მასწავლებლები ყოველთვის ვცდილობთ მოსწავლის წიგნთან მიყვანის სხვადასხვა გზების პოვნას. ერთ-ერთი ნაცადი და ეფექტური მეთოდია მოსწავლის დაინტერესება წიგნის წაკითხვით, რომელსაც შემდეგ მოსდევს ამ წიგნის ავტორთან შეხვედრა. ხშირად, განსაკუთრებით დაწყებითი კლასის მოსწავლეებისთვის, გაოცებას იწვევს ეს ფაქტი, ინტერესს აღძრავს და ბავშვები დიდი მონდომებითა და ენთუზიაზმით იწყებენ წიგნის კითხვას. რა ეტაპები უნდა გავითვალისწინოთ მასწავლებლებმა, როდესაც გადავწყვეტთ, რომ წიგნის ავტორი უნდა მოვიწვიოთ?
პირველ რიგში, მასწავლებელი უნდა გაეცნოს წიგნის ავტორის ბიოგრაფიას. მოიძიოს მის შესახებ ინფორმაცია – აქვს თუ არა სურვილი აუდიტორიასთან შეხვედრის, აქვს თუ არა ამის მზაობა. მას შემდეგ, რაც მასწავლებელი თავად გადაამუშავებს ავტორზე ინფორმაციას, უნდა წარუდგინოს მოსწავლეებს, რათა შეუქმნას მათ ერთგვარი წარმოდგენა ავტორზე. პრეზენტაციის დროს სთხოვოს მოსწავლეებს, ჩამოწერონ რამდენიმე შეკითხვა ავტორთან ან ავტორის შესახებ და შეინახონ.
წიგნის არჩევა და გაცნობა
თუ ავტორს რამდენიმე წიგნი აქვს, მასწავლებელს შეუძლია, გააცნოს მოსწავლეებს და ერთობლივად გადაწყვიტონ, რომელ წიგნს წაიკითხავენ, ან თავად აარჩიოს მოსწავლეების მზაობის მიხედვით. წიგნის არჩევის შემდეგ მასწავლებელმა აუცილებლად კლასს უნდა გააცნოს ის. მისი ყდა, დიზაინი, ავტორი, გამომცემლობა. ზოგადად წიგნის შესახებ მიაწოდოს ინფორმაცია – რისგან შედგება ის, რა გზას გადის შექმნამდე.
ვიზიტი სტამბაში
სასურველია მასწავლებელმა დაგეგმოს ვიზიტი სტამბაში, სადაც მოსწავლეები რეალურად აღიქვამენ, როგორ ხდება დაწერილი ტექსტიდან ხელშესახებ წიგნამდე გარდაქმნა. სტამბაში ვიზიტი მოსწავლეებისთვის დაუვიწყარი და საინტერესო იქნება, ვინაიდან ნახავენ, როგორ იბეჭდება გვერდები და იქმნება წიგნი.
კითხვის პროცესი
წიგნის კითხვის პროცესს აუცილებლად დაუსახეთ მიზნად ვადა. მოსწავლეებს დაუწესეთ, რა დროში უნდა დაასრულონ წიგნი. აიღეთ რამდენიმე დღე, რომლის გარკვეულ დროსაც წიგნის განხილვას მოაწყობთ. სთხოვეთ მოსწავლეებს ამოიწერონ პარალელურად ახალი სიტყვები, საინტერესო ფრაზები, ან უბრალოდ მარკირების მეთოდით ამუშავეთ. განხილვის პროცესი მასწავლებელს დაეხმარება, მოსწავლეებს უკეთ გააანალიზებინოს წაკითხული, დაეხმაროს მათ კითხვის პროცესში და მონიტორინგი გაუწიოს, როგორ მიმდინარეობს კითხვის პროცესი.
ნამუშევრების შექმნა
წიგნის კითხვა არ უნდა დარჩეს მხოლოდ წაკითხულ ეტაპად. სასურველი იქნება, თუ პროდუქტს მოსწავლეები თავად შექმნიან. ამისთვის მასწავლებელს შეუძლია დაგეგმოს რამდენიმე აქტივობა:
- სთხოვეთ მოსწავლეებს, შექმნან გმირის თოჯინები (თოჯინების თეატრისთვის), რომლებსაც შემდეგ როლებში გაითამაშებენ;
- მოსწავლეებს ეპიზოდების მიხედვით დაავალეთ დიორამების შექმნა;
- მისწერეთ წერილი გმირებს;
- შექმენით კითხვების კოლექტიური ყუთი, სადაც წიგნის წაკითხვამდე და მისი დასრულების შეკითხვებს ერთად მოაგროვებთ – ამას გამოიყენებთ ავტორთან შეხვედრის დროს;
- დადგით მინი-სპექტაკლი – მოსწავლეებმა გაითამაშონ როლებში რომელიმე ეპიზოდი;
- შექმენით მოსწავლეებთან ერთად ხელნაკეთი წიგნები, ელექტრონული ხმოვანი წიგნები;
- გადაიღეთ მცირე მოკლემეტრაჟიანი ფილმი, სადაც მოსწავლეებს ექნებათ საშუალება, გამოიყენონ უკვე გათამაშებული როლები;
- მოსწავლეებთან ერთად შექმენით ეპიზოდების კომიქსი.
აქტივობები შეგიძლიათ გადაანაწილოთ უშუალოდ წიგნის კითხვის პროცესის დროს, რათა იყოს უფრო საინტერესო და ინტერაქციული.
როდესაც წიგნის კითხვა დასასრულს მიუახლოვდება, დაგეგმეთ ავტორთან შეხვედრა, რომლისგანაც მზაობა შეხვედრისთვის უკვე გაქვთ. რა მნიშვნელოვანი ნაწილი უნდა გაითვალისწინოთ ავტორთან შეხვედრის დაგეგმვის დროს?
- შეუთანხმდით ავტორს მისთვის სასურველ თარიღზე და შეხვედრის ხანგრძლივობაზე;
- შეათანხმეთ, ხომ არ სჭირდება ტრანსპორტირება, საჭიროების შემთხვევაში უზრუნველყავით ის;
- გააცანით ავტორს დღის წესრიგი, რას გეგმავთ, რა ფორმატში უნდა წარიმართოს შეხვედრა (დისკუსია, კითხვა-პასუხი, მონაკვეთის კითხვა და განხილვა თუ სხვა);
- აიღეთ ნებართვა ფოტო-ვიდეო გადაღების შესახებ;
ჩემი აზრით, კარგი იქნება, თუ ავტორის მიმართ გამოვხატავთ რაიმე ფორმით მადლიერებას გაწეული შრომისთვის და არ შემოვიფარგლებით მხოლოდ მადლობის გადახდით.
ზემოთ ჩამოთვლილი საკითხების გათვალისწინებით ორგანიზებული და ნაყოფიერი შეხვედრა წარიმართება. ყოველთვის გახსოვდეთ, რომ წიგნის ავტორები არიან ის ადამიანები, რომლებსაც ჩვენსავით მრავალი საზრუნავი აქვთ, დრო ძალიან ძვირფასია და შეხვედრისთვის ისინი ყოველთვის ხარჯავენ როგორც ადამიანურ რესურსს, ისე მატერიალურს. შესაბამისად, მაქსიმალურად შეეცადეთ კომფორტული გარემო და პირობები შესთავაზოთ, რადგან ისინი თავის მხრივ იხარჯებიან თქვენი მოსწავლეების განვითარებისთვის.
