რედაქტორის წერილი
ონლაინ სწავლების აუცილებლობამ მასწავლებლები იმაზე დაგვაფიქრა, სინამდვილეში რა ვიცოდით დისტანციური სწავლების შესახებ, რას ნიშნავს ასეთ გარემოებებში სწავლება, ვართ თუ არა ამისთვის მზად, როგორია ასეთი სწავლების დიზაინი, შინაარსი და ა.შ.
ონლაინ სწავლებას ჰყავს მომხრეებიც, ნეიტრალურად განწყობილებიც და ისეთებიც, რომლებიც მხოლოდ პირისპირ სწავლებას ემხრობიან. განსხვავებული დამოკიდებულებაც ბუნებრივია. ასეა თუ ისე, ერთი რამ ცხადია – ჩვენ უნდა ვისწავლოთ და ვასწავლოთ დისტანციურად. ვისწავლოთ ონლაინ ურთიერთობა ჩვენს მოსწავლეებთან, მშობლებსა და კოლეგებთან.
როგორ გავართვით თავი სწავლებას, რა ხარვეზები და რა მიღწევები გვქონდა, აქ და ახლა ამის შეფასება ძნელია, თუმცა აუცილებელი.
სწავლა-სწავლების ამ პროცესში ყველაზე ხშირად მაინც ღირებულებებზე ვფიქრობდი, იმაზე, რაც ჩემთვის მთავარია განათლებაში, და ყველაზე მეტად ამას ვეძებდი ჟურნალ „მასწავლებლის“ ავტორების წერილებშიც.
რედაქტორის ამ წერილში კი მინდა წაგაკითხოთ ამონარიდები ჟურნალის ორი სტატიის წინასიტყვაობიდან და ზაფხულის არდადეგების საფიქრალიც ეს იყოს:
„ნუ შეურაცხყოფთ ბავშვებს მზა ფორმულებით; ფორმულები სიცარიელეა. გაამდიდრეთ ბავშვები ხატებითა და სურათებით, რომლებზეც მკაფიოდ ჩანს დამაკავშირებელი ძაფები.
ნუ დაამძიმებთ ბავშვებს ფაქტების მკვდარი ტვირთით; ასწავლეთ მათ ხერხები და საშუალებები, რომლებიც დაეხმარება მათ, ჩასწვდნენ საკითხს.
ნუ ასწავლით, რომ მთავარი სარგებელია. მთავარი ადამიანში ადამიანურობის აღზრდაა“.
ანტუან დე სენტ-ეგზიუპერი
„ძვირფასო მასწავლებელო!
მე ცოცხალი გადავურჩი საკონცენტრაციო ბანაკს და ჩემმა თვალებმა იხილა ის, რაც არ უნდა ნახოს არც ერთმა ადამიანმა:
როგორ აშენებენ სწავლული ინჟინრები გაზის კამერებს;
როგორ წამლავენ კვალიფიციური ექიმები ბავშვებს;
როგორ ხოცავენ გამოცდილი მედდები ჩვილებს;
როგორ ესვრიან და წვავენ ბავშვებსა და ქალებს უმაღლესი საგანმანათლებო დაწესებულებების კურსდამთავრებულები.
ამიტომაც მე არ ვენდობი განათლებას!
გთხოვთ, დაეხმარეთ მოსწავლეებს, გახდნენ ადამიანები. თქვენმა ძალისხმევამ არ უნდა მიგვიყვანოს სწავლული მონსტრების, მცოდნე ფსიქოპათების, განათლებული აიხმანების ჩამოყალიბებამდე.
კითხვა, წერა, არითმეტიკა მხოლოდ მაშინ არის მნიშვნელოვანი, როცა ეხმარება ჩვენს შვილებს, გახდნენ უფრო ა დ ა მ ი ა ნ უ რ ე ბ ი!“
ერთ–ერთი სკოლის დირექტორის წერილი სამსახურში მიღებული მასწავლებლებისადმი
ჟუნალის წაკითხვა და ჩამოწერა შესაძლებელი ბმულიდან:
