მასწავლებელთა პროფესიული განვითარების ეროვნული ცენტრის საინფორმაციო-საგანმანათლებლო რესურსების, ჟურნალ „მასწავლებლის“ და ინტერნეტგაზეთ
„mastsavlebeli.ge“ს მიერ , ლიბერთი ბანკის მხარდაჭერით, გამოცხადებული
ლიტერატურული კონკურსი- „ვწერ მასწავლებლისთვის“- დასრულდა!
საუკეთესო მოთხრობის ავტორები ცნობილია. ავტორების დაჯილდოება საქართველოს პარლამენტის ეროვნულ ბიბლიოთეკაში გაიმართა.
საზეიმო დაჯილდოება მასწავლებელთა პროფესიული განვითარების ეროვნული ცენტრის ინიციატივითა და მხარდაჭერით გაიმართა და სტუმრებს ცენტრის დირექტორი ბერიკა შუშაკიძე და დირექტორის მოადგილე ნანა ჭოჭუა მიესალმა, მათ მადლობა გადაუხადეს მწერლებს, მხარდამჭერებს, პარტნიორებს, ჟიურის და კონკურსის მნიშვნელობასა და მხარდაჭერის აუცილებლობაზე ისაუბრეს.
კონკურსის სპეციალურმა ჟიურიმ, რომლის შემადგენლობაში იყვნენ : რუსუდან რუხაძე, ბექა ადამაშვილი, ირმა ტაველიძე, ნატო ინგოროყვა, ალექსანდრე ლორთქიფანიძე შეარჩია ათი საუკეთესო მოთხრობა, რომელთაგან სამი გამარჯვებული გამოვლინდა. გამარჯვებული მოთხრობის ავტორებს მასწავლებელთა პროფესიული განვითარების ეროვნული ცენტრის სპეციალური პრიზები და კონკურსის პარტნიორ ლიბერთი ბანკისგან ფულადი ჯილდო გადაეცათ.
I ადგილი- ნათია როსტიაშილი –ფუტკარი ბარამბოს ტოტზე- 1000 ლარი;
II ადგილი – თამთა დოლიძე – ამ ომში არავინ დაბერდება – 700 ლარი;
III ადგილი – სოფიო კუბლაშვილი – მესამე მე – 500 ლარი.
კონკურსის პარტნიორმა ლიბერთი ბანკმა და მისმა წარმომადგენელმა,სახელმწიფო სექტორის დაფინანსებისა და სახელფასო პროექტების დეპარტამენტის უფროსმა ლევან სამუშიამ მათი რჩეული ავტორი ნინო ქადაგიძე მოთხრობისთვის – „ანიკო მასწავლებელი” სპეციალური პრიზით დააჯილდოვა.
“საქართველოს პროფესიონალ ქიმიკოსთა ასოციაციის” სპეციალური პრიზი ელიზბარ ელიზბარაშვილმა გადასცა თამარ ესიტაშვილს მოთხრობისთვის “მზე ღრუბლების უკან”.
თბილისის მუზეუმების გაერთიანების რჩეული გახდა მიშა ბახსოლანი მოთხრობისთვის “ხეზე ასვლა” და მუზეუმების გაერთიანების პრიზები ასევე გადაეცათ ათივე მოთხრობის ავტორს.
გამომცემლობა “ინტელექტის” რჩეული ავტორები გახდნენ – დიანა ანფიმიადი -მოთხრობისთვის “მფარველი ანგელოზი” და მაკა ცხვედიანი მოთხრობისთვისთვის “დაჯექი ალბერტ”.
გამომცემლობა “სულაკაურმა“ და მისმა წარმომადგენელმა ნათია ნაფეტვარიძემ, ათივე კონკურსანტს გადასცა გამომცემლობის საჩუქარი და თავისი რჩეული ავტორი- მიშა ბახსოლიანი – სპეციალური პრიზით დააჯილდოვა.
კონკურსის სიმბოლო გადაეცა კონკურსის გამარჯვებულს – ნათია როსტიაშვილს.
კონკურსის მიზანი მასწავლებლის პროფესიის მხარდაჭერაა. საუკეთესო მოთხრობა უნდა ემსახურებოდეს სწორი ღირებულებების დამკვიდრებას სასკოლო გარემოში, აღწერდეს თანამედროვე სასკოლო ცხოვრებას, მასწავლებლისა და მოსწავლის ურთიერთობის სირთულეებს და სახავდეს მათი დაძლევის გზებს.
ჟურნალ „მასწავლებლის“ სპეციალური ნომერი, რომელშიც კონკურსში გამარჯვებული ათი საუკეთესო მოთხრობა შევიდა, გამოქვეყნდება ინტერნეტგაზეთ „„mastsavlebeli.ge-ზე.
ფოტო- გელა ბედიანაშვილის
