კედლის გაზეთთან დადებითი ემოციები არ მაკავშირებს. როგორც წესი, კლასში რამდენიმე – ე.წ. „ხუთოსანი“ – მოსწავლის საქმედ ითვლებოდა და საგაზეთო რუბრიკებიც სასწავლო ცხოვრებისგან დაშორებული იყო. კლასის დანარჩენი მოსწავლეებისთვის კედლის გაზეთი უცხო, უინტერესო და, სავარაუდოდ, მოტივაციის გამქრობი იყო. გადავწყვიტე, კედლის გაზეთის ზემოთ ჩამოთვლილი მახასიათებლები რადიკალურად შემომეტრიალებინა და სასწავლო პროცესის გასახალისებლად გამომეყენებინა. ამგვარად, მიზანი მკაფიო მქონდა – კლასის ყველა მოსწავლის ჩართულობა და წერა-კითხვის სასწავლო რესურსად გამოყენება.
ამჯერად გიამბობთ, მესამეკლასელებთან ერთად როგორ შევქმენით კედლის გაზეთი, თუმცა, ის ყოველ საფეხურზე შეიძლება გამოვიყენოთ.
ნაბიჯი 1.
წინასწარ მოვამზადე დიდი ზომის ფორმატი და კიდეები საღებავით გავაფორმე, დაფაზე გავაკარი და მოსწავლეებს გავაცანი კედლის გაზეთის მახასიათებლები: სახელი, თარიღი, ნომერი, საგაზეთო რუბრიკები.
ნაბიჯი 2.
კლასი დავყავი ჯგუფებად. თითოეულ ჯგუფში 4-5 მოსწავლე გავანაწილე, ერთ-ერთი ჯგუფის წევრობა მეც მომიწია, რადგან ისეთი მოსწავლეები შეიკრიბნენ, რომელთაც საწყის ეტაპზე ჩემი დახმარება დასჭირდებოდათ.
ნაბიჯი 3.
თითოეულ ჯგუფს გავაცანი კუთვნილი რუბრიკა და ინსტრუქციის საფეხურები. რამდენჯერმე გავუმეორე მკაფიო განმარტებები – რა და როგორ გაეკეთებინათ.
ნაბიჯი 4.
ჯგუფის ყველა წევრი კუთვნილი თემის შესახებ ერთ წინადადებას სამუშაო რვეულში წერს. შემდეგ მე ვკითხულობ მათ ნაწერს, გამორჩენილ სასვენ ნიშნებსა თუ სიტყვათა სწორ ფორმებზე ვუთითებ. ამის შემდეგ თაბახის ფურცელზე თითოეულს თავისი წინადადება გადააქვს. პირველ ეტაპზე სათაურის მოფიქრებაში ვეხმარები. წინადადებების დაწერის შემდეგ ილუსტრაციებით აფორმებენ.
ნაბიჯი 5.
ჯგუფური მუშაობის ბოლო ეტაპი პრეზენტაციაა. თითოეული ჯგუფი გამოდის დაფასთან და ბავშვები თავის მოფიქრებულ წინადადებას კითხულობენ. სტატიას კედელზე დამაგრებულ ცარიელ გაზეთზე ვამაგრებთ.
ჩვენი კლასის გაზეთს „პუნში“ დავარქვით. ისევ და ისევ კლასის საკითხავი წიგნის, ტუვე იანსონის „ჯადოქრის ქუდის“ ერთ-ერთი საყვარელი ეპიზოდის მიხედვით, კერძოდ, წიგნის ბოლოს წვეულებისთვის მამა მუმინი პუნშს ამზადებს. საგულდაგულოდ ფუსფუსებს და სხვადასხვა ინგრედიენტს მონაცვლეობით ყრის სასმელში. გაზეთიც ხომ პუნშის მრავალფეროვანი ინგრედიენტების მსგავსად სათაურების, წინადადებების, სიტყვებისა და ილუსტრაციებისგან იკინძება.
კედლის გაზეთის უკვე 2 ნომერი შევქმენით და გადავწყვიტე, ყოველკვირეული სახე მივცე ამ სასწავლო რესურსის დამზადებას. სემესტრის დასრულებისას გამოვფენთ „პუნშის“ ნომრებს, მოვიწვევთ მშობლებს, მასწავლებლებს, მოსწავლეებს და ჩვენს ერთობლივ თავგადასავლებს გავაცნობთ.
