შაბათი, თებერვალი 24, 2024
24 თებერვალი, შაბათი, 2024

მომავლისთვის საჭირო ცოდნა და უნარები

„ოცი წლის შემდეგ იმას უფრო ინანებთ, რაც არ გაგიკეთებიათ, ვიდრე იმას, რაც გააკეთეთ. ასე რომ, გადალახეთ წინააღმდეგობა, გაცურეთ უსაფრთხო ნავსადგურიდან, ცურვისას დაიჭირეთ პასატები. შეისწავლეთ. იოცნებეთ. აღმოაჩინეთ”.

მარკ ტვენი

2007 წელს BBC-ს სიახლეთა ბლოკში ბილ გეიტსი წერდა:

„უკანასკნელი 30 წლის განმავლობაში მომხდარი უმნიშვნელოვანესი ცვლილება ის გახლავთ, რომ ციფრულმა ტექნოლოგიამ თითქმის ყველა ინფორმაციულ მუშაკად აქცია. თითქმის ყოველგვარ სამუშაოზე ადამიანი იყენებს კომპიუტერულ პროგრამებს და ამუშავებს ინფორმაციას, რომელიც მის ორგანიზაციას უფრო ეფექტური საქმიანობის საშუალებას აძლევს. ეს შეიძლება ითქვას ნებისმიერ მუშაკზე, დაწყებული საცალო გამყიდველით, რომელიც ხელის სკანერს იყენებს საქონლის გასატარებლად, დამთავრებული ორგანიზაციის მენეჯერით, რომელიც კომპიუტერულ პროგრამებს ბაზრის ტენდენციების ანალიზისთვის იყენებს. თუ დავაკვირდებით, როგორ მიმდინარეობს განვითარება და სად და როგორ იქმნება კონკურენტული უპირატესობა, დავრწმუნდებით, რომ პროგრამული უზრუნველყოფის ინსტრუმენტების ეფექტურ გამოყენებას გადამწყვეტი როლი ეკისრება თანამედროვე გლობალური ცოდნის ეკონომიკაში.

კომპიუტერული პროგრამებისა და საინფორმაციო ტექნოლოგიების სხვა ინსტრუმენტების მყარი სამუშაო ცოდნა თითქმის ყოველ სფეროში წარმატებული კარიერის აუცილებელ პირობად იქცა.

თუ გავიხსენებთ უკანასკნელ ათწლეულებში გაჩენილ ყველაზე საინტერესო საგნებს, დაწყებული პორტატიული მუსიკალური და სათამაშო მოწყობილობებით, დამთავრებული მობილური ტელეფონებითა და სამედიცინო ტექნოლოგიებით, დავრწმუნდებით, რომ ისინი სწორედ მეცნიერებისა და ტექნიკის სფეროდან დამკვიდრდა.

დღესაც და მომავალშიც მრავალი მნიშვნელოვანი სამუშაო დაკავშირებული იქნება კომპიუტულ პროგრამებთან, „მაიკროსოფტის” მსგავსი კომპანიის პროგრამული უზრუნველყოფა იქნება ეს თუ სხვა ორგანიზაციების დახმარება წარმატების მისაღწევად საინფორმაციო ტექნოლოგიის ინსტრუმენტების გამოყენების კუთხით.

არსებითია კომუნიკაციისა და სხვადასხვაგვარ ადამიანებთან ხმაშეწყობილად მუშაობის უნარები.

ბევრს ჰგონია, რომ კომპიუტერული პროგრამების შექმნა ინდივიდუალური, იზოლირებული სამუშაოა – ადამიანი ზის ოფისში, კარი დახურული აქვს და კოდებს წერს.

ასე არ არის.

კომპიუტერული პროგრამების ინოვაცია, სხვა ინოვაციების მსგავსად, თანამშრომლობას და ერთმანეთისთვის იდეების გაზიარებას, მომხმარებელთან ურთიერთობას და საუბარს, მათგან უკუკავშირს და მათი მოთხოვნების შესწავლას მოითხოვს.

მიმაჩნია, რომ დიდი მნიშვნელობა აქვს მუდმივი სწავლის ჟინსაც. საკმაოდ ახალგაზრდას ჩამომიყალიბდა წიგნების კითხვის ჩვევა. უწყვეტი განათლება უმნიშვნელოვანესია.

რა თქმა უნდა, დღეს ძალიან ადვილია ინტერნეტში შესვლა და ნებისმიერ საინტერესო საკითხზე ინფორმაციის მოძიება.

სამყაროს მიმართ ამგვარი ცნობისმოყვარეობა ადამიანს წარმატების მიღწევაში ეხმარება, განურჩევლად იმისა, რა სახის სამუშაოს შესრულებას გადაწყვეტს”.
მომავლის ინსტიტუტი – The Institute for the Future, IFTF – დამოუკიდებელი, არაკომერციული სტრატეგიული კვლევის ჯგუფია, რომელიც 40 წელიწადზე მეტია გვთავაზობს მომავლის პროგნოზს. მისი საქმიანობის მიზანია, განსაზღვროს მომავლის ტენდენციები და კანონზომიერებები, რომლებიც გარდაქმნის გლობალურ საზოგადოებასა და გლობალურ ბაზარს. ის გვთავაზობს ბიზნესსტრატეგიის, დიზაინის, ინოვაციისა და სოციალური დილემების კვლევას. კვლევა მოიცავს ღრმა ტრანსფორმაციული ტენდენციების შესწავლას, დაწყებული ჯანდაცვითა და ჯანდაცვის ტექნოლოგიებით, დამთავრებული სამუშაო ადგილითა და ადამიანის იდენტობით. ინსტიტუტი კალიფორნიაში, პალო ალტოში მდებარეობს.

გთავაზობთ მათი კვლევის მოკლე ანგარიშს:

1990-იან წლებში IBM-ის Deep Blue-მ ჭადრაკის დიდოსტატი გარი კასპაროვი დაამარცხა; დღეს IBM-ის სუპერკომპიუტერი Watson-ი ამარცხებს მოწინააღმდეგეებს Jeopardy-ში. ათი წლის წინ მუშაკები გარე რესურსების მოზიდვის თაობაზე წუხდნენ; დღეს დიდ კომპანიებს შეუძლიათ, ვირტუალური გუნდი შექმნან გაყიდვებისთვის, მომხმარებლის სერვისისა და მრავალი სხვა დავალების შესასრულებლად. რამდენიმე წლის წინ NASA-ს წლები დასჭირდებოდა ტელესკოპით გადაღებული მილიონობით ფოტოს ერთმანეთთან დასაკავშირებლად, მაგრამ თანამშრომლობის პლატფორმის საშუალებით და ათასობით მოხალისის დახმარებით ამ დავალების შესრულება რამდენიმე თვეში გახდა შესაძლებელი.

გლობალური ურთიერთდაკავშირებულობა, ჭკვიანი მანქანები და ახალი მედია რამდენიმე იმ ფაქტორთაგანია, რომლებიც ცვლის ჩვენს წარმოდგენას შრომაზე, მის არსსა და იმ უნარებზე, რომლებიც მომავალში ნაყოფიერი მუშაობისთვის იქნება საჭირო.

მომავლის ინსტიტუტის მიერ ჩატარებული კვლევა აანალიზებს ექვს ფაქტორს, რომლებიც შეცვლის მსოფლიოს სამუშაო ლანდშაფტს და მომავალი 10 წლის განმავლობაში საჭირო უნარებს განსაზღვრავს. ის არ გვთავაზობს მომავალში საჭირო სამუშაოების ჩამონათვალს. მრავალი სხვა კვლევა სწორედ სპეციფიკურ სამუშაოთა კატეგორიებისა და სამუშაო მოთხოვნების განსაზღვრას ისახავდა მიზნად, მაგრამ დრომ აჩვენა, რომ ამგვარი პროგნოზი რთულია და ხშირად მცდარიც. მომავლის ინსტიტუტის მიერ ჩატარებული კვლევა გამიზნულია იმ სამუშაო უნარების განსასაზღვრად, რომლებიც მომავალში იქნება საჭირო ამა თუ იმ სამუშაოს შესასრულებლად და ამა თუ იმ გარემოში საქმიანობისთვის.

სამუშაო უნარების დასახელებამდე მომავლის ინსტიტუტი ჩამოთვლის გლობალური ცვლილების გამომწვევ ექვს მიზეზს:

1. უკიდურესი დღეგრძელობა: სიცოცხლის საყოველთაო ხანგრძლივობის ზრდა ცვლის კარიერისა და სწავლის ბუნებას.

2. ჭკვიანი მანქანებისა და სისტემების სიმრავლე: სამუშაოს ავტომატიზაცია აიძულებს მუშაკებს, უარი თქვან მექანიკურ, რუტინულ სამუშაოებზე.

3. გამოთვლითი სამყარო: სენსორებისა და ინფორმაციის დამუშავების სისტემების მძლავრი ზრდა სამყაროს პროგრამირებად სისტემად აქცევს.

4. ახალი მედიაეკოლოგია: კომუნიკაციის ახალი ინსტრუმენტები მოითხოვს (ტექსტის გარდა) ახალ მედიაწიგნიერებას.

5. ზესტრუქტურული ორგანიზაციები: ახალი ტექნოლოგიები და მედიაპლატფორმები იწვევს უპრეცედენტო რეორგანიზაციას ღირებულებათა წარმოებისა და შექმნის თვალსაზრისით.

6. გლობალურად დაკავშირებული მსოფლიო: გლობალური ურთიერთქმედების ზრდის გამო მრავალფეროვნება და ადაპტაცია ორგანიზაციული ოპერაციების ღერძი ხდება.

რას მოასწავებს ეს ექვსი მძლავრი ცვლილება მომავალი ათწლეულის მუშაკისთვის? აი ის ათი უნარი, რომლებიც გადამწყვეტი იქნება ნებისმიერ სამუშაოზე წარმატებისთვის:

1. გააზრება – უნარი, უფრო ღრმად ჩასწვდე მნიშვნელობას;

2. სოციალური ალღო – სხვებთან ღრმა და უშუალო ურთიერთობის უნარი, უნარი, იგრძნო და ხელი შეუწყო რეაქციებსა და სასურველ ინტერაქციას;

3. ახლებური და ადაპტაციური (მოქნილი) აზროვნება – პრობლემების გადაჭრის ისეთი გზების პოვნის უნარი, რომლებიც არ ეფუძნება წესებს ან მექანიკურ დამახსოვრებას;

4. კროსკულტურული კომპეტენცია – განსხვავებულ კულტურულ გარემოში მუშაობის უნარი;

5. გამოთვლითი აზროვნება – დიდი რაოდენობის მონაცემთა აბსტრაქტულ კონცეფციებად ქცევისა და მონაცემებზე აგებული მსჯელობის წვდომის უნარი;

6. ახალი მედიაწიგნიერება – ახალი მედიაფორმების მიერ გამოყენებული შინაარსის კრიტიკული შეფასების/განვითარების და მედიის დამაჯერებელი კომუნიკაციისათვის გამოყენების უნარი;

7. ტრანსდისციპლინურობა – წიგნიერება და კონცეფციების კროსდისციპლინური წვდომის უნარი;

8. აზროვნების დიზაინი – დავალებისა და სამუშაო პროცესების წარმოდგენისა და განვითარების უნარი სასურველი შედეგების მისაღებად;

9. კოგნიტური ტვირთის მართვა – მნიშვნელობის მიხედვით ინფორმაციის გამორჩევისა და „გაფილტვრის” უნარი და სხვადასხვა ინსტრუმენტისა და მეთოდის გამოყენებით კოგნიტური ფუნქციების მაქსიმიზაცია;

10. ვირტუალური თანამშრომლობა: ნაყოფიერი მუშაობის უნარი, ჩართულობა და ვირტუალური გუნდის წევრობის დემონსტრირება.

არავინ ვიცით, რას გვიქადის მომავალი, თუმცა მომავალ ათწლეულებში სწრაფად ცვალებად გარემოში წარმატებული ორიენტაციისა და საკუთარი ნიშის პოვნისთვის სულ უფრო მნიშვნელოვანი გახდება საკუთარი ცოდნისა და უნარების მუდმივი გადამოწმება და უწყვეტი განვითარება.
წყარო:
https://news.bbc.co.uk/2/hi/business/7142073.stm
https://cdn.theatlantic.com/static/front/docs/sponsored/phoenix/future_work_skills_2020.pdf

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი