელს ჰქონდეს შესაფერისი სამუშაო გარემო და, რაც მთავარია, რაც შეიძლება მალე დავუბრუნდეთ ჩვეულ ცხოვრებას.
მთავარი რედაქტორი – ნატო ინგოროყვა
რედაქტორები: მანანა ბოჭორიშვილი, ნანა მაჭავარიანი, ირმა ტაველიძე, ქეთევან ნიკოლეშვილი
დიზაინერი– ბესიკ დანელია
მხატვარ-ილუსტრატორი – მამუკა ტყეშელაშვილი
ნომრის ავტორები:
თამთა კობახიძე, მაია ფირჩხაძე, ქეთევან ოსიაშვილი, მაია ჯალიაშვილი, გიორგი ჭაუჭიძე, ლევან ალფაიძე, მარიამ გოდუაძე, თამთა დოლიძე, თინათინ ზარდიაშვილი, ირმა კახურაშვილი, ქეთევან კობალაძე, ნესტან რატიანი, მალინა საჯაია, ნასტასია არაბული, გურამ მეგრელიშვილი, ცირა ბარბაქაძე, შორენა ტყეშელაშვილი, ინა იმედაშვილი.
ჟურნალის წაკითხვა და ჩამოწერა შესაძლებელია ბმულიდან
