ამბის მოყოლის ათასგვარი საშუალება არსებობს. როდესაც ერთმანეთს ვესაუბრებით, ჩვენს ამბებს ზეპირად ვუამბობთ, რა გადაგვხდა, როგორი დღე გვქონდა. როდესაც დავალებაში რაიმე ამბის გადმოცემას გვთხოვენ, ამბავს წერით ვყვებით, ასე გვიამბობენ მწერლებიც, მათი ნაამბობი კი ზოგჯერ მოთხრობის, ხან ნოველის, რომანის, ლექსის ფორმას იძენს. ზოგჯერ ამბავს ნახატით ვიგებთ, მაგალითად, ნიკო ფიროსმანის შესანიშნავი „კახეთის მატარებელი“ გახსოვთ? ფერები, პერსონაჟები, განწყობა – ყველაფერი ერთი დიდი და საოცარი ამბავია.
კიდევ როგორ ვყვებით ამბავს? კინოს, ვიდეოს, ფოტოს საშუალებით, შეიძლება ერთი წინადადებითაც გადმოვცეთ და ათეულობით გვერდიც არ გვეყოს.
როდესაც კაცობრიობამ ფოტოგრაფია აღმოაჩინა, ადამიანების ხედვის წერტილი თითქოს შეიცვალა, უფრო ზუსტი და დაკვირვებული გახდა. გიყვარს საოჯახო ფოტოების დათვალიერება? აკვირდები, როგორი განსხვავებაა შენი ბებია-ბაბუების, შენი მშობლებისა და შენს ფოტოებს შორის? რას გვეუბნება ფოტო, რას გვიამბობს? აი, შეხედე ამ ფოტოს, რა შეიძლება მომხდარიყო, რატომ ამოშალეს ეს ადამიანები ფოტოდან?
(წყარო:შსს არქივი)
ან ამ ფოტოს შესახებ რისი თქმა შეგიძლია? რა შეიძლება ესაუბრებოდნენ ერთმანეთს დიმიტრი ერმაკოვის ამ ფოტოს გმირები?
(წყარო-ციფრული ფოტომატიანე)
ამ წყვილზე რისი თქმა შეგიძლია?
( წყარო – ციფრული ფოტომატიანე)
მოკლედ, ფოტოთი ბევრი ამბის მოყოლა შეიძლება და აი, შენი დავალებაც. მოყევი, რა საიდუმლოს გიმხელს, რას გეუბნება, რას გელაპარაკება შენი ქალაქი კედლის წარწერებისა და ნახატების საშუალებით.
ამისათვის:
- მოიმარჯვე შენი ტელეფონი ან ფოტოაპარატი, ამოირჩიე მშვიდი, უქარო ამინდი და გაისეირნე შენს ქალაქში;
- გადაიღე კედლის წარწერა, ნახატი თუნდაც აფიშა, პლაკატი და სარეკლამო განცხადება
- შინ მისვლისას გადაათვალიერე შენი მოპოვებული მასალა, ამოარჩიე მათ შორის ისეთი, რომელიც რაღაც იდეით შეიძლება ერთმანეთთან დააკავშირო;
- დანომრე შენი ფოტოები და მოაგროვე ტექსტურ დოკუმენტში ისე, რომ რაიმე ამბავი გამოდიოდეს.
- ახლა კი თითო ფრაზით შეგიძლია ფოტოებით მოთხრობილი ამბავი განავრცო.
- გამოგივიდა ამბავი? ჩანს დასაწყისი და დასასრული?
- გაუზიარე სხვებს.
აი, რამდენიმე ფოტო შთაგონებისთვის:
- ნივთი, რომელიც ამბავს მიყვება
დავალების შესრულების ადგილი:
ა. ნებისმიერი ადგილი, სადაც ძველი ნივთები იყიდება, მაგალითად, თბილისი, მშრალი ხიდის მიმდებარე ტერიტორია, ნავთლუღის ბაზრობა, ნებისმიერი მაღაზია, სადაც მეორადი სამოსი იყიდება, ანტიკვარიატის მაღაზიები…
- რას ვაკეთებთ :
ვირჩევთ ნივთს, გადავიღებთ ფოტოს, ვაკეთებთ ჩანიშვნას:
- რა ნივთია;
- როგორია, რისგანაა დამზადებული, აღწერეთ;
- რატომ ავირჩიე სწორედ ის;
- რით მიიქცია ჩემი ყურადღება;
- საიდან მოხვდა აქ?
- ვის ეკუთვნოდა?
- ვისიც იყო, იმას როგორ ხასიათზე აყენებდა?
- პატრონის პორტრეტი, ხასიათი…
- ქვეყანა, საუკუნე, დამატებითი ისტორია,
- სად იყო ამდენ ხანს?
- მფლობელმა სად იყიდა/ ვინ აჩუქა/სად იპოვა?
- რისთვის გამოიყენება, აქვს თუ არა მეორეული გამოყენება, მაგალითად, თუ იყენებენ რამე ისეთისთვის, რისთვისაც არაა განკუთვნილი?
- რატომ გაიტანეს სახლიდან?
- რატომ იყიდება?
- მუშაობს? გაფუჭებულია?
- როგორმა ადამიანმა უნდა იყიდოს?
- ვის მოეწონება, რატომ?
- ვინ როგორ შეიძლება შეაფასოს, ვისთვის რა ღირებულება ჰქონდეს?
მოქმედება:
ქვემოთ ჩამოთვლილი მოქმედებიდან აირჩიე ერთი და მოჰყევი, რატომ მოიქეცი ასე და როგორ განვითარდება ამბავი, ნებისმიერი ვარიანტის არჩევისას:
- ნივთი ავიღე, პალტოზე გავიპრიალე, ღიღინით გავაგრძელე სეირნობა;
- ნივთი ჩუმად გამოვაცოცე და მტკვარში გადავაგდე;
- ნივთი მოვიპარე და ვინმეს ვაჩუქე, ვის?
- ნივთი ჩუმად გავაფუჭე, რატომ?
- ნივთი უკან დავაბრუნე და გამოვედი.
- წერის ეტაპი
შენ მიერ შედგენილ ჩანიშვნებს გადახედე, თითქმის დაწერილია პატარა ამბავი, ატყობ? ახლა რედაქტირების ეტაპზე გადადი და ტექსტი კიდევ უფრო საინტერესო გახდება.
