ფინედუ – https://www.finedu.gov.ge/ge – ეს არის პირველი ქართული საგანმანათლებლო ვებ-პლატფორმა, მომხმარებელთა სანდო და კომპეტენტური ფინანსური მეგზური.
პორტალზე თავმოყრილია ინფორმაცია პირადი ფინანსების მართვის, დაზოგვის, ინვესტირებისა და სხვა ფინანსური მიზნების განხორციელებისთვის. საგანმანათლებლო რესურსები, პუბლიკაციები, ბლოგები, ბროშურები, სახელმძღვანელოები და სხვა მსგავსი საბეჭდი და დამხმარე მასალა, ვიდეო და აუდიო კონტენტი ხელმისაწვდომია ყველასთვის.
რესურსების ფინანსური განათლების ეროვნულ სტრატეგიასთან შესაბამისობასა და მათ ვებგვერდზე განთავსებას საქართველოს ეროვნული ბანკის ფინანსური განათლების განყოფილების გუნდი ახორციელებს. ასევე, მასში ჩართულია არაერთი კერძო კომპანია საჯარო სტრუქტურა, სასწავლო დაწესებულება და საერთაშორისო თუ ადგილობრივი არასამთავრობო ორგანიზაციები და დონორები.
ვებპლატფორმაზე განთავსებულია ბლოკი მასწავლებლებისა და მშობლებისთვის, ასევე, მათთვის, ვისაც სურს ასწავლოს ფინანსური განათლების საკითხები ბავშვებსა და მოზარდებს, როგორც სკოლაში, ისე სხვა სივრცეში.
ბლოკი წარმოდგენილია სექციებით:
- ფორმალური განათლება
- არაფორმალური განათლება
- სასწავლო რესურსები
- ვიდეო რესურსები
- ტრენინგები და ღონისძიებები
- ფინედუს სამასწავლებლო
ფორმალური განათლება
ეროვნულ სასწავლო გეგმაში ფინანსური განათლება ერთ-ერთი პრიორიტეტული მიმართულებაა და საზოგადოებრივ მეცნიერებებთან ერთად სხვა საგნების მასწავლებლებსაც აძლევს შესაძლებლობას, ფინანსური წიგნიერების სწავლება ინტეგრირებულად წარმართონ.
ამისათვის საჭიროა, მასწავლებლები აღჭურვილნი იყვნენ შესაბამისი ცოდნითა და მასალებით, რათა სწავლა-სწავლების პროცესში გამოყენებული იქნას მრავალფეროვანი რესურსები, საინტერესო აქტივობები და ისეთი სავარჯიშოები, რომლებიც არა მხოლოდ ცოდნის, არამედ უნარ-ჩვევების გამომუშავებაზე იქნება ორიენტირებული და მოსწავლეს რეალური ცხოვრებისეული სიტუაციებისთვის მოამზადებს.
ფორმალური განათლების სექციაში დეტალურად არის განხილული ცალკეული საკითხები:
- ფინანსური განათლების მნიშვნელობა
- ფინანსური განათლება ეროვნულ სასწავლო გეგმაში
- როგორ დავგეგმოთ ფინანსური განათლების გაკვეთილები?
- დაწყებითი საფეხური – გაკვეთილის გეგმები
- საბაზო საფეხური – გაკვეთილის გეგმები
არაფორმალური განათლება
ფინანსური განათლების სწავლება შეიძლება დაიგეგმოს, როგორც პროექტების სახით, ე.წ.სადამრიგებლო საათის დროს, ასევე, შესაძლებელია არასაგაკვეთილო დროსა და სივრცეში განხორციელდეს კლუბური მუშაობა, მრავალფეროვანი აქტივობები და თამაშები.
სწავლებისას მნიშვნელოვანია, მოსწავლეები ადგილზევე ითვისებდნენ ფინანსურ საკითხებზე ცოდნას და იმავდროულად, ივითარებდნენ სწორ ფინანსურ უნარ-ჩვევებს სიტუაციებზე მსჯელობის, თამაშების, სიმულაციების, ჯგუფური აქტივობების თუ პროექტებზე მუშაობის საშუალებით.
პორტალზე განთავსებულია საინტერესო პროექტისა და თავისუფალი გაკვეთილების სცენარები.
რესურსების სექციაში თავმოყრილია: ეროვნული ბანკის მიერ მასწავლებლებისთვის შექმნილი დამხმარე სახელმძღვანელოები თეორიული მასალითა და პრაქტიკული საკლასო აქტივობებით; ბავშვებისთვის განკუთვნილი საგანმანათლებლო ბროშურები; მასწავლებლების მიერ შექმნილი სასწავლო რესურსები – სამივე საფეხურის გაკვეთილის გეგმები, აქტივობები.
- სახელმძღვანელოები
- კომიქსები ბავშვებისთვის
- ბროშურები ბავშვებისთვის
- თამაშები
- მასწავლებლების მიერ შექმნილი რესურსები
მასალის ჩამოტვირთვა და სასწავლო მიზნებით გამოყენება ნებისმიერ დაინტერესებულ პირს უფასოდ შეუძლია.
ვიდეორესურსების სექციაში წარმოდგენილია ვიდეო გაკვეთილები და ფინედუს ანიმაციები.
მასწავლებლების ხელშეწყობის მიზნით პერიოდულად ტარდება:
- ტრენინგები მოქალაქეობის მასწავლებლებისთვის
- ტრენინგები ნებისმიერი საგნის მასწავლებლებისთვის
- მოიწვიე ფინედუ კლასში
- მიმდინარე ღონისძიებები
ფინედუს სამასწავლებლო – https://www.facebook.com/groups/finedus.samastsavleblo – ფეისბუქჯგუფში მასწავლებლები ერთმანეთს უზიარებენ გამოცდილებას, საინტერესო რესურსებს, სასწავლო მასალას, ინფორმაციას ტრენინგებისა თუ ღონისძიებების შესახებ, რაც მათ ეხმარება პროფესიულ ზრდასა და მოსწავლეებისთვის სახალისო გაკვეთილების დაგეგმვაში.
ზოგადსაგანმანათლებლო სკოლებში, ფინანსური განათლების დანერგვის მიზნით, ეროვნული ბანკის ხელშეწყობით ტარდება კონკურსები – ,,გახდი ფინედუს დესპანი მასწავლებელი” და „ფინანსური განათლების ეროვნული ჯილდო“.
გამოყენებული რესურსი:
ვებ-პლატფორმა – https://www.finedu.gov.ge/ge
