მანანა რატიანი
სააზროვნო უნარ-ჩვევების განვითარება შეიძლება ეროვნული სასწავლო გეგმის ამოსავალ წერტილად მივიჩნიოთ. თითოეული დისციპლინის საგნობრივი პროგრამა სწორედ იმ პრინციპით შეიქმნა, რომ მოსწავლემ აზროვნება ისწავლოს და ის მხოლოდ ნასწავლის დამახსოვრებაზე არ იყოს კონცენტრირებული. დღეს სასწავლო პროცესი მოსწავლეებს უბიძგებს იმისკენ, რომ გამოთქვან საკუთარი მოსაზრებები, შეძლონ მათი დასაბუთება, იაზროვნონ კრიტიკულად და შემოქმედებითად. სხვა შემთხვევაში, მოსწავლეები ვერ იქნებიან მზად თანამედროვე, სწრაფი ცვლილებების გარემოში ცხოვრებისა და საქმიანობისათვის. რთული სათქმელია, თუ როგორ შეიცვლება სამყარო იმ დროისათვის, როცა მათ მოუწევთ საქმიანობა, რა გამოწვევების წინაშე აღმოჩნდებიან ისინი, რადგან ტექნოლოგიების განვითარება კაცობრიობას საოცრად დინამიკურ რიტმს ჰკარნახობს.
