ჯერ კიდევ არ ვიცით, როგორი იქნება სკოლა შემოდგომაზე, მაგრამ მასწავლებლებს შეუძლიათ მოქნილი გეგმების შემუშავება, რომლებიც დისტანციური სწავლებისთვისაც გამოდგება და საკლასო ოთახშიც.
როგორ დავგეგმოთ, როდესაც არ ვიცით, რისთვის ვგეგმავთ? მასწავლებლებს აინტერესებთ – როგორი იქნება მომდევნო სასწავლო წელი და სიმართლე ისაა, რომ არ ვიცით, რა გველოდება. ზუსტად არავინ იცის.
და მიუხედავად ამისა, მასწავლებლებს მაინც შეუძლია რაღაცების გაკეთება, მაგ. კლასის (საკლასო ოთახის) მოწყობა ისე, რომ ნებისმიერ შემთხვევაში გამოდგეს: პირისპირ, შორით ან შერეული სწავლებისას.
გაიხსენეთ, რომ მოქნილი ხართ და ასეთები არიან თქვენი მოსწავლეებიც. იცოდეთ, რომ თქვენ ნებისმიერ შემთხვევაში შეგიძლიათ თქვენს მოსწავლეებთან იყოთ. თუ თქვენ წლის დასაწყისიდანვე დაგეგმავთ მოქნილ კომპონენტებს, მოსწავლეების გამოცდილებაც უკეთესი იქნება.
ქვემოთ მოყვანილი რჩევები დაგეხმარებათ პირველი ნაბიჯები გადადგათ მომდევნო სასწავლო წლის დასაგეგმად. დაიწყეთ იმით, რისი კონტროლიც შეგიძლიათ.
შექმენით კომუნიკაციის გეგმა
დიდი ალბათობით, თქვენ გქონდათ კომუნიკაციასთან დაკავშირებული ესა თუ ის გამოწვევები გასულ წელს. იფიქრეთ ამ გამოწვევებზე.
– დაწერეთ გეგმა: აბობოქრებულ ზღვაში მშობლების, მოსწავლეებისა და კოლეგების ყურადღება თქვენკენ იქნება მოპყრობილი, გემი რომ მავსადგურში მიიყვანოთ.
– გაავრცელეთ ის: თქვენი გეგმა შუქურაა. შეახსენეთ მოსწავლეებსა და მშობლებს, როგორ და როდის შედგება კომუნიკაცია. თქვენმა გეგმამ უნდა შექმნას საძირკველი მთელი შემდგომი კომუნიკაციისათვის.
– შეინარჩუნეთ თანმიმდევრული კომუნიკაცია: მიჰყევით თქვენს გეგმას. თავდაპირველად ამას დამატებითი ძალისხმევა შეიძლება დასჭირდეს. მაგრამ როგორც კი რამე შეიცვლება, თქვენ კმაყოფილი იქნებით გაწეული ძალისხმევის გამო.
– განიხილეთ ელფოსტის ალტერნატივები: Remind-ის მსგავს ტექსტურ სერვისებში სიმბოლოების რაოდენობა შეზღუდულია და ყურადღება შეტყობინებებზეა გადატანილი. გაითვალისწინეთ ოჯახები, ვისთვისაც მობილური მოწყობილობები წვდომის ძირითადი საშუალებაა.
მოახდინეთ შინაარსის ორგანიზება
გახსოვდეთ, რომ თქვენი ონლაინ სწავლების გარემო ხელს უნდა უწყობდეს პირისპირ სწავლებას და პირისპირ სწავლება ონლაინ სწავლების გარემოს უნდა უწყობდეს ხელს. როდესაც ისინი ერთმანეთს ავსებენ, ორივე უფრო ძლიერდება.
მითითებები სწავლებისათვის:
- დაანაწილეთ სასწავლო მასალა მცირე “ულუფებად”: გაკვეთილებად, მოდულებად, კვირებად.
- შექმენით სტრუქტურა ამ “ულუფებს” შორის.
- შეინარჩუნეთ თანმიმდევრული სტრუქტურა.
- თითოეულ “ულუფაში” შეიტანეთ სწავლების ყველა ელემენტი (წინასწარი შეფასება, კვლევა, სწავლება, პრაქტიკა, შეფასება).
როდესაც ონლაინ კონტენტი ორგანიზებულია, იფიქრეთ, როგორ შეგიძლიათ გააერთიანოთ მისი ნაწილები პირისპირ სწავლებასთან.
მუდმივად შეაფასეთ თქვენი ინსტრუმენტები
ყოველი ნაწილის დასრულების შემდეგ დაფიქრდით იმ ელექტრონულ ინსტრუმენტებზე, რომლებიც გამოიყენეთ. დაუსვით თავს კითხვები: მქონდა თუ არა დავალების შესაბამისი ინსტრუმენტი? შეძლეს თუ არა მოსწავლეებმა სწავლების მიზნების მიღწევა?
