ფიზიკის შესწავლა შეუძლებელია წარმოსახვის გარეშე. სწავლებისას ძირითადად განვიხილავთ ადამიანის თვალისთვის უხილავ პროცესებსა და მოვლენებს. მაგალითად, მოსწავლეებს ვესაუბრებით ნივთიერების აგებულებაზე, მოლეკულებზე, ატომებზე, ატომის შიგნით არსებულ ბირთვზე, მის გარშემო ორბიტაზე მოძრავ ელექტრონებზე. ყურადღებას ვამახვილებთ იმ საკითხზე, რომ კიდევ უამრავი ელემენტარული ნაწილაკია აღმოჩენილი და მეცნიერები კვლავაც აგრძელებენ მუშაობას მიკროსამყაროს შესწავლის მიმართულებით.
მოზარდებთან მსგავს თემებზე საუბრისას, თავი მათ ადგილზე უნდა წარმოვიდგინოთ. სამყაროში მიმდინარე პროცესების შესამეცნებლად, დიდი მნიშვნელობა აქვს ანიმაციებს, გიფებს და ვირტუალური ლაბორატორიის საშუალებით ექსპერიმენტების ჩატარებას. ეს გვეხმარება, ავუხსნათ მოსწავლეებს, როგორ ხდება მეცნიერებაში თვალისთვის უხილავი საგნების შესწავლა, მისი არსებობის დასაბუთება და შესაბამისი კანონზომიერებების დადგენა.
