1956 წელს ამერიკელმა ფსიქოლოგმა ბენჯამინ ბლუმმა დაამუშავა კლასიფიკაციის სისტემა განათლების მიზნებისთვის (Bloom, B.S,1956. Taxonomy of educational objectives: The classification of educational goals: Handbook I, cognitive domain. New York;), რომელიც დღეს ბლუმის ტაქსონომიის სახელითაა ცნობილი და სხვადასხვა დისციპლინის შესწავლის პროცესის წარმართვისთვისაა ადაპტირებული. იმ დროისთვის არსებული სწავლების მეთოდების კვლევისას ბლუმმა შენიშნა, რომ ტესტების საკითხების 95% მოსწავლეებისგან დაბალი დონის ინტელექტუალურ აქტივობას მოითხოვდა – ისინი მიმართული იყო, ძირითადად, ინფორმაციის აღდგენაზე და ფაქტობრივ ცოდნას ამოწმებდა. სწავლა-სწავლების მიზანი კი არ არის და ვერ იქნება მხოლოდ ცოდნის დაგროვება. მოსწავლეს სააზროვნო უნარების განვითარება, მიღებული ინფორმაციის განზოგადება და შემდგომში პრაქტიკული გამოყენებაც უნდა შეეძლოს – მიღებულ ინფორმაციაზე დაყრდნობით აუცილებელია სინთეზის და შეფასების გონებრივი ოპერაციების წარმოება.