დაფიქრებულხართ, რომ ძაღლების, კატების, მტრედებისა და ბეღურების გარდა ურბანულ გარემოში ბევრი სხვა ცხოველი თუ ფრინველი გვემეზობლება?
ამის შესახებ პირველად მაშინ დავფიქრდი, როდესაც „რადიო თავისუფლების“ საიტზე ჩვენი ეკომეზობლების შესახებ სტატია ვნახე, საიდანაც გავიგე, რომ თბილისსა და მის შემოგარენში არც მეტი არც ნაკლები, ენოტი, კუ, ზღარბი, ტურა, წავი, თოლია, მელია და კიდევ სხვა მრავალი ცხოველი თუ ფრინველი ცხოვრობს.
წარმოგიდგენიათ, რა საინტერესო გაკვეთილის თუ გაკვეთილების ციკლი შეგვიძლია მოვიფიქროთ ამ თემაზე?
გთავაზობთ ჩემს ვერსიას.
- მთავარი კითხვა – როგორ ფიქრობ, რა ცხოველები და ფრინველები ცხოვრობენ ჩვენს ქალაქში? რომელი ცხოველი და ფრინველი შეგხვედრია?
- შენი აზრით, შეიძლება თუ არა თბილისში ცხოვრობდეს წავი?
- მელია?
- ტურა?
ტექსტი 1, შესავალი ტექსტი:
ჩვენი „მეზობლები “
შეიძლება გაგიკვირდეს, როცა გაიგებ რამდენი ცხოველი და ფრინველი ცხოვრობს თბილისსა და მის შემოგარენში.
ბეღურები და მტრედები? ხანდახან მერცხლებიც შეგინიშნავს? ჭოტზე, ყანჩასა და არწივზე რას იტყვი?
მხოლოდ ქუჩის ძაღლები და კატები შეგხვედრია? იშვიათად თაგუნიებიც გინახავს? აბა, ზღარბები, წავები, ენოტები,კვერნები, მელიები და ტურები?
რას იზამდი, ერთ დილით, შენს ოთახში ფუმფულა მელია რომ აღმოგეჩინა?
დავალება:
- სიტყვათა მარაგი-ცხოველებისა და ფრინველების სახელები
- დახარისხება- გადავწეროთ ცხოველები ცალკე და ფრინველები ცალკე
- დახარისხების უფრო რთული ეტაპი: მტაცებლები, მღრღნელები, ბალახისმჭამელები;
- რომელი ცხოველი თუ ფრინველი სად ბინადრობს?
- მათი საცხოვრისის სახელების ლექსიკონი,
- ცხოველთა ნაშიერების აღმნიშვნელი სიტყვები
ტექსტი 2-
თოლიების აღმოსაჩენად
რა კარგია ერთად !
ლუკა ბათუმის ერთ–ერთი სკოლიდან გადმოვიდა თბილისში, ძალიან ენატრებოდა თავისი ქალაქი, ამიტომ როცა ახალმა მეგობრებმა, თინათინმა და გაბრიელმა თოლიების სანახავად წასვლა შესთავაზეს, მის სიხარულს საზღვარი არ ჰქონდა. იფიქრა, რომ აუცილებლად უნდა წაეყვანა თავისი პატარა ძმა, გიგა. ბათუმიდან თბილისში გადმოსახლების შემდეგ თოლიების ფრენა ალბათ მასაც ძალიან მოენატრა. ბავშვებს თინათინის უფროსი და, მარიამი გაჰყვა. ის უკვე მეცხრეკლასელი იყო.
ავტობუსით წავიდნენ. ერთმანეთს გაჩერებაზე შეხვდნენ. ლაპარაკსა და სიცილში ავტობუსიც მოვიდა. ნელ–ნელა სანაპიროც გამოჩნდა. ეს რომ შენიშნეს, ყველამ ფანჯარაში დაიწყო ცქერა. მეტეხსა და ნარიყალას, კლდის წვერზე შეფენილ ძველ სახლებსა და ფერად აივნებს უყურებდნენ .
ქვეითთა გადასასვლელზე ფრთხილად გადაჭრეს ქუჩა და სანაპიროს მიუახლოვდნენ. ხან ჩუმად აკვირდებოდნენ მონავარდე თოლიებს, ხან ერთმანეთს უზიარებდნენ.
–თითქმის ისეთი ლამაზია, როგორც ჩვენთან – წამოიძახა ლუკამ– არა, ბათუმში უფრო ლამაზია – ჩაილაპარაკა მერე ჩუმად.
მაგრამ მალევე ისევ გაიღიმა. როგორი სიხარულით უყურებდნენ თოლიებს მისი მეგობრები! მისი ახალი მეგობრები!რა კარგია ერთად!
ტექსტი3 – ლექსი
თოლია
ზღვის პირას თეთრმა თოლიამ
თამაშში ამიყოლია.
დიდხანს ვეძახდი ნაპირთან
დავბრუნდებიო, დამპირდა.
ბოლოს მიამბეს ბავშვებმა,
თურმე სხვებს ეთამაშება.
კითხვები:
- მოგეწონა ლექსი? რა ემოციას იწვევს ის შენში?
- რვეულში გადაიტანე ერთი ფრაზა, რომელიც
- ყველაზე მეტად მოგეწონა;
- დააკვირდი ლექსის ყოველი ხაზის დაბოლოებას, რამე ხომ არ შეამჩნიე?
- კიდევ ერთხელ წაიკითხე ლექსი „თოლია“, რით განსხვავდება იგი ამ გაკვეთილის მეორე ტექსტისგან?
დამატებითა აქტივობა:
- ლექსის სტრუქტურა
- რიტმი
- მარცვლების რაოდენობა
- რითმა
- დავხატოთ ლექსის ილუსტრაცია.