რაც შეეხება რუბრიკებს, მრავალი თემის შეთავაზება შეიძლება. სასკოლო ცხოვრებას მივყვებით და თემის შერჩევაც არ გაგვიჭირდება.
ამჯერად გაგაცნობთ ჩვენი გაზეთის მეორე ნომერს, რომლის რუბრიკებიც მეორე ლიტერატურულ კაფეს ამბებს მოვარგეთ.
I ჯგუფმა დაწერა ტუვე იანსონის „ჯადოქრის ქუდის“ შესახებ, II-მ ლიტერატურულ კაფეში მომხდარი ამბები გაგვაცნო, III ჯგუფს ლიტერატურული კაფეს მახასიათებლები შეხვდათ, IV ჯგუფმა კი კლასელების წერილებიდან თითო წინადადება შეარჩია და ამოწერა.
მეორე ლიტერატურული კაფე
ჩვენ რომ ლიტერატურული კაფე გვქონდა, დათუნას კანფეტები დაუცვივდა და ჩვენ მივეცით. ლელა მასწავლებელმა ფირსაკრავი ჩაგვირთო და სიმღერა მომეწონა. ნუნუ დეიდამ ქადები გამოგვიცხო. დალი მასწავლებელი დაგვესწრო. გაბრიელის დაც დაგვესწრო.
„ჯადოქრის ქუდი“
„ჯადოქრის ქუდი“ დაწერა ტუვე იანსონმა. იქ ხდება სახალისო ამბები. ტოფსლას და ვიფსლას აქვთ ულამაზესი ლალის თვალი. მუმინები ცხოვრობენ მუმინების ხეობაში. ეს წიგნი გვასწავლის მეგობრობას.
რა არის ლიტერატური კაფე
ლიტელატური კაფე არის რომ ჩვენ წიგნს ვაცნობთ. მოგვაქვს ტკბილეული და სათამაშო. ლიტერატრული კაფე არის ვუსმენთ, ერთმანეთს შთაბეჭდილებებს ჩვენს კლასელებს. ვუსმენთ მეგობრებს.
პ.ს. როგორც ხედავთ, ამ ჯგუფის წევრებს სიტყვა „ლიტერატურულის“ გამოთქმა უჭირთ. სულ 30 წუთი გვაქვს თითოეული გაკვეთილისთვის და მიუხედავად სამუშაო რვეულებში სწორად დაწერილი წინადადებებისა, გადაწერისას სიჩქარეში შეცდომები დაუშვეს. ამ შეცდომებს აუცილებლად მივუბრუნდებით და შემდეგი გაზეთის რუბრიკაზე მუშაობისას გავითვალისწინებთ.
წინადადება წერილებიდან.
„ჩემო უსაყვარლესო ლელა მას, მომეწონა, რომ მიკრავდით ტაშს და მადლობა ლელა მას თან ძალა მოვიკრიბე“, – ნატა
„მე ძალიან მომეწონა ლიტერატური კაფე“, – დაჩი
„ჩემო დედა მასშავლებელო მე მომეწონა მუსიკის მოსმენა“;
„მე თქვენ სამუდამოთ დაგიმახსოვრებთ“, – ლიზი
პ.ს. სხვისი ფიქრების, აზრების, წინადადებების დაწერისას ბრჭყალები რომ უნდა დასვან, კარგად დაუმახსოვრებიათ, მაგრამ სათაურის ბოლოს წერტილი რომ არ იწერება და რამდენიმე სიტყვის მართლწერაზეც გავამახვილებთ ყურადღებას.
ასე რომ, მოსწავლეები კედლის გაზეთზე ყოველკვირეული მუშაობისას სწავლობენ:
- ჯგუფურ მუშაობას;
- დროის მართვას;
- წინადადებების შედგენას;
- აზრის ჩამოყალიბებას;
- სტატიისთვის შესაფერისი ტონით წერას;
- რედაქტირებას;
- მოვლენების შემჩნევასა და შეფასებას;
- პრეზენტაციას;
- პრობლემების მართვას.
რაც მთავარია, კეთებით სწავლებაში ყველა მოსწავლე ჩართულია, რაც სწავლის მოტივაციას ამაღლებს და სკოლაში მოსვლა უხარიათ. სტატიაზე მუშაობისას ლიტერატურულ კაფეში გადაღებული ფოტოების დაბეჭდვა და „პუნშის“ მეორე ნომრის გაფორმება მომაფიქრდა.
