ხელოვნური ინტელექტი ისე შემოიჭრა ჩვენს ყოველდღიურობაში, ალბათ ახალგაზრდა არ არსებობს, გარკვეული წარმოდგენა არ ჰქონდეს მასზე. უფრო მეტიც, უფრო ხშირად იყენებენ კითხვებზე პასუხის, თხზულების, ამოცანების დასაწერად და კიდევ უამრავი მიზნისთვის. საუკეთესო ფოტოებსა და ანიმეებსაც ქმნიან. მას არც კომიქსების შექმნაში ჰყავს ბადალი. თუმცა მხოლოდ გარემოს დამცველები უყურებენ მას კრიტიკული თვალით. ჩემი წერილის მიზანი მოსწავლეების დაფიქრებაა, რა უკეთესია, ხელოვნური ინტელექტის გამოყენებით მიღწეული პროგრესი, თუ მდგრადი განვითარება და პლანეტის დაცვა.
გაკვეთილი 60-70 წუთზეა გათვლილი. დაწყვილებული გაკვეთილი უკეთესია.
აქტივობა 1: დილემის წარდგენა – პრეზენტაცია:
სლაიდი 1. მასწავლებელი წარადგენს დილემას. მან არ უნდა დაიკავოს არცერთი მხარის პოზიცია.
სლაიდი 2. მასწავლებელი სვამს კითხვებს: რა არის ხელოვნური ინტელექტი? რა არის მდგრადი განვითარება? მოსაზრებების მოსმენის შემდეგ აჩვენებს სლაიდს.
მოსწავლეები ქმნიან 4-კაციან ჯგუფებს. მასწავლებელი წარადგენს ქვიზის შეკითხვებს (სლაიდი 3-7). თითოეული კითხვისთვის ჯგუფს ეძლევა 3-4 წუთი. თანხმდებიან ჯგუფში, შემდეგ მსჯელობენ სხვა ჯგუფებთან ერთად. ხუთივე კითხვის გავლის შემდეგ, მასწავლებელი აჩვენებს სწორ პასუხებს (სლაიდი 8-9). ყველა პასუხის შემდეგ აჯამებენ აქტივობას.
აქტივობა 2: დისკუსია, რომელი პროფესიის ადამიანს სჭირდება ყველაზე მეტად AI?
ცხრა ბარათზე წერია პროფესია. მოსწავლეები შემთხვევით იღებენ ბარათს, ისე, რომ ვერ ხედავენ, რა როლი უნდა მოირგონ. მოსწავლეთა რაოდენობა კლასში თუ ცხრის ჯერადია, ეს საუკეთესო ვარიანტია მუშაობისთვის. გადააბრუნებენ ბარათებს. ფურცლებზე ჩამოწერენ საკუთარ მოსაზრებებს. მოსწავლე წრეზე გადადგამს ათ ნაბიჯს, და რომელი პროფესიის ადამიანის წინაც აღმოჩნდება, მას უნდა წარუდგინოს თავი და დაარწმუნოს საკუთარი მოსაზრებების სისწორეში. ასე აკეთებს თითოეული მოსწავლე სამჯერ. ჯგუფის წევრები თანხმდებიან, რომელი პროფესიის ადამიანს სჭირდება ყველაზე მეტად AI, რომელი პროფესიისას – ყველაზე ნაკლებად. დაალაგებენ ბარათებს რომბის ფორმაზე, როგორც მეთორმეტე სლაიდზეა წარმოდგენილი.
აქტივობა 3: სამი აზრი
მასწავლებელი დაფაზე ხატავს სამკუთხედს. მოსწავლეებს ურიგებს წებოვან ფურცლებს, რომლებზეც მოსწავლეები აწერენ საკუთარ სახელებს. სლაიდ 13-ზე მოცემულ ინფორმაციას გაეცნობიან. თუ ამ სამიდან კონკრეტულად რომელიმეს სრულად ეთანხმებიან, წებოვანი ფურცელი სამკუთხედის შესაბამის წვერზე უნდა დააკრან. თუ ორი ადამიანის მოსაზრებას თანაბრად ეთანხმებიან, მაშინ ფურცელი უნდა მიაკრან წვეროების შემაერთებელ გვერდზე. რამდენიმე მოხალისე დააფიქსირებს აზრს. უნდა წახალისდეს ისინიც, ვინც შეცვლის მოსაზრებას. ბოლოს შეაჯამეთ აქტივობა.
რესურსი მასწავლებლისთვის:
