ვებსაიტი სახელად www.takepart.com საერთაშორისო, მნიშვნელოვან ამბებზე სწრაფი რეპორტინგითაა ცნობილი. ვებსაიტის ავტორები ხშირად ამზადებენ ფოტორეპორტაჟებს მსოფლიოს სხვადასხვა ქვეყნებიდან. სწორედ მათ შემოგვთავაზეს ფოტოკოლაჟი საკლასო ოთახების შესახებ ამერიკის შეერთებული შტატებიდან, ფილიპინებიდან, გერმანიიდან, კონგოდან და სხვა ქვეყნებიდან.
სასწავლო გარემო, ინტერიერი ერთმნიშვნელოვნად აისახება მოსწავლისა და მასწავლებლის განწყობაზე, სასწავლო პროცესის მიმართ დამოკიდებულებაზე და საბოლოო ჯამში, შედეგზე. აი, რას ამბობენ ფსიქოლოგები სასწავლო ინტერიერის მნიშვნელობის შესახებ:
კეთილმოწყობილი სასწავლო გარემო დადებითად მოქმედებს მთლიანად სასწავლო პროცესზე. ის არამარტო მოსწავლეებისთვის, არამედ მასწავლებლებისთვისაც მნიშვნელოვანია. კეთილმოწყობილ გარემოში მხოლოდ ვიზუალური მხარე არ იგულისხმება. როდესაც საკლასო ოთახში ზედმეტად ცივა ან ცხელა, მტვერი ან ანტისანიტარიაა, ეს თანაბრად მოქმედებს როგორც ბავშვების, ასევე პედაგოგების განწყობაზე, ფიზიკურ ჯანმრთელობაზე, რაც საბოლოოდ სწავლის ხარისხზეც აისახება.
კლასში არაჯანსაღი ტემპერატურის გამო შესაძლოა შეფერხებით მიმდინარეობდეს ტვინისა და მოტორული უნარების მოქმედება და მოსწავლემ ვერ შეძლოს სასწავლო პროცესში სრულფასოვანი ჩართვა, საკუთარი უნარებისა და რესურსების ეფექტური გამოყენება, რომ აღარაფერი ვთქვათ ჯანმრთელობისთვის საფრთხის შემცველ ფაქტორებზე. ამის საპირისპიროდ, როდესაც სასწავლო გარემო კეთილმოწყობილი და მოწესრიგებულია, მოსწავლეც და მასწავლებელიც მეტად არიან მოტივირებულები, მათი გუნება-განწყობა ხალისიანი, სწავლა კი ხარისხიანია. რა თქმა უნდა, კეთილმოწყობილი სასწავლო გარემო არ არის მოსწავლის ეფექტური, მოწესრიგებული ქცევისა და სწავლის გარანტი, თუმცა ის ერთ-ერთი მნიშვნელოვანი კომპონენტია და გარკვეულწილად სასწავლო პროცესზეც მოქმედებს.
ეკატერინე ორი მოსწავლის მშობელია. ორივე ბავშვი საჯარო სკოლაში სწავლობს. მათი სკოლა დიდი ხნის გაურემონტებელია. დაძველდა სასწავლო ინვენტარიც. ეკატერინე გვიამბობს, რომ სკოლის ადმინისტრაციისაგან რემონტს არ მოელის და სხვა მოსწავლეების მშობლებთან ერთად თვეში ერთხელ საკლასო ოთახებს თავად აწესრიგებს. მშობლები ზოგიერთი ნივთების გაახლებასაც ცდილობენ. ეკატერინეს აზრით, რაც უფრო ახალ და სუფთა გარემოში ისწავლიან ნატო და თემო, მით უფრო ხალისიანი იქნება სწავლა და ჯანმრთელობის მხრივაც მათ ნაკლები პრობლემები შეექმნებათ.