არასწორი ინსტრუმენტის გამოყენებას მაშინვე შევამჩნევთ: მიზანს ვერ ვაღწევთ. და სწრაფადვე ვაგრძელებთ. როდესაც სწორ ინსტრუმენტს ვიყენებთ, ის უხილავია. ის მარტივია, ინტუიტიური და აძლიერებს სწავლებას. ჩვენ ისევ გსურს მისი გამოყენება. გადახედეთ ინსტრუმენტებს და წაშალეთ ისინი, რომლებიც ვერ მუშაობს. გახსოვდეთ, ინსტრუმენტი, რომელიც კარგია თქვენი კოლეგისათვის, შეიძლება თქვენ არ გამოგადგეთ და ეს ნორმალურია.
დაგეგმეთ აქტივობები ნებისმიერ სივრცეში ურთიერთობის ასაგებად
თანატოლებთან ონლაინ ნორმალური ურთიერთობა რომ ჩამოუყალიბდეთ, მიეცით მოსწავლეებს იქ ყოფნის რეალური მიზეზი.
ჩამოაყალიბეთ პოზიტიური საკლასო თემი ციფრული მოქალაქეობის გაკვეთილების ჩართვით და გარდაქმენით თქვენი ონლაინ შეხვედრები, რათა შესთავაზოთ აქტივობები, რომლებიც ურთიერთობებს ქმნის. ჯგუფში როლების განაწილებას შეუძლია გამოიწვიოს მნიშვნელოვნობის განცდა და სტუმრების შემოყვანას შეუძლია დაეხმაროს მოსწავლეებს რეალური ურთიერთობების დამყარებაში.
ურთიერთობებთან დაკავშირებული საუკეთესო აქტივობები ისინია, რომლებიც მოსწავლეებს ინდივიდუალურობის გამოვლენის საშუალებას აძლევს. მაგ. პრეზენტაცია “ყველაფერი ჩემ შესახებ”.
დაგეგმეთ აღმოჩენის აქტივობები ძირითად ტექნოლოგიურ ინსტრუმენტებთან დაკავშირებით
აღმოჩენის აქტივობა საშუალებას აძლევს მოსწავლეებს ისწავლონ, როგორ გამოიყენონ ინსტრუმენტი ვიდრე კონტენტის შესწავლაზე გადავიდოდნენ. მასწავლებლებს ასევე შეეძლებათ თავიდანვე ისაუბრონ მოლოდინებზე.
აღმოჩენა სამ ნაწილს შეიცავს: მასწავლებლის მითითება, თუ როგორ გამოიყენონ ინსტრუმენტი, მოლოდინების მონახაზი მოსწავლეებისა და მასწავლებლებისთვის და მარტივი დავალებები, სადაც მოსწავლეები ინსტრუმენტების გამოყენებაში გაიწაფებიან.
აღმოჩენისას, მიეცით ურთიერთობის საშუალება; ერთმანეთთან და თქვენთან საუბრისას, თქვენ წინასწარ შეგიძლიათ გადაჭრათ პრობლემები, სანამ ამ ინსტრუმენტის გამოყენებას დაიწყებდეთ.
თუ არ იცით, როგორ დაიწყოთ, დაიწყეთ იმ სამი ძირითადი ინსტრუმენტის ჩამოთვლით, რომელსაც სწავლებისას გამოიყენებთ. შემდეგ დაგეგმეთ აღმოჩენის აქტივობა თითოეული მათგანისთვის. შემდეგ კი მოიფიქრეთ, სად ჩართავთ ამ აქტივობებს სწავლებისას.
შექმენით რუტინები, რომლებიც თანმიმდევრული იქნება ყველა სივრცეში
ონლაინ თუ პირისპირ, მოსწავლეებისათვის შექმენით თანმიმდევრული რუტინა, რომელიც არჩევანისა და საკუთარ ტემპში მუშაობის საშუალებას მისცემს მათ.
ქვემოთ – რუტინა ნებისმიერი გარემოსათვის:
- განცხადებების შემოწმება
- სიის ამოკითხვა
- გახსენით მოდული და დაიწყეთ პირველი დავალება.
როდესაც შექმნით, მოახდინეთ ამ პროცესების ილუსტრირება გრაფიკული ორგანაიზერებით. განათავსეთ ისინი თქვენს სწავლების ორგანიზების სისტემაში (LMS) და რეალურ საკლასო ოთახში და მიამაგრეთ ისინი განცხადებებს. ყველაზე მნიშვნელოვანია, შეძლებისდაგვარად მინიმუმამდე დაიყვანეთ ცვლილებები – მოსწავლეებს თანმიმდევრულობა ახლა ყველაზე მეტად სჭირდებათ ვიდრე ოდესმე.
მომავალ სასწავლო წელთან დაკავშირებული გაურკვევლობის გამო, ადვილია გადაიტვირთოთ. დაიწყეთ იმით, რისი გაკონტროლებაც შეგიძლიათ.
source: https://www.edutopia.org/article/how-plan-when-you-dont-know-what-plan
