მნიშვნელოვანია, მოსწავლეები დაწყებითი კლასიდანვე მივაჩვიოთ გარემოზე ზრუნვასა და მის მოფრთხილებას. კეთებით სწავლება კი ამის არაჩვეულებრივი საშუალებაა. პატარებს წყალივით სჭირდებათ პრაქტიკული აქტივობები იმისათვის, რათა ჩვენ მიერ მიწოდებული ინფორმაცია გაითავისონ.
პირველ კლასში გადავწყვიტე ინტეგრირებულად (ბუნებისმეტყველება, სახვითი და გამოყენებითი ხელოვნება) გამეკეთებინა მინი-პროექტი ნარჩენების მართვასთან დაკავშირებით, რომლის შედეგადაც მოსწავლეები გაიგებდნენ, როგორაა შესაძლებელი ნარჩენის გადამუშავება.
დავიწყე რეციკლირების, ანუ ნარჩენების გადამუშავების ნიშნის გაცნობით. ავუხსენი, რომ საგნებს, რომლებსაც რეციკლირების ნიშანი აქვს, გულისხმობს მის ხელმეორედ გადამუშავებას. მივაწოდე ინფორმაცია, თუ რამდენჯერ არის შესაძლებელი გადამუშავდეს, მაგალითად, ქაღალდი (6-7 ჯერ), მინა (უსასრულოდ). ვესაუბრე ქაღალდის დაზოგვის გზებზე და გავმართეთ დისკუსია, რამდენჯერ ვიყენებთ მას არამიზნობრივად.
მოსწავლეებს ავუხსენი, რომ ყველა ნარჩენი შესაბამის ყუთში თავსდება. ასევე ვაჩვენე იმ პროდუქტის სურათები, რომლებიც შეიძლება გადამუშავდეს.
ვაჩვენე ფოტო, სადაც ნათლად ჩანს, რა გზას გადის ნივთი გადამუშავების დროს.
ამის შემდეგ მოსწავლეებს ვთხოვე, შეექმნათ გადამუშავების სიმბოლოები, რათა კარგად დაემახსოვრებინათ ისინი.
მოსწავლეებს ჯერ ვთხოვე, საკლასო ოთახში მოეძებნათ ისეთი ნივთები, რომლებიც დაექვემდებარებოდნენ გადამუშავებას, შემდეგ კი სახლში გაეგრძელებინათ ძიება, გადაეღოთ ფოტო და გამოეგზავნათ ჩემთვის.
მინდოდა, მოსწავლეებს გაეაზრებინათ, რომ ნარჩენების ხელახლა გამოყენება გვეხმარება ნარჩენებიდან მიღებული ზიანის თავიდან არიდებაში. ასევე, მისი ხელმეორედ გამოყენებით ჩვენ ვზოგავთ გარშემო არსებულ რესურსებს. მოსწავლეებს ვაყურებინე საინფორმაციო ვიდეო. ვიდეო 2 მივაწოდე ინფორმაცია, რომ დაინტერესებულ პირს შეუძლია ინტერნეტის საშუალებით მოძებნოს, სად არის თბილისში განთავსებული ნარჩენების დახარისხების სტენდები.
მოსწავლეებს ავუხსენი, რომ არსებობს განახლებადი და არაგანახლებადი რესურსები. შევთავაზე ჯგუფური მუშაობა, რომელიც წინასწარ მქონდა დაგეგმილი. (საჭირო რესურსები მოვიმარაგეთ წინასწარ). მოსწავლეებთან ერთად შევქმენი საკალმე, რომელმაც ადგილი საკლასო ოთახში დაიკავა.
პრაქტიკული მუშაობის შემდეგ, მოსწავლეებს ვთხოვე, სახლში შეექმნათ სხვადასხვა რესურსის გამოყენებით ახალი ნივთი, რომელსაც ისინი გამოიყენებდნენ.
მოსწავლეებმა არაჩვეულებრივი ნამუშევრები შექმნეს და ნათლად დაინახეს, რომ ბევრი ისეთ ნივთს, რომლებსაც ვყრით, შესაძლებელია ახალი სიცოცხლე შევძინოთ.
