ამ რამდენიმე ხნის წინ ჩვენს სკოლაში ქართული ენის კვირეული მოვაწყვეთ და გადავწყვიტე, ბავშვებთან ყოველდღე თითო იდიომა დამემუშავებინა. ფრაზებზე მუშაობამ ძალიან გაგვიტაცა, განსაკუთრებით იმის აღმოჩენამ, რომ ყოველ იდიომას თავისი ისტორია და ამბავი ახლავს თან. ამ საკითხზე რამდენიმე წერილიც მაქვს გამოქვეყნებული, ახლა კი გთავაზობთ კიდევ ერთი ფრაზის თავგადასავალს და რამდენიმე აქტივობას.
ოდესღაც, ბიბლიის მიხედვით, ადამიანებმა გადაწყვიტეს, ისეთი ქალაქი და კოშკი აეშენებინათ, ცას რომ მისწვდენოდა. ღმერთს ადამიანების ასეთი თავდაჯერებულობა არ მოეწონა და ღმერთამდე ასვლის მსურველ კაცობრიობას საერთო ენა წაართვა, ამის შემდეგ მშენებლობა შეწყდა, რადგან ადამიანები ერთმანეთს ვეღარ უგებდნენ, ისინი სხვადასხვა ენაზე საუბრობდნენ. სხვადასხვა ენაზე მოსაუბრე ადამიანები მთელს დედამიწაზე გაიფანტნენ და დასახლდნენ. ადგილს, სადაც ეს ამბავი მოხდა ბაბილონი უწოდეს, რაც ძველებრაულად არევას ნიშნავს.
ბაბილონის გოდოლიაო, იტყვიან ხოლმე, როდესაც არეულობა და აურზაურია, უწესრიგოდ მოფუსფუსე ხალხში.
შენც შეგიძლია ეს ფრაზა გამოიყენო უთავბოლო დავისა და ყაყანის დროს, როდესაც მოკამათეები ერთმანეთს აზრის გამოთქმას არ აცდიან, თუ კი იტყვი, ნამდვილი ბაბილონის გოდოლია აქო, ან – რა არის, როგორ ხმაურობთ, ბაბილონის გოდოლს ხომ არ აშენებთო, მოკამათეები ალბათ გაჩერდებიან და კითხვასაც დაგისვამენ, თუ რას გულისხმობ. შენ კი მოუყვები უძველესი დროის ადამიანების სურვილებზე და მისწრაფებებზე. აურზაური, ყაყანიც შეწყდება. აი, ასეთი ჯადოსნური ძალა აქვთ ფრაზებს.
ლექსიკონი
კოშკი – ვიწრო, მაღალი, ცილინდრული შენობა.
გოდოლი – მაღალი კოშკი, ციხესიმაგრის ერთ-ერთი სახეობა.
ის, რაც ტექსტის წაკითხვის შემდეგ დამამახსოვრდა…
რა განიზრახეს ადამიანებმა?
რა არ მოეწონა ღმერთს?
რატომ შეწყდა მშენებლობა?
სად გაიფანტნენ ადამიანები?
რას ნიშნავს „ბაბილონი“?
მოფუსფუსე ადამიანები ერთმანეთის სიტყვებს ვეღარ იგებენ, შეძლებ, დაეხმარო არეული სიტყვების დალაგებაში? რომ მათ საუბარი შეძლონ.
აქ რამდენიმე სიტუაციაა ჩამოთვლილი, რომელ სიტუაციებს მიუსადაგებდი ფრაზას: „ბაბილონის გოდოლი“, შემოხაზა წინადადებები წითლად:
- კონცერტზე ორკესტრი ხმაშეწყობით უკრავდა.
- ბავშვები სტადიონზე ფეხბურთს თამაშობენ.
- საკლასო ოთახში მასწავლებლის კითხვას დიდი აურზაური მოჰყვა.
- ქუჩაში მანქანები წრიულად მოძრაობდნენ.
- სკვერში შეკრებილი ადამიანები ისე ხმამაღლა საუბრობდნენ, კაცი ვერაფერს გაიგებდა.
- ხის ქვეშ რამდენიმე კაცი შეკრებილიყო, მათი ყაყანის ხმა ქუჩის ბოლოს აღწევდა.
შექმენი შენი წინადადებები:
მოცემული ხუთი ზმნა ტექსტიდანაა.
სიტყვების ბანკში კი არსებითი და ზედსართავი სახელები გვაქვს.
თითოეულ ზმნას ერთი შესაბამისი არსებითი სახელი და ზედსართავი სახელი უნდა შეუსაბამო და წინადადება შეადგინო.
თითოეული ზმნა შეგიძლია რამდენიმე წინადადებაში გამოიყენო.
ხოლო სიტყვების ბანკიდან მხოლოდ ერთხელ შეგიძლია სიტყვები ისესხო.
რაც მეტ წინადადებას შეადგენ, უკეთესია.
ნასესხები სიტყვების ფორმის ცვლილება შეგიძლია, მოცემული ზმნების კი არა.
კარგი იქნება, თუ კი წინადადებებს ილუსტრაციებსაც დაურთავ.
ზმნები:
აეშენებინათ, საუბრობდნენ, გაიფანტნენ, დასახლდნენ, მოეწონა.
სიტყვების ბანკი
არსებითი სახელები:
ქოხი, სახლი, კოშკი, გოდოლი, ადამიანი, ცხოველი, ხე, ფოთოლი, ფრინველი, თევზი, ლოკოკინა, წიგნი, ბალახი, გვირილა, ღრუბელი, პლანეტა, გოგონა, ბიჭუნა, პეპელა, ნემსიყლაპია, მთა, ბარი, სოფელი, ქალაქი, ქვეყანა, მინდორი.
ზედსართავი სახელები:
ძველი, მშვენიერი, საოცარი, სევდიანი, მოწყენილი, მხიარული, მოხუცი, ახალგაზრდა, ძლიერი, სუსტი, ჭრელი, ქათქათა, იდუმალი, ხასხასა, მარდი, კეთილი, სასიამოვნო, ნაზი, მაგარი, ამაყი, გამორჩეული.
მოიფიქრე გაგრძელება:
ტექსტში მოცემულ ამბავს გაგრძელება მოუფიქრე. შენი აზრით, რა მოხდა მას მერე, რაც ადამიანები მთელს ქვეყნიერებაზე გაიფანტნენ?
როგორ გაგრძელდა მათი ცხოვრება?
შეხვდებოდნენ თუ არა ოდესმე კიდევ ერთმანეთს?
შეგიძლია მწერლად იქცე და ნებისმიერი ამბავი გამოიგონო. ოღონდ ერთი პირობით:
აუცილებლად ტექსტს უნდა უკავშირდებოდეს და შენი ამბის პერსონაჟები ბაბილონის გოდლის მშენებლები უნდა გახდნენ.
