ახალი კვლევა ამას ტემპერამენტით ხსნის.
ზოგი ბავშვი ადვილად ეჩვევა ახალ საკვებს, ზოგიც – მასზე უარს ამბობს. რით შეგვიძლია ამ ქცევის ახსნა? 2017 წლის აგვისტოში გამოქვეყნებული კვლევა (Moding and Stifter) მცირეწლოვან ბავშვებში ახალი საკვების მიღება-უარყოფის რეაქციებს სწავლობდა.
ადამიანს აქვს მიდრეკილება, მიიღოს ან უარყოს ახალი სტიმული და ამ პროცესში მონაწილეობს ტემპერამენტი, რომელიც გავლენას ახდენს იმაზე, თუ როგორ ურთიერთობს ადამიანი სამყაროსთან. შესაძლოა ეს დაგვეხმაროს იმის გაგებაში, თუ რატომ არის ზოგიერთი ბავშვი უფრო „გახსნილი” ახალი საკვების მიმართ.
მკვლევრებმა საწყის ეტაპზე შეარჩიეს 80 ბავშვი და 80 მომვლელი, რომელთაგან ყველა, ერთის გარდა, დედა იყო. აგრეთვე, ბავშვთაგან 75 გოგონა იყო. მკვლევრები აკვირდებოდნენ დედა-შვილის წყვილებს. აგროვებდნენ მონაცემებს ლაბორატორიის იმ ვიზიტებიდან, როცა ბავშვები 6, 12 და 18 თვის იყვნენ.
6 და 12 თვის ბავშვებს ვიზიტებისას „აცნობდნენ” ახალ საკვებს და ახალ სათამაშოებს. 18 თვისები მიჰყავდათ „რისკის ოთახში”, სადაც მათ შეეძლოთ „ურთიერთობა” ოთხ ნივთთან: გვირაბი, კიბეები დიდი ლეიბის გვერდით, შავი ყუთი ზედ მიხატული თვალებითა და კბილებით და მაგიდაზე მოთავსებული გორილას ნიღაბი. ბავშვების რეაქციებს ინიშნავდნენ. ექსპერიმენტს დედებიც ესწრებოდნენ.
მკვლევრებმა გამოიკვლიეს, რომ 12 თვის ასაკის ბავშვები, რომლებიც მეტად ხარბდებოდნენ ახალ სათამაშოებს, ახალ საკვებსაც მეტი ენთუზიაზმით ხვდებოდნენ. და პირიქით, ის ბავშვები, რომლებიც ახალი სათამაშოებისკენ არ მიიწევდნენ, ახალ საკვებსაც გაცილებით თავშეკავებულად იღებდნენ. მეტიც, დამოკიდებულება, რომელიც ბავშვს ახალი საკვების მიმართ 12 თვის ასაკში ჰქონდა, წინასწარ იტყობინებოდა ახალი ნივთების მიმართ ამავე ბავშვის დამოკიდებულებაზე 18 თვის ასაკში.
აღსანიშნავია, რომ 6 თვის ასაკის ბავშვებში არ აკვირდებოდნენ ბავშვის ასოციაციებს ახალ სათამაშოებსა და ახალ საკვებთან მიმართებაში, რადგან წინა კვლევებით შეგვიძლია ვივარაუდოთ, რომ ბავშვები თავშეკავებული დაახლოებით 12 თვის ასაკში ხდებიან.
მკვლევართა აზრით, ამ კვლევის შედეგები გამოსადეგია ყოველდღიურ ცხოვრებაში. ჭირვეული ან თავშეკავებული მჭამელი ბავშვის მშობელმა უკეთ იცის, როგორ ჩართოს მყარი საკვები ბავშვის მენიუში.
„იმ ბავშვების მშობლები, რომლებიც ისეთ ახალ სტიმულთან მიმართებაში, როგორიცაა, მაგ. ახალი სათამაშოები, არ იჩენენ აქტიურობას, მზად უნდა იყვნენ იმისთვისაც, რომ მათი შვილები ახალ საკვებთან მიმართებაშიც ასე მოიქცევიან. ასეთი ბავშვების მშობლებმა უნდა იცოდნენ, რომ მათი შვილები დიდი ალბათობით ახალ საკვებს თავიანთი ტემპერამენტის გამო უარყოფენ. თუმცა მათ შეუძლიათ, მოახერხონ და შვილებს მიაღებინონ ახალი პროდუქტი, თუკი დაჟინებით გააგრძელებენ ამ საკვების შეთავაზებას სხვადასხვა გარემოში”.
სხვა სიტყვებით რომ ვთქვათ, თუ თქვენი ბავშვი ძნელად ეჩვევა ახალ სათამაშოებს, ის, სავარაუდოდ, ახალ საკვებსაც ძნელად მიიღებს. ამასთან, რამდენიმე ცდის შემდეგ, თქვენ შეგიძლიათ ბავშვი უფრო „გახსნილი” გახადოთ ახალი საკვების მიმართ. თუ შედეგი პირველივე მცდელობის შემდეგ არ დადგა, სცადეთ კიდევ და კიდევ.
