ახალი მოძრაობის დასაწყისი

თბილისში ახალ მოძრაობას ჩაეყარა საფუძველი. იგი საზოგადოებრივ-პოლიტიკური შინაარსის არ გახლავთ. მოძრაობა ქალაქის ერთ-ერთი საჯარო სკოლის დასახმარებლად და გასაძლიერებლად შეიქმნა. 21-ე საჯარო სკოლის (ყოფილი მეექვსე გიმნაზია) კურსდამთავრებულებმა თავიანთი სასწავლებლის მხარდასაჭერად ახალი ასოციაცია ჩამოაყალიბეს. ევროპასა და ამერიკაში ამგვარი ორგანიზაციების საქმიანობა მრავალწლიან საპატიო ტრადიციად მიიჩნევა, საქართველოში კი ძალიან ცოტა ადამიანი თუ იწუხებს თავს საკუთარ სკოლაზე ზრუნვით.

კურსდამთავრებულებსა და სკოლებს შორის კავშირების მოშლა მრავალი ფაქტორით შეიძლება აიხსნას. უპირველეს ყოვლისა, გასათვალისწინებელია მოსახლეობის სოციალური მდგომარეობა, უმუშევრობა, კეთილდღეობის დაბალი დონე. არ უნდა დაგვავიწყდეს ისიც, რომ წლების განმავლობაში სკოლა ერთ-ერთ ყველაზე დახურულ საჯარო დაწესებულებას წარმოადგენდა საქართველოში. სამინისტრო დიდხანს ერიდებოდა სკოლასა და თემს, სკოლასა და სამოქალაქო საზოგადოებას შორის არსებული კედლის დანგრევას, გარკვეული ზედამხედველობისა და კონტროლის პირობებში სკოლის კარის შეღებას. ამასთანავე, დღემდე არსებობენ სკოლის მესვეურები, რომელთაც გამჭვირვალობა, საზოგადოებასთან თანამშრომლობა საფრთხედ მიაჩნიათ. ისინი კურსდამთავრებულებთან თანამშრომლობაში მათ მიერვე დაფუძნებული სასკოლო წესრიგის შეცვლის საშიშროებას ხედავენ. შესაბამისად, მათ არ აწყობთ „სტატუს კვოს” შეცვლა და არასახარბიელო სამუშაო პირობებს უქმნიან მოხალისეობის საფუძველზე შექმნილ ასოციაციებს. თუმცა, როგორც ჩანს, სიტუაცია უკეთესობისკენ იცვლება. ადამიანები საკუთარ სასწავლებლებზე იწყებენ ზრუნვას, სკოლები კი დაუსაბუთებელი შიშის გარეშე ხვდებიან საზოგადოებრივ ინიციატივებს.

რას საქმიანობს საჯარო სკოლის მხარდამჭერთა ასოციაცია ???

წარსულში ამგვარი ასოციაციის მიზნები მეც განსხვავებულად წარმომედგინა. მეგონა, რომ მისი მთავარი მისია მხოლოდ შემოწირულობების შეგროვება და სკოლის მატერიალური დახმარება შეიძლებოდა ყოფილიყო. 21-ე სკოლის მხარდამჭერებზე დაკვირვებამ კი ამ საკითხთან დაკავშირებით მეტ-ნაკლებად სრულყოფილი ცოდნის მიღების შესაძლებლობა მომცა. თურმე, საკუთარი სკოლის დახმარება ჩემნაირ ღარიბ და ჯიბეგაფხეკილ ადამიანებსაც შეუძლიათ.

ასოციაციის „ფეისბუკის” გვერდის დამკვირვებლებმა უკვე აღმოვაჩინეთ, რომ გაერთიანება სამი მთავარი მიმართულებით მუშაობს. უპირველესად, ასოციაციის წარმომადგენლები მოსწავლეებისთვის დამატებითი საგანმანათლებლო რესურსების შექმნაზე ზრუნავენ. სხვადასხვა სფეროს პროფესიონალად ჩამოყალიბებული კურსდამთავრებულები ინტენსიურად სტუმრობენ თავიანთ სასწავლებელს, და საჯარო ლექციებს, სემინარებს, დისკუსიებსა და ფილმის ჩვენებებს აწყობენ.

კურსდამთავრებულთა მეორე ჯგუფი სკოლის პრესტიჟსა და აღიარებაზე ზრუნავს. ისინი ცდილობენ, რომ საზოგადოებრივი კომუნიკაციების საშუალებით მაქსიმალურად ბევრ ადამიანს მიაწოდონ ინფორმაცია სკოლის დადებითი მახასიათებლების შესახებ. მომავალში საზოგადოებასთან ურთიერთობებზე მომუშავე ჯგუფის წევრების სოციალური კაპიტალი სკოლისთვის ფინანსური თუ სხვა ტიპის დახმარების მობილიზების წინაპირობაც შეიძლება გახდეს. საჭიროების შემთხვევაში ალბათ ეს ჯგუფი სხვადასხვა სტრუქტურებში სასწავლებლის ინტერესების ლობირებასაც შეეცდება.

მესამე მიმართულება კლასგარეშე საქმიანობის ორგანიზებაზეა ორიენტირებული. ამ მიმართულებით მომუშავე ადამიანები გეგმავენ ექსკურსიებს თავიანთ სამუშაო ადგილებზე (მაგალითად პარლამენტში), ხელს უწყობენ სპორტული, მუსიკალური თუ სხვა ტიპის კულტურული ღონისძიებების ჩატარებას.

მაშასადამე, თბილისის ერთ-ერთ სკოლაში კურსდამთავრებულები თავიანთი სასწავლებლის დახმარებას უკვე ახერხებენ დაწესებულების ინტერესების ლობირებით, ფინანსების მოზიდვის მცდელობით, საგანმანათლებლო რესურსების შექმნითა და კლასგარეშე ღონისძიებების დაგეგმვით. იმედია, რომ ამგვარი მოძრაობა ოდესმე ყველა სკოლაში დაიწყება.

ჩვენ უნდა გავთავისუფლდეთ ილუზიებისაგან. ჩვენი ქვეყანა ძალიან ღარიბია. საუბედუროდ, საქართველოს პოლიტიკურ ელიტას სხვა პრიორიტეტები აქვს. შესაბამისად, ჩვენი უშუალო დახმარებისა და თანამონაწილეობის გარეშე, მხოლოდ სახელმწიფოს იმედად საქართველოს განათლების სისტემის განვითარება ჯერჯერობით წარმოუდგენელია.

კომენტარები

comments