შაბათი, თებერვალი 24, 2024
24 თებერვალი, შაბათი, 2024

ანბანის ახსნის სახალისო აქტივობები

ალბათ დამეთანხმებით, რომ განწყობას დიდი მნიშვნელობა აქვს. მას განსაკუთრებული ადგილი უჭირავს დაწყებითი კლასის მოსწავლეებში. როდესაც მთელი კვირა ვგეგმავდი, რა აქტივობებს განვახორციელებდი ანბანის ახსნის დროს, უკუკავშირში ერთ-ერთმა მოსწავლემ კითხვაზე: ,,რა მოგეწონათ ყველაზე ძალიან დღევანდელ გაკვეთილში?“, პასუხად დამიბრუნა: „კარზე დაკიდებული წვიმები“. შემდეგ უფრო კონკრეტულად დავსვი შეკითხვა „რომელი აქტივობა მოგეწონათ?“. და შესაბამისად, უფრო დაკონკრეტებული პასუხიც მივიღე, თუმცა მოსწავლის პასუხმა მიმახვედრა, რომ მათთვის აქტივობების გარდა, გარემოსაც ძალიან დიდი მნიშვნელობა აქვს. მე გამიხარდა, რომ ამაზე ნაფიქრი მქონდა.

წარმოგიდგენთ ჩემ მიერ განხორციელებულ აქტივობებს, რომლებიც ანბანის შესწავლის დაწყების დღეს განვახორციელე.

რაოდენ ბანალურიც არ უნდა იყოს, გეტყვით, რომ ბუშტები ის მარტივი საგანია, რომელიც მოსწავლეს ყოველთვის უხარია და არასდროსაა ზედმეტი. სწორედ ამიტომ, იისფერი ბუშტები ყველა მერხს დავუმაგრე. საკლასო ოთახის შემოსასვლელში კი ზემოთ ნახსენები წვიმები დავკიდე, ისიც იისფერი.

მოსწავლეებს გაკვეთილის გეგმა გავაცანი, თუ რას ეძღვნებოდა ჩვენი საგაკვეთილო პროცესი. ვაყურებინე საინფორმაციო ვიდეოს იაკობ გოგებაშვილზე და მოვასმენინე სიმღერა ანბანზე.

დავათვალიერებინე დედა ენის წიგნი, რომელიც 126-ე საჯარო სკოლის დაწყებითი კლასის მასწავლებლების მიერ არის შექმნილი. წიგნი გაფორმებულია საოცარი ნამუშევრებით, რომლებიც რუდუნებით არის შერჩეული. დედა ენის დიდი წიგნის დათვალიერება ყველა მოსწავლემ შეძლო. დაასახელეს საკუთარი სახელის თავბგერა, რომელთანაც შემდეგ სამახსოვრო ფოტო გადაიღეს.

დედა ენის წიგნის დათვალიერების შემდეგ დავურიგე წინასწარ მომზადებული ხელნაკეთი წიგნი. მოსწავლეებმა გააფორმეს წიგნის ყდა და შიგთავსი, სადაც ასო-ბგერა ,,ა“ და ,,ი“ იყო.

წიგნზე მუშაობის დასრულების შემდეგ, მოსწავლეებმა გამოჭრეს ფერადი ფურცლებისგან ია და ფოთლები, რომლებიც ერთ დიდ ფორმატზე დააკრეს და საბოლოო ჯამში იებით მოფენილი მდელო გამოვიდა. განსაკუთრებული ადგილი უჭირავს ერთობლივი ნამუშევრის შექმნას, რადგან ის ყოველთვის იკავებს ადგილს საკლასო ოთახის თვალსაჩინო ადგილას.

განტვირთვის მიზნით, მოსწავლეებმა სამახსოვრო ფოტო გადაიღეს ჩარჩოსთან, რომელიც გაფორმებული იყო იებით.

მოსწავლეებისთვის ერთ-ერთი საყვარელი აქტივობა არის პლასტილინების გამოყენება. სწორედ ამიტომ პლასტილინებისგან გამოვაძერწვინე ასო-ბგერა ,,ი“ და ,,ა“. მოსწავლეებს მუშაობის დაწყებამდე შევახსენე პლასტილინზე მუშაობის წესები. ბოლოს კი წიწიბურათი სავსე ზედაპირზე ვთხოვე შემოეხაზათ შესწავლილი ასოები.

ახალი მასალის განმტკიცებისთვის, მოსწავლეებს შევასრულებინე შემდეგი დავალება. ფორმატზე დავწერე ასო-ბგერები. ვუთხარი, რომ მიმოფანტულ ასოებს შორის მათ უნდა დაეჭირათ ასო-ბგერა ,,ი“ და ,,ა“.

აღსანიშნავია ისიც, რომ განწყობის შესანარჩუნებლად მუშაობის დროს ჩართული მქონდა მუსიკა.

მოსწავლეების ემოციებიდან გამომდინარე, ჩემი მიზანი შესრულებულია. მათ ამაღელვებელი განწყობა ნამდვილად შეექმნათ ანბანის ახსნის პირველ გაკვეთილზე. თუ როგორ გაგრძელდება ეს, ამაზეც ცხადია, ვიზრუნებ.

 

კომენტარები

მსგავსი სიახლეები

ბიოქიმია და გარემო

მეკობრეების ქალაქი

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი